خلاص قدرك طاح

يا هاتفي حرمت أنا بعض الأرقام =ما أدقها في شاشتك للقيامه
أرقام ناس قدرها تحت الأقدام =ما أظن يلحقني وراها ملامه
أحكم عليها فالغلا حكم الاعلام=من شان كل يتضح له مقامه
وإلا أنت ياللي صار لك عدة أيام =أشوف في عينك دموع وندامه
خلك على هرج القفا تبني أحلام=لا خير فاللي ما ينفذ كلامه
غروك ناس حكيهم دوم هدام =أهل القلوب السود وأهل النمامه
خلوك تنسى صاحبك يابن الأكرام=عقب أربع سنين تنسى غرامه
خليتني عايش على هم وأوهام =وحرمت جفني من لذايذ منامه
طاوعت فيني هرج عاذل ونمام =واليوم أشوفك تايه فالغمامه
لا شفتني صديت مع مر الأيام =لا تقول قلبك يابنت وش علامه
اليوم قلبي مات يا ترف الأقدام =موت القلوب ولا تموت الكرامه
خلاص قدرك طاح من عيني العام =رميت قدرك مثل رمي العمامه
مابي تراضيني والأيام قدام =وآخر كلام أقول : مع السلامه