>؟< سود الله وجيه وبيض الله وجيه >؟<

سود الله وجه رجّالٍ يفرّط في العطيه = ومن يفرط في العطيه ما عرف معنى الرجاله
وسود الله وجه رجّالٍ يدور للأذيه = ومن يدور للأذيه يكرهه حتى عياله
وسود الله وجه رجّالٍ يثير العنصريه= بين ناس جمعها فيه التآخي والزماله
وسود الله وجه رجّالٍ يحب العنجهيه = ما درى إن العنجهيه تحرم الرجّال فآله
وسود الله وجه رجّالٍ نسي خوّة خويه = بعد ما ميل عليه الدهر وأنفق كل ماله
وسود الله وجه رجّالٍ نسي معنى الهديه = والهدايا ما تردّ ولا تودّى للبقاله
وبيض الله وجه رجّالٍ عرف معنى الحميه = يحتمي من دون ربعه وإن بدأ اللازم بدأ له
وبيض الله وجه رجّالٍ إذا رد التحيه = ردها بأحلى كلام وبآن للسامع مقاله
وبيض الله وجه رجّالٍ إذا جاته وصيه= من حكيمٍ عاقلٍ رحّب وهذا من كماله
وبيض الله وجه رجّالٍ شعاره صدق نيه = صادقٍ والطيب والمعروف يحسب من خصاله
وبيض الله وجه رجّالٍ إذا وليّ رعيّه = يجعل القرآن والسنّه سبيله في مجاله
وبيض الله وجه رجّالٍ إذا لاحظ عليّه = كلمة ما هي صحيحه دزّها لي في رساله