ضاقت بوجهــــــــــــــــــي

العيـــد هــلّ وزغـــرد النـــاس فرحه=وأنا أحــــس أنـــي من النـــص مقسوم
اللـــي شـــرى بشت وطــيب لصبحه=وأنا شريت من العنــــــاء هــمّ بالكوم
وجـه الفرح يلبس على الراس طرحه=ووجهي غدى من لـوعة الوقت ملطوم
والحـزن شيـــّد داخــل القلب صرحه=وثوب السعد من شــدة الضيــم مخروم
الأمس مثــل اليـــوم والغــــــد ّشرحه=الأمس مـــرّ وباقــــي الغـــــــد واليوم
من حرقتي أحس في الجـــوف قرحه=أضحك بوجه الناس والجــوف مسموم
وعــــــدّ دمــع العين لــو شـح نضحه=يندى جبينــــي بالعـــــرق مثل محموم
من عقب ما دنيــاي بالفــــــرح برحه=ضاقت بوجهـــي وكل موجــود معدوم
وأرست مراكـــب ذكـــــرياتي بنفحه=على ضفاف الموت وأصبحت مرحوم
وعمق الألم طــــوله تســـاوى بسفحه =ولجت في مــوجه وأنا ماعــرف أعوم
كانت مشاعـــرنا مــــع الوقت سمحه=وكنا نعزي النفس عــن ضحكـــة اللوم
حتى أنفـرط حبل الصبر فرط سبحه=وحظـــي تعثّـــر كل ما حـــاول يقــوم
ما فيــــه فـــرق بين خســــره وربحه=ومــا عـــــاد أميز بين خــادم ومخدوم
صــرخـت حتى لازم الصــــوت بحه=وحاولت أخفــــي كـل ماكـــــان معلوم
ياشـين وجـــه الوقت ياشــــــين قبحه=ثقيـــــل طينـــه جرت خطــــاه بالشوم
غرز بمجــــرى الظهر ياخوك رمحه=حتى أنبثق صـدري من الجرح مكلوم
أرهقـــــت عمـــري ليـن مليت كدحه=وأصبحـت كنـي راعـــي ضيّـــع القوم
يا قطعــــة منــي فقـــــــــدتك بلمحه=هبّ القدر وأخــــذك وأخــــذ لـذة النوم
واللي فقير الحـــال مـــن دون صحه=لامن ذكــــرته صرت بالهــــم محكوم
ياليتني أصحــــى على قــــول مزحه=ويقول لــي شخــص تراك أنت موهوم
لألعب على أوتار الطــرب لعب دحه=وأجاوب أهل الطــار بلـــحون مضيوم
شرعـــــت لك يالصبــــر باب وفتحه=أن جيت والأ مــــانت ياصـــبر ملزوم
وشلـــــون أعيّـــد دام مافيـــــه فرحه=ومحد ٍيغيـــــّر شــيء مـــن الله مقسوم