الشيب شفته في المرايا وصديت

يقول الشاعر :


الشيب شفته في المرايا وصديت
ما كنت اصدق ان ذا الشيب فيه
اثر الزمن يطوي رحاله ووليت
وراحت سنين العمر وش هالبقية
من بعد شفت الشيب في الراس حنيت
حنيت لسنين توالت عليه
سنين ذقنا المر فيها تجنيت
وياكم تكبدنا صنوف البلية
وذقت الحلى في بعض منها وتهنيت
مرت عليه مر الصبح والعشية
وسنين يا كم تهت فيها وتماديت
ما بين سب او ظلم والا قفية
ويا كم تحملت المعاصي وجريت
جريت انا ومثيل جر المطية
وسعيت في الدنيا وكم صبت واخطيت
واللي مضى عالناس يمضي عليه
ودارت بي الدنيا ولا يوم ونيت
وقضيتها ما بين شمس وفية
يا مرحبا يالشيب من يوم حليت
تظهر على نفسي امورا غبية
يالشيب ما خوفت قلبي ولا احزيت
الا مواريد من تقبل جلية
انت النذير اللي على الباب طليت
ووصلت حد الباب وش عاد ليه
ما عاد لي الا التوبة ان كان ابكيت
وسألت انا المولى ورب البرية
وقلت توبي يا نفس قبل يا ليت
ما عاد ينفع ليت وقت المنية
صومي وصلي ثم حجي إلى البيت
وروحي إلى طيبة ومسجد نبيه
وتزويدي بالخير من بعد ما اشقيت
نفس تعاندني ونفس عطية
وان عشت يا نفسي من الخير جنيت
جنيت لي مجنى الثمار الهنية
يا رب تغفر زلتي يوم زليت
وانك تجنبني الزلل والخطية
وعلى الرسول ازكى سلام وصليت
اعداد ما هلت مزون نشية .