مــا طاب جرح اللي هوا بنت الاجناب ** لوحبته يظهر من الناس حجير

هاذا بلى الحب وبلى ابوك ياعقاب **كان المحبه ذنب فالبعد تكفير

في ساعة ماكنت حاسب لها احساب ** ما كنت احسب ان اللذي صار بيصير

تدري وش اللي يكسر قلوب الاحباب ** حكم القدر لا قال لفراقهم خير

صدمة وجتني والزمن كشر انياب ** والوقت تكشيره ماهوب اي تكشير

يا قلب لا تشره على كل من غاب ** من راح من كيفه يجي دون تبرير

جاني من اللي كنت احسبنهم اصحاب ** شين عجزت ألقى لهن ضقت تفسير

والخاطر المكسور يا عذالي طاب ** والوقت ما قصر محى كل تأثير

والمخطي اللي من كثر ماخطى صاب ** يشفع له إن لا وقف وقفته غير

واللي يعيش بديرته عيشة اغراب ** يقطع على شان المعزه مشاوير

يا ساحة الغاوين يا قل الالباب ** وما كل طير لا كفخ يقدر يطير

ما أقول ما فيكم رياجيل واشناب ** اميّز الشعار بين الشواعير

ناسن تدور للقب بين الالقاب ** وواحد من الالماس شعره قناطير

وإحدن بماله يكسب إعلام وإعجاب ** مثل ما قالو يدهن السير ويسير

مثل المنيحه بين تسعين حلاب ** ومافيه احد يكره حليب المصاغير

أو مملكة جوها طواغيت الارهاب ** وسوو لهم مع زحمة الناس تفجير

وحنا نكافح والامل ما بعد خاب ** حتى ندمرهم من الشعر تدمير

وإن كان راحو بين ميت ومنصاب **دون السعر ناقف صفوف وطوابير

وكلن معه شلفا ولد غانم ذياب ** من شان لا يصلح لاخطاء تكرير

ويبقى فقط شعار عراب كتاب ** ناسن ما يلحقهم فالابداع تقصير

اقولها صادق ولانيب كذاب ** الشعر ميراث الجدود المناعير

وأنا حميته من مفسد وخراب ** وأعسف بها العاصي واسخره تسخير

يا كم حرقت اعصاب وارتاحت اعصاب ** موتو قهر يا شلة عوير وصوير

ما ضاع حق ومن ورى الحق طلاب ** وسود النوايا من طرفنا مغاتير

وكلن على قده يفصل له ثياب ** وكلن على قدره يقدر بتقدير

واللي يبى القمه ولا يبذل أسباب ** ينبح ليا شاف القوافل على السير

[youtube]http://www.youtube.com/watch?v=3jMxRMWHq50&feature=related[/youtube]