للعيد فرحة في عيون أكثر النـــــاس = وأكيد بعض الناس ما يعرف العيد
معروف يوم العيد تتعارف أجـنــاس = لكن أنا عايش مع همومي وحــيد
هذا شعور داخل القلب وإحســـاس = ما هو كلام ينثره زيـد وعــبــــيد
والعيد مر وصاحبي زوّد الــبــــأس = والمشكله ما قال لي عيدك سعــيد
أنا بعد فرقاه في حال هــــوجــاس= يزيد هوجاسي وأنا جرحي يــزيد
ولا تجمّل دز لي منه قــرطـــــاس = رســـالةٍ حلوه على قلبي تفـــــيد
ولاّ رفع لي هاتفه وأقعد الــــرآس = اللي كلامه يذهب الهم ويــبـــــيد
في بعده أصبح ضايع الفكر منحاس = وإذا حضر تسمع لطيري تـغــــاريد
وهذي حياتي بعدما صابني اليـأس = أنا بعيد ومن عشق قلبي بـعـــــيد
وأنا أطلب المولى يرده على أســاس = أعيش أنا وإياه وأعيد ويــعــــــيد