متقاعد يهدي زوجته زفافاً وشهر عسل بعد مضي 30 عام زواج .

أخي الغالي العمير ، أختي الفاضلة الأزدية ، أختي الفاضلة تراتيل ، أخي الغالي رويال ، أخي الغالي أبو مانع ، أختي الفاضلة الضامية ، أختي الفاضلة تهاني البكري ، أخي الغالي المهندس .

شرفني وأسعدني مروركم جميعاً بموضوعي والله يعطيكم العافية ويسعدكم في الدنيا والآخرة ، أسعدتني ردودكم وتعليقاتكم ، كفيتوا ووفيتوا وعساكم سالمين غانمين .

ما قام به هذا الزوج الوفي عمل يُشكر عليه لنصفه الآخر وهذا أقل ما يمكن أن يُقدم لشريكة الحياة وأم الأولاد الصابرة على الحلوة والمرة ، والله يكثّر من أمثاله .

أبشركم تفاهمت مع أم محمد وحكيت لها القصة وأسعدها الخبر ، ولكنها قالت ، طيب إنت وش عندك يوم تقول لي هالخبر إنت بتسوي سواة هالزوج وإلا بس بتـحرق أعصابي عالفاضي ، قلت لها شوفـي يا أم محمد ، حكاية إننا نسوي حفلة زفــاف وطقطقة هذه شيلهـا من مخك ، يقـول المثل ( إذا شاب ودّوه الكُتّاب ) لكن الفلوس اللي بنخسرها في الزفاف والطقطقة بنسافر فيها أنا وإنتي لإحدى البلدان الإسلامية بمفردنا وهناك نقضي شعر عسلنا المتأخر وننبسط ونستأنس ونخليها أربعطعش ، وأخيراً أستقر الرأي على أن نسافر إلى أندونيسيا وفي الجبل الأخضر بالذات لأنهم يمدحوا الطبيعة الخلابة فيه والأمطار المستمرة وأندونيسيا بلد آمن ورخيص في كل شي ، ولكن هناك مشكلة ما كانت على البال ولا على الضمير ألا وهي إبننا محمد الله يحفظه ، فلو ندخل جحر ضب لدخل معنا فيه مثل الطلي خلف أمه ما يفك أمه بنق ، وأحترنا وين نوديه ، وأم محمد لا تستطيع أن تفارقه ساعة واحدة فكيف بنغيب عنه شهر عسل كامل ، وقالت كل شئ ومحمد رجلي على رجله ، قلت لها يا بنت الحلال ما صار هذا شهر عسل ، هذا شهر نكد ومحمد الله يصلحه بيخرّب علينا شهر عسلنا ، خلينا نوديه عند جدانه أو أخواله ، أبغى أنا وإنتي نختلي بأنفسنا ونأخذ راحتنا ونجدد شبابنا ونبتعد عن هالروتين الممل ، قالت يحرم ما أتحرك إلا بمحمد وإلا يقعد شهر بقعا لعمله الرادي ، الله يغنينا عنه اللي ماجاء الإ متأخر ، لو كان يوم إنك صادق كانت هذه الفكرة من زمان وقبل لا يجي محمد ، لكن ذلحين يحرم ما أقضي شهر العسل إلا بحبيبي محمد ، وإلاّ خلّنا نقعد في بيتنا راضين بما حنا فيه ولله الحمد والشكر .

فأنا يا بني عمي محتار وش الدبرة وش السواة ، الفكرة جازت لي وودي أغير جو وأقضي شهر عسل شيبان متأخر مع أم محمد ولكن العيب العيب ، شيروا عليّ الله يجزاكم خير .

تحياتي وتقديري وإحترامي للجميع .