يا قرب عبرة كاتم الضيق وبكاه..

عزي لقلب لاعه الوقت واشقاه=والقاع ضاقت لو تعاظم فججها
على خفوقه دلة الهم مركاه=فاحت على ضوٍّ تزايد وهجها
تاكل حطبها من ضلوعه وتحداه=على دروبٍ عافها من عوجها
اشوف شي يزعج العين طرياه=واصد ما كن لي عيون زعجها
يا قرب عبرة كاتم الضيق وبكاه=كن المعاليق الجريحة درجها
ترقى والى قربت من العين وشفاه=تاقف على باب الحيا من حرجها
القلب يخلج لين شلع من عراه=عاف البقا والنفـس زوّد خلجهـا
يابو محيا من رضا بعيبه ارضاه=ومن لا رضا له حكمة ينتهجها
ورجلٍ بلا يمنى غناته بيسراه=ومن عاب ساقه ما يرده عرجها
يدرج بكيفه فالدروب المخلاه=خطوات رجله لو بغا ما درجها
والعاقل اللي فالبحر شاف ميناه=ينصا المواني ما تسمّع همجها
ان كان له دفه وساري ومرساه=وش له بغبات البحور و لججها
الوقت من شين التصاريف عفناه=بنزع ثيابه لو عليه نسجها
الوقت لو هو زينة الوجه و الجاه=يحرم عليه زينها مع غنجها
اعاف وقتي يوم وقتي مزاياه=كب العقول النيرة مع حججها
من قدّم الرابض وزيّـن خطايـاه=تعثر به السابق ولو هـو سرجهـا
ومن لا يحسّب وين تمشي به خطاه=يا بعد ضيقات الزمـان وفرجهـا

الشاعر/ مشبب العاصمي