تدري لو إنك سحابة..؟

تدري لو إنك سحابة..؟

كان والله لتبعك..

حتى لو تتعبني.. لمشي..

في ظلالك.. ورتوي غيمة نداك

واتبلل من هطولك..

وان برق رعدك عساك

تحرق اليابس وينبت

زرع أخضر في سماك..

بذْرته في الأرض لكن

شدّته هيبة علاك..

حتى لو شمس الظهيرة..

كنت إنت..

لحتسي جمرك.. واداوي

برد قلبي من هجيرك..

والتحف بُردة دفاك ..

يمكن إنت الليل..؟ يمكن !!!

أسهرك واحضن نجومك

واكحّل عيوني بلونك

وامتطي صهوة سكونك

ما أبي للصبح سيرة..

أتوسد بُعد يومك

كل صباحاتي فداك..

البحر يمكن تكون.؟؟!!

ما أقول إلا فديتك لو تكون...

و زرقة امواجك غطتني

بغتسل من كل موجة

وكل نبضة ترتمي بساحل غلاك

عذب لونك

عذب طعمك..

ساحر مدك ويازينه جفاك..

مابعدني عنك مرفأ..

ولا شواطي..ولا سفينة..

خلني أغرق ..

وخل الروح تفرح..

لاخطايا ولا خطاك

ضمها..

تسري في قلبك مالها حضن سواك.

أي شي ممكن تكون..!!

حتى لو كنت السوافي.

بحتمل كل الفصول..

وسطها أركز عصاتي واتكي

أنتصب وامسك مكاني..

أنتظر لحظة لقاك..

أرتجي لمحة جنونك

واحتري هبة سفاك

أحتوي ذرات منك..

وارتشف ريحة شذاك..