**( غريــب .. الدار )**

بسم الله الرحمن الرحيم
تقبلو مني هذه المشاركة .. والتي تصف حالي فترة من الزمن

أبدا بذكر الله قبل نظم الأشعار=يا من جميع الكون ينصون داره
ثم الصلاة على النبي خير مختار=عداد جمع الناس في كل قارة
أبدي بشعري سر خافي من أسرار=هم ٍ بوسط القلب طال إنتظاره
لا تحسبوني عاشق ...الليل سهّار=والاّ محبٍ وصل حد إنتحاره
لا .. والذي نجا خليله من النار=درب الهوى مالي عليه إقتدارة
يا عزتي لك يا غريبٍ بلا دار= وإن كان له دارٍ فيا ضعف داره
يمشي ذليلٍ الراس بالهون صبّار= وش حيلةٍ تحميه غير إصطباره
يقول أبمشي جانب الحيط وجدار=يقولون يسلم من يلازم جداره
يمرض . ويشفى . ينّكب ما حدٍ دار=ولا صديقٍ مخلصٍ راح زاره
ولا يزوره فايت الناس والجار= والجار وقت الضيق يحمي لجاره
ما لقي في الغربة سوى الذل وصغار=كلٍ نظرعينه بعين إحتقاره
وش ذنبه إلّي قد تجناه وش صار=ما حد بيرضى من غريبٍ ضراره
ما غير ربي قدّر الكون بأقدار=والّي مقّدر صايرٍ بالجبارة
يذرف دموعٍ جات من ضيم وأمرار=يتحمد الرحمن هذا إختياره
يشفي جروحه بين هاجس وتذكار=تارة تداوي هم وتزيد تارة
يذكر زمانٍ كان يامر ويختار=في ديرته مطلق وشباب ناره
له المعزة وافية وله مقدار=يبقى عزيز المجتمع من كباره
كريم في طبعه وللضيف نحّار=والشعر في مدحه بيبني عمارة
يذكر دياره لا لفا الغيث وأمطار=والسيل يجري هاديٍٍ في مساره
يذكر زروع النخل فيها والأشجار=والتين والرمان يقطف ثماره
يذكر تراب الإرض فيها والأحجار=ولاّ الفلا يا كان محسن قفاره
يذكر ويذكر ويش يذكر من أذكار=ما غير زوّد وسط قلبه جماره
فقال والله ما عد أقعد بذا الدار=باهجر ديارٍ ذللتني هجاره
وأروح من وقتي على الخط سفّار=والّي يشوف الضيم يحكم قراره
يا ليتني بدرت بالعلم بدّار=وأروح لأهلي مسرعٍ في الغمارة
وإن قلت به رزقي فلاني بمحتار=ينعاك يا رزقٍ بضيم ومرارة
في قصته يا ناس ماني بعبّار=ولا قدرت أرد له إعتباره
لكن هجوس الفكر تاتي بالأفكار=والّي بدا بالدرب يختم مساره
لكني أطلب منكم العفو وأعذار=قبل القلم بيدي يخلص حباره
والف الصلاة على النبي خير مختار=عداد ليلٍ ينجلي به نهاره

وسلامة الجميع

كلمات تخرج من قلب ملي با الحب والمشاعر ....

قلب ينزف الحاناُ ويعشق كلماتاُ ....


مشكور على المشاركه ...

مشكور يالأمير الإصطناعي على التعليق الجميل والمرور العطر

تقبل مني خالص الشكر والإحترام

ابو عابد

احساس جميل
وكلمات عذبه

وطيف رقيق

وكلمات رائعة

تقبل تحيااااااااتي

يشفي جروحه بين هاجس وتذكار= تارة تداوي هم وتزيد تارة

.
.
.

رائعة ..

قصيدة رائعة ..

تحوي الأصالة والجمال ..

ورائع ما نثرتهُ من إحساس جميل هنا ..

شكراً لهذا الرذاذ الهادئ على القلب ..

.
.
.

والف الصلاة على النبي خير مختار= عداد ليلٍ ينجلي به نهاره

.
.
.

وعليهِ أفضل الصلوات وأتمّ التسليم ..

صح لسانك أخوي وبانتظار جديدك يابوعااابد ..

وأرق الورد ... لك منثووووووور ..

اختك العناااا

الأخ العزيز :سعيد بن عبدالله
مشكور يالغالي على تعليقك الجميل ... ومرورك العطر
ومرورك على القصيدة شرف لي ولها

تقبل مني خالص الإحترام والتقدير

أخوك المحب : أبو عابد

الإخت العزيزة : العنااا
تسلمين يالغالية على تعليقك الرئع ومرورك العطر
وهذه العبارات الجميلة منك شهادة أعتز بها وأفخر
أتمنى لك التوفيق

أخوك : أبو عابد