كم واحد(ن) طلّعت في راسه الشيب = تضحك بوجه يحسب انّك حبيبه
يا مدّعي بالعزّ كلّك عذاريب = ماتدري انّ الشخص يذكر بطيبه
مثلك يغرّ النّاس والله تعاجيب = من كنت حظّه والله طايح نصيبه
مادمت ما تدرا الملامات والعيب = مثلك نبيعه نرخصه وش نبيبه

رفعت نفسك تحسب النّاس من دون = تبي لهم حقران هذا مرامك
روح روحة اللّي قبل عامين مدفون = اللهّ لايرحم بقايا عظامك
غيرك لقينا ينعش الروح مزيون = لو شفت زوله ما تهنّى منامك
وشلون تعمل كذا بالله وشلون = ماتعرف التقدير مدري علامك

أظنّ تحسب أنّ حبّك ذبحني = وصدّقت من قال أنّك انسان مغرور
غيرك نصب لي بالهوى ما طرحني = اللّي جبينه مثل نور(ن) على نور
هذاك فعلا لو بعينه ( شبحني ) = أمّا انت يالمسكين ماغير مقهور
هذاك حبّه بين ربعي فضحني = لو شاوروني فيه ماطاوع الشور

والله إن القمر لاغاب نوره يغيب=والليالي بلاه اقسم ترى موحشه

حنا بلانا من خدوش الرجاجيل= اللي عن الزلات محدن يرده

رح يمّ ربعك مالنا فيك صالح = واشره على اللّي يتصل فيك ويجيك
من رافقك يا ذاك ماهو بفالح = رح يا دلع شنهو يسوّي تحدّيك
نسقيك يالمغرور من بحر مالح = وان كنت متحدّي تعال او نوريّك
الله خلق في الناس صالح وطالح = الاّ انت هذا حاضرك مثل ماضيك
واعطاك ربي للحيا وجه كالح = والطيب متعدّي جنابك ومخطيك

الصبح باحت طلته كل الاسرار = نوره كشف ماكان في معطف الليل
بانت مقاصد كل كاذب وغدار = جتني علومه قبل تجمع بهالخيل
ولم معاميل الغلا واضرب النار = يحسب جميع الكيف في نكهة الهيل
الهيل غالي فوق عن كل الاسعار = انشد عنه من يعرف الوزن والكيل
لا التموا اهل الكيف بالليل سمار = تزهى دلاله والشرف للفناجيل
الهرج واجد ينقله كل ثرثار = وكل(ن) بكيفه يتبع القال والقيل
ماجيتك اطلب زود هيبه ومقدار = ولا جيت ابي للي جرى منك تعليل
الله غني لاتكلف بالاعذار = خلك بغبك واتبع الكيف والميل
عش حاضرك مرتاح ليّاك تحتار = الوقت يضحك لك خداع وتمثيل
باكر تدور ازمان نسمع بك اخبار = نهايتك مكتوبه في المقابيل
ماهو مهم اني كتبتك بالاشعار = حرفي هديه صدق جيل(ن) ورى جيل
الحمد لله لاخطيه ولاثار = ماطلتني لو طاولت يدّك سهيل
انا عربيه جد من نسل الاحرار = والعفو شيمه من بنات "الرجاجيل"..

عجايب شفت بالدنيا عجايب = تشيب الطفل في سنّ الرضاعي