المركز الاول

بسم الله الرحمن الرحيم
السلام عليكم

هنــاكـ من يتهمنا بأننا في آخر الركب حضارياً
البعض يعيب علينا وجودنــا في ذيل القائمة تقنيـــاً
لعلهم صدقوا وهنا .. اقف !

لكل شعب صفة يشتهر بها
شعب هادئ الاعصاب وربما ( بارد )
شعب عملي , يرفض الكسل ويحب الانتاج
نحن على سبيل المثال .. ننعت الهنود بالغباء ! وهم ليسوا كذلكـ !
ونلقي بتهمة الكسل على السودانيين ! وربما اخطأنا !

الهنود اجتاحوا اسواقنا , غش وزيادة اسعار ونحن نشتري
احتكروا المهن نجار , حداد , سباكـ وغيرها يعملون لدينا
باضعاف مضاعفة ونحن ندفع !
من يضحكـ على من ؟ ومن هو الغبي ؟
السوداني يرعى لنا الابل والاغنام , يحرّج ويبيع ونحن فقط نشتري
حتى الحطب ( الممنوع اليوم ) باعته سودانيون ونحن نشب النار لندفأ
من يعمل ومن يستهلكـ ؟ ومن هو الكسول ؟
عجزت افكـ الرموز واحل المعادلة !

بس ابشركم بأننـا احتلينا المركز الأول بين شعوب العالم
دون منافس ! لا .. وبيننا وبين المركز الثاني فرق كبير جداً
اتحدى إذا فيه شعب يوصل مواصيلنا في سوء الظن
نحن رواد سوء النية

اكيد رح تقولون يبالغ ويمعن في جلد الذات
لا .. بل هي حقيقة واليكم بعض الشـواهد ..
شوفوا ردة الفعل

واحد يقول .. وين فلان يا الربع , يرد الثاني نقل الطائف
واحد كان متكي يجلس ويقول .. اكيد نقل تأديبي
آخر صدقت والله اني كنت انصحه انتبه لعملكـ
وخذوا من التقطيع علما بأن الرجال نقل ترقية

امثلة اخرى ع السريع

يا الربع فلان يقولون بالمستشفى وجينا نزوره قالوا ممنوع
ولا ندري وش عنده ,, مباشره ينط واحد ويقول اكيد ايدز
يستاهل اللي يسافر برى وما يخاف الله
ظلموه والرجال مسوي عملية بواسير

وحده صار على زوجها حادث وادخل المستشفى
جت مع ولدها تزوره وبعد خروجهم قالت للولد قرب السيارة
وانا بانتظركـ عند الباب وفجـــأة يمر شباب بسيارة
واحد منهم .. وقف وقف قسم انها جاهزة شفها مرتبكة
اكيد تنتظر صديقها , وقّف خلني اعطيها الرقم
اتهموها وهي مريضة مو قادرة تصل المواقف

سمعوا خبر حادث على اولاد فلان
احد الجالسين يا خوي ابوهم ما رباهم زين
اكيد كانوا يفحطون الله لا يبلانا ابوهم فاشل
واللي حصل انه واحد صدمهم عند المدرسة

بنت فلان خطبها ولد فلان
وبعدين ما عجبها وطلبت من ابوها فكـ الخطوبة
وافق الولد ,, سمعوا الربع بالخبر وبدأوا يسولفون
واحد منهم .. يا الربع اكيد في البنت شيء مش معقول يفكها كذا
واحد ثاني .. اصلا امها مي مضبوطة وهات .. بهتان وظلم

فلان شاعر
يقول احدهم من وين جاله الشعر
الثاني شوف القصيدة ,, اكيد سرقها
والا واحد كاتبها له
يا هوه اتق الله

فلان دكتور
واحد مقهور .. من وين جاء دكتور
الثاني اكيد شراها والا مزورة
يا ناس خافوا الله

فلام مات
واحد .. اكيد من سواياه الشينة
يا الله .. حتى على الموت ...
والامثلة كثير .

طولت عليكم
من القهــر .. بس لا احد يسيء الظن
ولازلنا في المركز الاول في سوء الظن
وسواد القلوب الا من رحم ربي
الكلام نسبة وتناسب
والا فالخير موجود

سؤالي
ماهو السبب ؟ هل هو الحسد ام عدم ثقة ام الغيرة أم هو مرض خفيّ ؟
ما سبب سواد القلوب وسوء الظن بالآخرين ؟
اتمنى إذا جاء طاري واحد يذكرونه بالخير
والا يسكتون على الاقل .


والسؤال الآخر ..
هل نحن اذكى من الهنود واكثر نشاطاً من السودانيين ؟

تقديري لكم