علموا وتعلموا انتم اولا

كلنا نسمع عن المراه النشميه صاحبة المواقف القويه والتي تقف في وجه كل الصعاب ولا تهزمها الشدائد
نسمع عن الام التي ربت اطفالها حتى غدوا رجالا يشار اليهم بالبنان وتولت تربيتهم لوحدها في غياب الزوج اما لوفاه او سفر
او مرض
وهناك من وقفت في وجه الاعداء فكانت عن عشرة رجال
وهناك من تصدت لحيوان مفترس او افعى سامه
وهناك الكثير من القصص التي تروى عن النساء في كل مكان اللاتي قمن بافعال خارقه استحقت ان يذكرها الجميع

لست عنا بصدد رواية هذه القصص ولكن تفضلوا بالقراءه

اليوم كنت في المطبخ وقت الظهر كالعاده وحولي بنيتي الصغيره عمرها 3سنوات وكم شهر تلعب بكوره ملونه وسمكه كبيره (نيمو)
وقالت لي ابغا اسبح نيمو قلت لها طيب بعدين وانشغلت بشغلي ولا انتبهت لها كثير لانها تروح من الصاله للمطبخ ما تتعدى
خلصت كم شغله ورحت اصلي الظهر ووقفت على السجاده ( الواجهه الزجاجيه للصاله تطل على المسبح ) وقفت .. الله اكبر توني بابدا الصلاه
الا انا اشوف الكوره في المسبح واركز زين الا والله شعر لينا طافي فوق المويه ووجهها تحت وجسمها ينزل للمويه





لااله الا الله قمة قمة قمة الفزع صحت باعلى صوتي واناديها وانعميت مدري من وين اروح وافتح باب الصاله واطلع على المجلس ومنه على الحديقه وبعدها المسبح مري كم اخذ مني وقت لكني لما وصلت لقيت الشغاله نطت في المسبح وتطلع البنت
وتعطيها لي ونمددها على العشب وهي فاقده للوعي
قد اخذت دورةاسعافات اوليه لكن ولا تذكرت منها شي الا اني ارفع رجولها واضغطها على بطنها علشان تطلع المويه اللي دخلت في بطنها
والشغاله مع انها كانت مبلوله كلها راحت البيت وجابت بطانيه وغطت البنت والحمد لله ما اخذت وقت وبدات ترجع المويه وفاقت شويه
انا انهرت انهيار كامل وانشليت فعلا وان اتذكر كيف لو ان هذي الشغاله ماهي عندي
لمطبخ يطل على المسبح على طول وهو الباب اللي طلعت منه البنت ولا انتبهت له لفيت على البيت كله بدون وعي
ما اعرف اسبح يعني لو بنقذ البنت كان رحت معها
نسيت الاسعاات الاوليه
انهرت واعصابس انعدمت وعرفت اني عند الشدائد ولا شي

طيب ليه

ليه احنا ياسعوديات كذا ؟
ليه عند المصيبه تتعطل كل حواسنا
ليه مانقدر نتصرف ولانعرف كيف ننقذ غريق والا مصاب
من ايش احنا ضعاف ؟
من هو السبب
مجتمعنا ؟ تربيتنا ؟ خوف اهلنا علينا ؟ اعتمادنا على الرجال انهم يسوون لنا كل شي

بصراحه قمة الاحباط هو ما عشته اليوم واكثر ما ازعجني اني كنت احسب اني قد الشدايد

نصيحه

قفلوا المسابح اذا في بيتكم اطفال
حطوا اقفال على الابواب اللي تؤدي للمسبح
تعلموا الاسعافات الاوليه وجهزوا شنطة اسعافات
جهزوها من عند طبيب مختص
تلعموا السباحه وعلموها لاولادكم من صغرهم

وجعلكم ماتشوفون اللي شفته اليوم وسلامتكم