كل مالد طرفي شفت انا أزوال وأزوال=وكل زولٍ اشوفه قاصرٍ عن مزاياها
وش بقى بعده ألا قلب وحطام وأطلال=وكل ماقيم صدعٍ ينهدم من بناياها
ومابقى غير عطر وساعة الكف والشال=ومنديله اللي حضن دمعه وحمرة شفاياها
والقلم وسط جيبي والهدايا وجوال=كان أخر هديه جاتني من هداياها
وذكرياتٍ معها كلها احلام وآمال=ترسم الفرح بسمه ضحكةٍ من ثناياها
ودمعتين ٍ بعيني وسطه الهم يختال=ودمعتين ٍ بعينه مأرتوت من ضماياها
كيف أبحيا حياةٍ عقبها حرب ونضال=وكيف أبسلى وانا أذني ماتردد حكاياها
آآآه ياوقتى اللي بدل الحال من حال=بعد ماني طليق ٍ حاصرتني زواياها
أستفز الليالي وأشرب المر فنجال=وأسمع الوجد يصرخ من أقاصي حناياها
وين قمرا زماني غبت ياطيب الفال=أشرقي يالليالي بالبهاء من حلاياها
صاحبي غاب عني وشلت انا الزهد رحال=ليت رجلي تدله لو تعثر وطاياها
واسقى الله زمانه في ندى الورد لامال=يوم عطره يفوح بنفحةٍ من شذاياها
يوم انا والحبيبه نجلس أثنين بأقبال=خيم الصمت فينا والنواظر مراياها
وأختمه في رجاء الله ساعةٍ قرب ووصال=أكحل العين باللي صادقه في نواياها