علوم الحيا والطيب تجبرك للترحال

علوم الحيا والطيب تجبرك للترحال
وانا مانويت أشد لكن نويت أنهل

لما ثار بركان المعاني بطيب الفال
نقيت الجزال وصافي الفكر قال أزهل

على مايقال بسابق القول في الأمثال
جزيل المعاني عادها في الشفا تبهل

توكلت بالله والله اللي يسد الحال
هو اللي يخلي كل صعبٍ علي يسهل

تقهويت من دلة هل العرف لي فنجال
ولكن خصيمي لي جهل حالفٍ أجهل

بيوت النقا والعز فيها ذرى وظلال
بيوت العطا لي شح وجه الزمن مدهل

بيوت الكرم والطيب ماهي تحسب المال
خيول الظفر لي ثارت المعركة تصهل

مادام المراجل عصبة الراس للرجال
وميزانها بين المطاليق مايجهل

عسفت الذلول وسقتها والدروب طوال
وعيني لها نظرة وعد الوفا منهل

وميض البروق يشدني والهجوس ثقال
كبار العقول تردني قبل ماتذهل

ولكن تحطم مركب الصبر دون الجال
وموج المعاني في عباب الفكر يقهل

سنة وأختها والشمس حجبت ورى غربال
وعين اليتيم تدور النور لكن!! هل؟

تشوفه وهي ترمى من العم قبل الخال
ولا عادها من سامعين الندا تمهل

اسولف معى نفسي ونفسي لها منزال
مع اهل اليمين اللي على المرجلة تدهل

بني عمرو من دار الصباحي غلاكم طال
رفيع السلوم وراية العز ماتجهل

لكم في رقاب المجد صيتٍ هدم الأهوال
هل السمعة العليا وللطيب صرتوا هل

ياروس الجبال الشُم يامصنع الأبطال
ياريف الضعيف بساعةٍ شوحها يصهل

من السابق المعدم تسوقون مال وحال
وفي الحاضر النايف لكم فزعةٍ تذهل

عوارف بقول الحق ميزانكم مامال
لما صعبت الحجّة ونقلت لكم تسهل

يامنصى الركايب يوم زبر الضعون ثقال
جميع الأمور الكايدة صوبكم تضهل