انزاحت الغمة وبان الهلالي

لاوالله الا دق صفّار الانذار=لكن جوّد غترتي يا عقالي
حنا مغازينا على قب الامهار=والقوم جتنا في ظهور البغالي
يأهل المعاني يا بعيدين الانظار=انزاحت الغيمة وبان الهلالي
بيت الردى من هبّة الريح ينهار=اما بيوت العز مثل الجبالي
واللي تعرّض للعواصف والاعصار=خبل ينادي للفشيلة تعالي
لا يحسب اني من مولّين الادبار=انا عن الذلّة بعيد المنالي
شيخ ولي في الطيب سيرة ومشوار=أعتز في جدي وعمي وخالي
لي بين خلق الله مكانة ومقدار=اهل السعادة والسمو والمعالي
واعز نفسي عن رديين الاشوار=اهل الخطا واهل الخنا والجدالي
وادرى على الاصحاب وادرى على الجار=وابعد عن اهل الفسق والانحلالي
واللاش لو حوله من الناس مليار=لا بد ما يظهر عليه الخمالي
تلعب به اوهامه من ايمين ويسار=في موقفه شكة وفيه اختلالي
والى اجتمع في الماقف اصغار وكبار=يبين نقصه بين كل الرجالي
لا يحتمي نفسه ولا ياخذ الثار=في الحكم مثله مثل بنت الحلالي
وياللي تقول الشعر مفساح مقطار=بتموت ما طبيت سوق الغوالي
ما كل من عنده مخالب ومنقار=يسكن بروس النايفات الطوالي
اكثر طيور الارض جنحانها قصار=الله منزّل روسها فالرمالي