عمى عيني الرجّال يركض ورى المقفين .. يسوم الكرامه بالفلس عند شماته

السلام عليكم ورحمة الله وبركاته

قصيدة اعجبتني وحبيت انقلها لكم

للشاعر / ابراهيم بن مريع

أنا لا بغيت أسج وأسلـى مـع الساليـن

تعـرض لقلبـي مـا يجـدّد معانـاتـه

همـومٍ بقلبـي طاولتنـي ثمـان سنيـن

هنّي الـذي لا طـرّف الليـل ماجاتـه

وأنا في رجا اللي ما يخيّب رجا الداعين

يـعـدّل زمــانٍ كـاثـراتٍ ملفـاتـه

عرفنا من الدنيا صديـق القسـا والليـن

ومصير الرجل يِِبحـث خفـاه ونهاياتـه

ومن سَمْع ما هو مثل من شاف بالثنتيـن

ولا كل مـن يـروي تصـدق رواياتـه

ومعدن ردي الساس وقت اللـزوم يبيـن

ومعدن عريـب الجـد تظهـر علاماتـه

وسيع المعرفه واجبـه يرشـد الغاويـن

ولا كل مـن قصّـر تقصّـر طويلاتـه

وعمى عيني الرجال يركض ورى المقفين

يسـوم الكرامـه بالفلـس عنـد شماتـه

ولا يثلم الرجّـال مثـل الفقـر والديـن

ولا تنفـع المبغـوض كثـرة علاقـاتـه

ولا كل من سولف وغنى يجيـب الزيـن

هـدور المجالـس مـا تفيـده دعاياتـه

ولا يجرحك مثل الخطا من طرف غالين

وكـلٍ يجـي رزقـه علـى قِـدّ نياتـه

وراعا الوفا ينهج علـى منهـج الوافيـن

ومتصنّـع الطالـه تضيـع اتجاهـاتـه

وأنا منزلي عند النشامـا يسـر العيـن

وقسمي مع اهل الطيـب علّيـت راياتـه

هذي ترجمة هجسٍ لفاني عصر الاثنيـن

وكـل مـع هجسـه يترجـم معانـاتـه

تقبلوا أطيب التحايا

سيـــــــــــــــــــ / العرب / ــــــــــــــــف