الحق .. زبون

بسم الله الرحمن الرحيم

الجشع التجاري انتشر بشكل مروع وأصبح الزبون صيده لكل صاحب مبيعات حتى لو كانت حجه وإلا صاحبة بسطة وإلا بايع متجول
وإلا صاحب محل مجوهرات
وفوق الجشع غش منقطع النظير
فاجتمع الغش مع الجشع وزاد عليه الغلا حتى يكمل على المواطن كل أنواع النهب

مايؤلم هو أن يتحول الجشع إلى المساكن واستغلال حاجة الناس للبيت المريح والواسع والنظيف
واكبر جشع منتشر الآن هو استغلال المواسم في تأجير الشقق والشاليهات والاستراحات


مانلوم أصحابها لكن الرفق مطلوب .


في رمضان وفي موسم الحج تتأجر الأماكن بالمتر وكل متر بألف ريال
طيب اللي مامعاه وين يروح ؟
حتى الافتراش صار ممنوع يعني بلاش عمره وبلاش حج ؟

طيب فيه ناس سووا اذكيا واستأجروا شقق كل السنة بمبلغ مو هين لكن على الأقل يضمن صاحب الشقه انه مايكون عرضة للنهب من قبل أصحاب
العماير الآخرين ،

الحاصل حاليا انه قام أصحاب العماير بإخلاء السكان وتأجير الشقق بالمتر على حملات الحج والساكن اللي يصر على البقاء في شقته رح يتعرض لكل أنواع المضايقات خاصة لو كانت الحملة اللي سكنت العمارة افريقية اومن القارة الهندية ،


لما أقول بالمتر فاللي ما يعرف أقول له :
الغرفة تقسم بالمتر وتفرش بسرر حديد وعليها طراحة إسفنج رقيقة الحال و.. بس !
وكل غرفة قد تتسع لخمسة أو ستة أو حتى عشرة سرر يكون لها دورة مياه وحده
وبرضه .. بس!

يعني السرير لاصق بالسرير الثاني والشقة اللي بالقوة تتسع لشخصين يحشرون فيها عشرة
وشوفوا كل شقه كم ألف يطلع منها ..

إحدى الحملات في العام الماضي حشروا حملة افريقية في إحدى العماير ووعدهم الشخص اللي استأجر العماره انه يوفرلهم سكن مريح ووجبات
وغيره ،

الكثير منهم بقسم انه لم يجد غير السرير أما الوجبات فهي لاتزيد عن شوية سندوتشات تعطى لهم مره وحده في اليوم .


في المدينة نفس الشي ..

في كل مكان .. في جده... في الشرقيه .. كلها مثل بعض

الناس اللي ماحجوا ولا سافروا مالقيوا حتى خرم ابره على البحر لاشاليهات ولا استراحات ولاحتى بلاطه فاضيه يقضي عليها كم ساعة
يستمتع فيها مع عائلته بالبحر والجو الجميل اللي تتمتع به جده هذي الايام ،

حتى البحرحجب بالشاليهات الغالية نار واللي تتجاوز أسعارها كل حد معقول
والاستراحات مع كل مساوئها برضه طارت مع العجه .

يعني المواطن الغلبان وين يروح ؟!
إذا اعتدل الجو وراقت الدنيا لا دراسة ولا شغل ود الإنسان يستمتع ويغير جو لكنه يقعد يتحسر طول السنة
على الآلاف اللي راحت على لاشيء هذا ان لقي شاليه والا استراحه ..
السكن غير جيد
الخدمات سيئة
وأخلاق المسئولين تتناسب طرديا مع سكنهم كل ماغلي السكن كل مازانت أخلاقهم والعكس بالعكس صحيح .


وسلامتكم.

وكل عام والجميع بخير .