ونتي ونة عزيز اصبحت نفسه ذليلة

ونتي ونة يتيم ٍ مالقى له من يعيله=بعد موت ابوه وامه ضيّعه عمه وخاله
مالقى غير الشوارع تحتضيه بكل ليلة=يمسي بجوعه وهمه مالقى حي ٍ سعى له
ونتي ونة عزيزٍ اصبحت نفسه ذليلة=الليالي غيّرت به واذهبت حاله وماله
لين صار يمد كفه يطلب اليد البخيلة=ماطلبها لاجل نفسه وده يأكـّـل عياله
ونتي من زود هم ٍ ما آحدٍ يقدر يشيله=لوتجي كل الخلايق والله مافكت حباله
هم ٍ ادركني بثقله لين ضاعت كل حيلة=هم ٍ اكبر من صحاري (الرُبع) واكثر من رماله
والله انه مابقى لي في الخلاص اية وسيلة=إلا موتٍ مايؤخر مايريحني بداله
كان باقضي العمر كله بين همْ وبين ويلة=خلني ارتاح مرة ومن فقدني فالعزا له