هلا يا مرحبا بك بين ربع لك نظاف نفوس = إذا جاهم نظيف القصد قالوا مرحبا حيه
تشابهم سيوف وإن بدأ الصايح تبيد الرؤس = وأنا منهم ولكن زايد في الرآس جنيه

عزيز وغاليٍ وأسمك يناسب غالي الملبوس = وعندي يا عزيز القدر مقطوفات شعريه
أنا شاعر ولي خبره على الصخري مع المنكوس = ولاني عجزٍ عن وزن بيتين وقافيه

كشفت الفكرة اللي شكلها قوس مقابل قوس = وفي المضمون معروفه كتابتها أنجليزية
وذاك الذيب يالصاحب تراه اللي بلع له موس = وضاعت هقوته وتخالطت هذي مع ذيه

تريث يا وسيع المعرفة لا تطفئ الفانوس = ترى الفانوس بين يديك وأحذر ينطفئ ضيه
ولا تظلم خبير من العرب ما يحمس المحموس = ومقداري ومقدارك رفيع وفيه ماريه

ترى اللي جاب لك الأخبار شكله واحدٍ دنفوس = يغير واقع الشاعر بمعلومات وهميه
ولو تسأل عنه يا صاحبي تلقاه من الهندوس = غريب الشكل والتفكير واللهجة يمانيه

أنا شعري شهاداتي وعندي واقعٍ محسوس = ولكن في البشر تلقى لي أصحاب ومعاديه
ولا لك غير دارك والسعوديه بلد محروس = حرسها الله من فضله وتبقى دار محميه