الحديقة الخلفية !!

من ذكرياتي القديمة في يوم من الايام العب بلايتيشن
( weining eleven 4 )
و مسجل هدف بعشقي قابرييل باتيستوتا و كان الهدف دبل كيك و مخزن الهدف في التخزينه الي تركب في البلايتيشن
المهم اني مبسووط هدف دبل كيك و بباتيستوتا

في نفس اليوم كان عندنا عشاء لواحد من الجماعه بس انه عايش في الرويضه اسمها كذا و يجي للديرة بعايلته يشقر و يرجع للرويضه
المهم ان العشاء كان في البر و عشاء خااص جدا ابوي و اهله و الرجال و اهله
المهم اني افكر متى ارجع للبيت عشان اشغل الهدف الي سجلت و اخلي اخواني يشوفونه
و مع تداخل الافكار في راسي و التفكير في مستقبلي اكمل دراسه و لا اسجل في الهلال
الا البنيه الي تناديني يمكن اكبر مني بسنه و يجوز اصغر مني و يمكن مثلي برج الثور في سنة وحدة
الكلام عام 2002 او 2001 انا بثاني او ثالث متوسط
تو حب الشباب مختم على جبهتي اهي نفرتين بس و فقعتها
طبعا انا متشطر من اهلي بعيد منهم شوي و البنيه من بنات الضيف و البر خلي ما فيه احد مابه الا انا

قالت و هي لها نفضه و مرتبكه اهلنا وينهم دريت انها من بنات الرجال لينها قالت لي يا ولد ( ما تعرف من هو رويال )

و انا الي تجيني ام الركب معاد دريت ارضي من سماي
ها وش جابتس عاد هنا ؟
قالت ضعت

انطلق قيس بن الملوح الي داخلي
اي بنت تسأليني و لا تستفسر مني عند بالي انها معجبه و لا حبتني
الا قلبي يفر من ضلوعي
و اوصفها المكان و تروح و عين الله ترعاها

و انا ذاك الليل و الله ما امسيت مغير افكر في الاجوديه
هي مثلي ما امست
و لا ما درت عني

ااه يوم كبرنا عاد و اذا تقابلنا من السنه الى السنه مع اخوانها
ودي اسأل واحد من اخوانها من جيلي طبعا
اختك الي اصغر او اكبر منك اهي تزوجت

كل ما شفت اخوها طرت علي

هو ذا حب يالربع و لا خرابيط ؟