الصمت حكمه والحكي مصدر افلاس!

قالوا علامك صـامت وقلت ياناس
كــثــر الــكــلام يــقل لاجله مقامي


الصمت حكمه والحكي مــصدر إفلاس
ولــقيــت فــي صـــمــتي يزيد احترامي


الصمت له معنى وله ذوق وإحســـاس
مــركــب نــجـاتـك فـي بـحــور الظلامي


ترى الرجل صوره من الـراس للساس
ثـــم يــتــبــيــن جــوهـــره بـالــكــلامـي


إما نطق في كلـمـة تـرفــع الـرأس
تضفي على شكله جــديـد الاسامي


وإلا يعود معدنه مـــعــدن نحاس
يرميه سهمه بـعــد ماكان رامي


لا صار عندك من ثمـيـنات الألماس
خـلـه بــصــدرك لـيـن وقت التمامي


أخاف يطلعلك مـن الناس بلاس
وإلا ســفــيـه مـا يـرد الـسلامي


الله خلق خلقه على عـدة أجناس
وكـلـن يـسوقـه مـذهـبه للأمامي


والله خلق بالطير قمري وقرناس
ووقت الهدد ما ينغزي بالحـمـامي


لا جال في صدرك من الهم هوجاس
وعــيــنــك يــحـاربـهـا لـذيذ المنامي


ونفسك عليله والفكر صار محتاس
اتـرك طمان القـاع وارق السنامي


عـليـك بالـعالي لـيا هـب نـســناس
يبري الجروح الخـافيه والعظامي


وخـلـك لـربــعــك دايم الدوم نـبراس
وخص القريب وخص ولد العــمامي


خـلـك لـهم فـي داجـي الـلـيـل مـقــباس
ولصاحب أصدق من حقوق الغمــامي


ربعك ذراك ليا لحق راســك البـاس
قـدم لـهـم شـربـك ولـو كـنـت ضـامي



وخلك لثوب الطيب والعز لبـاس
واتـرك دروبٍ تـنـتـهي بالحرامي


وفعل الجميل وواجب الضيف نومـاس
ومـن لا نـفـع بـالـضـــيـق نفعه عدامي


بيت الكريم أبوابه بدون حـراس
وبـيـت البـخيل يـعـد مثل الهدامي


كلٍ بها الدنيا نصيبه بـمقياس
ياخذ نصيبه لوجــفـوه الأنامي