جمر الغضى

 
ونة تالي الليل ونيتها =حيرت من سمع حين جريتها
بعدها دمعة العين هليتها=والبشر ما دروا ويش سر الونين
ونة جات من داخل محترق=حرها عن ونين البشر تفترق
لو يجون المطافي بكل الفرق=ما يداوون قلب جريح حزين
هيه ياللي تقولوا وش هي أسبابها=خلوا النفس تصبر على مابها
والخوافي بقلبي وأنا أدرابها=واللواهيب بوجيه هلها تبين
القضية تحفظت عن شرحها=لكن الحين لابد من طرحها
القلوب التي زايد جرحها=كيف يهنا لها العيش يا مسلمين
خلوا المبتلى يا بشر لو بكا=واتركوا علة اللي سكت ما شكا
دام قلبه لكل الظروف أرتكا=قولوا الله على هالمأسي يعين
علته ضامته والزمان أقشرا=والأماني بدت تنثني للورا
والمدى طال والحال ذاك أنبرا=والشدايد لها في سجله سنين
حالته لو شكاها تهد الجبل=وانت ياللي تلوم المعنا خبل
قفلت قبل عينيه كل السبل=وانثنى حائر الفكرمثل السجين
الأماني قضت والزمان انقضى=والذي مؤمن يمتثل بالرضى
لو كواء داخله حر جمر الغضى=لا يبيّن خوافيه للشامتين
قل ما تلتقي داخل مستريح=كم ترى واحد من حياته جريح
دنيتك ما تجي دوم هبات ريح=حالها ينقلب عن يسار ويمين
وأنت لابد تصبر على كل حال=لو تشوف إن بختك تلعوز ومال
لا تشكا وتنحاس يابن الحلال=واعلم إن التدابير حين وحين