أبيات أعجبتني 00 كل واحد يشـارك

تنتشي عيني فرح بك وانت عن حالـي مَ تـدري=حتى انا مـدري ولكـن! أشعـر لطلتـك هيبـة
وتتعلّق بك عيوني لين اشـوف الـزول يسـري=واتبعك في ناظـري واقـول : ياربـي تجيبـه؟
فزتي لك طيش؟ مدري حب؟ مدري حس فطري؟=الوكاد انك نهبت القلـب مـن صـدري نهيبـة!
يعني وش اكثر من اني لا لمحتك فـز عمـري؟=وصار يوم اللي اشوفك عيد عندي واحتفي بـه!
يوم اشوفك,, احفظ التاريخ ميـلادي وهجـري=وارسم لعين المحبـة قلـب بـه سهـمٍ يصيبـه
و أتهجى كلمة ( ا ح ب ك ) واغنيهـا بشعـري=واكتبـك بيـن القوافـي واتسمّـى لـك حبيبـه
من كثر ما اسعى لوصلك , اذكر انه كان نذري=(لو يجي والله لاجي له لين اصير اقرب قريبـة)
ومن عقب ذاك التمني عاضني ربـي بصبـري=وجيت تشكي لي جروح الود والشـوق ولهيبـة
نذري اوفيته.. وفي قلبك عـلا شانـي وقـدري=نلت وصلـك ياحبيبـي طيـب.. ولابالغصيبـة!
ما امداني اشربك واروي ضما روحي وعمـري=ما دريت الاانت مقفـي تلعـن الحـب وتعيبـه!
كيف يقوى قلبك القاسي على صـدي وهجـري=وانت تدري في ليالـي عمـري بدونـك كئيبـة
من بعد عينك ترا صار البكـا ل الليـل يغـري=والليالـي ترتـدي ثـوب الالـم وتشـق جيبـه
كل دمعة تنحدر تكتب علـى الخديـن (بـدري)!=ايه بدري لاتروح القلب دونك ويش ابـي بـه؟
باسألك وشلون تسفه قلـب وانتـه فيـه تجـري=وانت تدري من بعادك دقتـه صـارت صعيبـة
ان تماديـت بجفـاك.. بتنقـل عظامـي لقبـري=صدتك عني تبرهن لي علـى ان للحـظ خيبـة!
أسالـك بالله ان صدقـت او كذّبـت عــذري=لاتزيد الهـم فـي قلـبٍ بـه جـروحٍ عطيبـة
آه لو تـدري وش اللـي دايـمٍ بالبـال يطـري=لاطرالـي قلبـك وحـبٍ تذكـرتـه بطيـبـه؟
يختنق دمعي بعيني وقلبي اللي وسـط صـدري=يرتجي وصلك .. وصارت دقتـه دقـة غريبـة