وين الصديق اللي على الشف والكيف ! ! !

وين الصديق اللي على الشف والكيف = اللي ليا شفته جروحي براها
في ساعة الشدات بايدي كما السيف = كل الهموم اللي بقلبي جلاها
رفقته لي عزْ ومهابة ْ وتشريف = والنفس في قربه يجيها غناها
ياحيف من بعض الرجاجيل ياحيف = اللي على حكم المصالح ولاها
لاصار مستغني يجيب التصاريف = ويصد عنك ويبتعد ويتلاهى
ماعنده استعداد يلحقه تكليف = حتى لو اصحابه تسايل دماها
ولاصار يبغى منك خدمة وتسليف = تنقط لسانه عسل من حلاها
ويجيك باغلى المدح واحلى السواليف = ويصيّـرك نجم رقى في عُـلاها
واذا قضى حاجته ولـّـى ولاشيف = ياليش يرجع بعد ماهوقضاها؟!
هاذاك مثل البارق اللي برق صيف = سحايبه شحت علينا بماها
مكتـّـفٍ عن طيب الافعال تكتيف = نفسه خبيثة موتها هو دواها
لاصار ماينفع رفيق ولاضيف = يالعنبو رفقته واللي شراها !