سهرت أدوّر ألحان القصيد ونمت ما غنّيت
............................ ملى صوتي شجَن وأفلت لساني حبل تعبيره
حرمت الجفن من طعم النعاس ورحت ما خلّيت
............................ لشعري .. غير حلمٍ من عرفته صعب تفسيره
يا عجز البيت قم داو الجروح اللي فصدر البيت
............................ أبيه يطيب بأعيش الشعور بدون تأثيره
تعبت أحايل إحساسي يفارق صمتي .. وملّيت
............................ ما أبي للشعر سيره دام مالي فالهوى سيره !
حبيبي لا بكيت من الوصال اللي مضى وأبكيت
............................ غرامٍ ضايقه حزن الفراق وشلّ تفكيره
تذكّر كل موعد جبت لك شوقي معاي وجيت
............................ وتذكّر كل غيبه بيننا لو كانت قصيره
وتذكّر كل نظره من عيوني يوم قلبي ميَت
............................ وتذكّر كلمة [ أحبّك ] بخوف ودهشه وحيره ..!
أحبّك كثر ما سوّيت نفسي ما أعشقك وأخفيت
............................ كلامٍ ظاهره شوق وهيام وباطنه غِيره
أحبّك كثر ما حاولت أشتت وحشتك وأزريت
............................ وأحبّك كثر ما سرّاني الشوق فمشاويره
وأحبّك كثر ما شيّدت لجروحك فقلبي بيت
............................ وأحبّك كثر ما أخلصت لغلاك .. وكثر تقصيره
بغى قلبي يفضفض للزمن عن وضعه .. وعييت
............................ أنا عاشق ليامن ضاق صدره \ صكّ أزاريره
أخاف يلاحظ الفرقا بوجهي عاذل إن مرّيت
............................ وتكبر ضيقتي من عالمٍ في عيني صغيره
عطيت الحب قلب ونبض صادق بس وش سوّيت ؟
............................ عطاني الحب هجرانك وبُعدك لا كِثر خيره !
يا ليت الحب ما يرسم فعيني وجهَ من حبّيت
............................ عشان إليا رحل عنّي حبيب .. أحب لي غيره