(( ابتـسـامـاتك ))

يابعد من هو ابتسم لي جعل هالبسمة تدوم=بسمة ٍ تشرق على الدنيا وهي بلثامها
المطر بسمة رضا .. كانت زعل بين الغيوم=بسمتك حسبي على اللي حدني لخصامها
بسمتك شمس السنين اللي تصحـّي : كل يوم=بسمتك طفلة ينام العيد في هندامها
بسمتك حلم القصيد اللي سهرني قبل أنوم=بسمتك وعد العيون اللي تحب أحلامها
انتي أكرم من زماني واعذريني يوم ألوم=انتي أجمل بنت تاطا هالثرى بأقدامها
انتي احساس ٍ نشلني من على شط الهموم=دنيتي لأرض السعادة تزهمين أيامها
كل ما أخطي زاد نبضك بالتسامح يارحوم=واهني أرض ٍ غديتي رمزها و أعلامها
ياحنون ٍ رتبتني لين رتبت النجوم=ليتني طفل ٍ يشارك صدرها وأنسامها
ليتني طير ٍ وحيد في سما قلبك يحوم=ليتني كنت القضية والوصال أحكامها
طاغيه فيك الأنوثه تعشقك حتى الهدوم=ماتلام .. وشرهتك والله على اللي لامها
لو يفكر في فراش ٍ تحضنينه مايلوم=لو يفكر فــالوسايد ليلته مانامها
لو يفكر في عطورك صارت علومه علوم=لو يفكر في عيونك .. حب حتى سهامها
لو يفكر فـابتساماتك يطيح ولا يقوم=ويغدي حلمه مثل حلمي : يطيح لثامها