اهداء الى زملائي وطلابي بعد ان ظهر النقل وحان الفراق ! ! !

يا حر قلبي . . حر قلبي . . يا حره = يا شيب عيني من فراق المطاليق
يا ضـُـر حالي . . ضُـر حالي . . يا ضُـره = في ساعة من ضُـرها ينشف الريق
اقولها واجر بالصوت جرة = من سمعها يدفق من الدمع ويريق
عز الله ان فرقى المطاليق مُرة = تمزق الاكباد بالجوف تمزيق
ما سر قلبي البعد عنهم ما سره = والدمع من عيني على القول تصديق
لي في غلاهم كرّةٍ بعد كرّة = من طيبهم طوقني الحب تطويق
احزن على اهل الطيب بحره وبره = اللي ليا من شفتهم روّح الضيق
منهم مدير ٍ كفوْ لله دره = له في الوفا والصدق عهد وتوثيق
احلف لهم واعيد مليون مرة = يمين من صادق ولاهو بتلفيق
يبقى غلاهم في خفوقي مقره = ولايجي له خارج القلب تعليق
من برني بالفعل والله لابرّه = وامسي على ود اهل الامداح وافيق
ولا انتقص من قدرهم وزن ذرة = ذيك الصقور اللي لها فوق تحليق
ولا نسيت اللي لعينيّ قرة = طلابي اللي حبهم بالمعاليق
يازينها لا مني اخذت فرة = على الفصول اطل في الصبح واويق
اناظر احبابي نجوم المجرة = يا حي ذاك الشوف يا اغلى المخاليق
لهم نفوس طاهراتٍ وحرة = يازينها البسمة اذا قلت (( تصفيق ))
الله يكفيهم من الوقت شره = وانه يوفقهم على الدوم توفيق