القبطــــــــــــــان ..!!

صيف هذا العام أسوأ صيف عشته في حياتي
باختصار اكثر ... مررت بمرحلة جداَ حزينة
كنت عايش في صراع كبير من ذاتي لذاتي
كنت ضايق ... واشعر اني بعد ضيّقت المدينة
كنت اخطط وانتظر صيف السنة هذي ..واحاتي
لجل اعيش اجمل <إجازة حب> مابيني وبينه
الحبيب اللي من اول كان اجمل ذكرياتي
وصار ابشع ذاكرة في داخل اعماقي دفينة
كانت اشوى لو صدمني فجأة بغير امنياتي
ولا اموت بامنياتي غدر من طعنة يمينه
ضيّق الدنيا بعيني صدق .. واحترت بجهاتي
كنت اشبه مااكون بحال قبطان السفينة
لا ارتفع موج البحر والريح هبّت والتفاتي
كان عكس الاتجاه اللي يحسّس بالسكينة
راكبين اثنين عرض البحر والمركب مؤاتي
للغرق..أو..واحدٍ منا يضحّي عن ضنينه
يعني كان الحل واحد ..يامماته .. يامماتي
البلا في ناتج الحلّين .. اموت من الغبينة
قال:ويش الحل؟ قلت التضحيه من واجباتي
لازم اضحي عشان اعطيك بعض الطمأنينة
قال:افرض لو خذاك البحر..قلت أعلن وفاتي
قول:مات فلان لجل اعيش .. والمولى يعينه
قال:طيب..لارحلت شلون بتهنى مباتي
قلت:فكر في رجوعي بس.. وانطرني لحينه
وانتبه تنسى وتكفى كل شي الا..وصاتي
انتبه للقلب تكفى.. قال : في ايدي اميــــــنه
قمت اودعه بسكات ودمعتي تشرح سكاتي
وماذبحني ضيق الا يوم انا اقـــبـّـــل جبينة
وارمي نفسي للبحر واختل في موجه..ثباتي
والبحر لبعيد اخذني وصرت لامواجه رهينة
لكن الله مد في عمري ..ونجاني بصلاتي
ماوعيت الا وانا مابين شط وبين طــــينه
والحبيب اللي نجا.. ماكان متوقع نجاتي
جيت من بعد الغياب المر .. ادور عن حنينه
مالقيته في المدينة وانشغل بالي..واحاتي
ورحت من باب انشغالي اسأل الجيران.. وينه؟
قيل:سافر في <إجازة حب> دام الصيف آتي
جاه غيرك ياخذه من قبل يومين بيدينه
وقتها دنّقت راسي حزن..وحسيت بشتاتي
وقتها حسيت نفسي .. طفل اهله بايعينه
وش حصل لابن اللذينا؟والا انا وش هي سواتي؟
ماتقول الا كأني ذابح له .. والديــــنــــه

من رواائع الشااعر :: محمد الشهـــري ..