الألفية العربية

ألف أولف من جميل القوافي=من بعد ما بان الخلل والخلافي
هذي تواقيعي بكل اعترافي=إن العرب ضاعوا وطاحت همهم
الباء بدون مجاملة يا جماعة=لازم نسد الشق قبل اتساعه
بان التخاذل بيننا والقطاعة=بعض العرب خانوا وباعوا ذممهم
التاء تهاويل الزمان الكثيرة=صالت وجالت في ربوع الجزيرة
تخطيط ناس بالنوايا شريرة=فرق جموع المسلمين وقسمهم
الثاء ثلاث أعوام والشر قائم=بين الذي سني مع أهل العمائم
والعقل مما شاف حائم وعائم=عن ربنا ضلوا وربي حرمهم
الجيم جانا عاصف واجترفنا=من بعد زين العابدين اكتشفنا
سر الحقائق لين بالعين شفنا=وأهل المناصب غدرهم ما خدمهم
الحاء حروب تقصد أهل العقيدة=من ينتمي للدين تبغى تبيده
والا سواء هذا وش اللي تريده=أخفوا خطرهم خيب الله قيمهم
الخاء خذلنا بعضنا باتفاقي =واكبر مصيبة شامنا والعراقي
بعد المجازر يا عرب ويش باقي=حنا نشاهد والمعادي هزمهم
الدال دم المسلمين الضحايا=في كل يوم له تزيد الرزايا
ذي حالة أراكان فيها حكايا=من جور ما لاقوا تزايد المهم
الذال ذل(ن) عمنا يا خسارة=صرنا نفكر فالوتر والسيجارة
والمسلم اللي دنس النجس عاره=ما همنا ناس بلاهم سمهم
الراء رموز الكفر ثاروا علينا=واحنا على حرب العداء ما قوينا
لنا بهدي المصطفى ما اقتدينا=وأسلافنا بالدين طالوا قممهم
الزاء زمان العدل ولو رجاله=وش عاد غير البهرجة والحثالة
واليوم كل قال حاله لحاله=والناس غيره ما ردع من ظلمهم
السين سار الوضع بالحيل مزري=وإذا نشدنا حاكم قال مدري
والمضطهد دمه على القاع يجري=والناس حوله ما سلم من شتمهم
الشين شور الغرب ما هوب صائب=ياللي خذيتوهم عزاز وحبايب
ما من وراهم غير كل المصائب=الله يقلعهم ومن يحترمهم
الصاد صاب المسلمين انهاري=وأصبح بلانا بين بائع وشاري
ما عاد من يقرأ صحيح البخاري=وأهل النصائح بعضنا ينتقمهم
الضاء ضربنا لك مثل يا مشاكس=يا للي تبي تمشي طريق معاكس
في غير دين الله لا لا تنافس=واحذر تطيع اللي عملهم هدمهم
الطاء طوينا صفحة الجيل الأول=واليأس حول والأمل قد تحول
والفكر من كثر الوساوس تهول=وضيوفنا ما جملوا من عزمهم
الظاء ظهر في مجتمعنا بلاوي=يا الله يا ربي عليك الشكاوي
يا من بتدبيرك تزين الهقاوي =تنصر هل السنة وتكشف غُممهم
العين عمر الظلم ما فاد ظالم=يا كل مظلوم ترى الله عالم
واللي نجى من ظلمة الكفر سالم=والظالمين الله يخيب مهم
الغين غاب النور وأطفوا سراجه=ناس على مبدأ ونهج الخواجة
ضلوا طريق الترمذي وابن ماجه=وإمهم من قدموا في قممهم
الفاء في الدنيا علوم عجيبة=وجنادريتنا من أكبر مصيبة
من ينكر المنكر نجره غصيبة=ونقدس الفساق واللي دعمهم
والقاف قال الله بمحكم كتابه=الواحد اللي ما خسر من لجابه
إن الذي يعصاه يلقى عذابه=وأهل المعاصي رب خلقه شتمهم
والكاف كافي يا خباث الفعائل=با كل من عن هدي لسلام مائل
هذا كتاب الله خير الدلائل=والناس غير افعالهم وش ظلمهم
اللام لو ترجع سنين قديمة =عادت لنا ذيك الخصال الكريمة
والمعتدي نسقيه كاس الهزيمة=وأعلامنا ترفع ويسقط علمهم
الميم مدري يا عرب وش هدفنا=في ديننا بالله لو ما وقفنا
إذا اتفقنا بالسريع اختلفنا=وكبارنا ضلوا وضاعت شيمهم
النون نار الحرب شبت وثارت=وإيران بالتحريش قامت وغارت
بين الطوائف فتنة الشر دارت=والغرب فينا قد تربا صنمهم
الهاء هجرنا القدس بيد المعادي=اللي من أعوام علينا ينادي
ويقول يا حكام كل البلادي=والمشكلة غطا عليهم صممهم
الواو وين اللي يقيم العدالة =ويحكّم المصحف على كل حالة
ينصر اسير من يشوفه رثاله=يا خادم البيتين حرك هممهم
الياء يقول اللي ثمتل بقافه=يا وين عصر الدين عصر الخلافة
راحت معالم ديننا يا حسافة=وأهل الكرم راحوا وولى كرمهم
ألفية ألفتها للعروبة =من قبل هذا الدين يدني غروبه
والشر يتكالب وتكثر لهوبه=واخيارنا يفنوا ونبكي عدمهم
صلاة ربي عد من زار بيته=على النبي اللي حشى ما نسيته
وعلى الصحابة كلهم وآل بيته=اللي من التدليس ربي عصمهم