عــــــــ 27 ــــــــــام

لقلوبكم البيضاااء

وكل عام وانتم الى الله اقرب

عيّا لذيذ النوم لا يطرق العين=والعين تشكي من سبايب سهرها
ليلة موادع (عــــــــــ 27 ـــــام)=دق الحزن بابي وروحي قهرها
قمت أتذكر لحظة الــعــسر واللـــين=واجمع ورق فكري لو ايدي عسرها
وَقـــول ألا يارب يا حافظ الدَين=يا غافر الـــزلة ومخفي آثرها
ارحم عبادك واغفر لكل مسكين=مما جنت.. نفسه وتالي كدرها
ضاقت به الدنيا مثل صاحب الدَّين=يوم ٍ روحه من عناها قبرها
هذي سنه مرت بها الزين والشين=مرت ولا فينا من أحصى خبرها
ضاعت حقوق أمـــه وحنّا مقفيين=واستوطن الشيطان الارض ودمرها
وتلعب على الحبليين بنت الملاعيين=باسم الحقوق تمارس أبشع صورها
مابين خاين .. كاذب .. وجمع الاثنين=تفقد مفاهيم السياسه بصرها
والله يرحم من تذكّر فلسطين= وأمسى يعزي خافقٍ ما نصرها
والمعذره لو كان ماتنفع الحين=المعذره يا قدس.. هلّت عِبرها
عام ٍ مضى وبصدره آثار سكين=وعامٍ جديد اتحس ناره سعرها
ويبقى الأمل موجود لو شحت سنين=وتبقى الأماني.. حلم نجهل قدرها

وطابت اوقاتكم