سيل(ن) وليل اجعود هلّت على امتون = لا هزّها قلت احمر الموت جاني
صفّت رموشه جيش قاده نابليون = لكن سلاح اعيونها شكل ثاني
رعبوب مسلوب الحشا مثل عرجون = اخر ليالي صوم شهر ارمضاني
ومبسم ليا تبسّم به الدرّ مكنون = وجسم(ن) تعطّف كنّه الخيزراني
اخفض جناح الذلّ ياقلبي المفتون = للناعمة سيد كلّ الغواني
واعلن خضوعك وانت راضي ومنون = اسير حبّ (مخضبّات ) البناني
نسيت عصيانك وسلّمت لعيون = فيها بحار(ن) لك وفيها مواني

انا كرهي خبال .. ولا عشقت اعشق بعد بخبال = ولا اعرف الوسط بين الحلول ... وذي طبيعة نفس !!

ألا ياليت خلّي حاضر وشاف = غزير الدمع يشهد باليقيني
دموعي عقبهم ساف(ن) على ساف = تلاطم كالبحر من موق عيني
ذبحني بالموّدة زين الاوصاف = عليه القلب ولهان(ن) حزيني
ألا ليت المحبّة جات بانصاف = قسمها الله مابينه وبيني

يا أمير و يا حـشـيم ويا كريمٍ في حلاك=يا غـزالٍ قـد حـجـزت الورد كلّه بوجنتيك
ويا عيونٍ لا تحرّك رمشها تهت بـغـلاك=كن كـل الجـاذبيه تمـتـحـني بـس فـيك
أشهد أن السعـد كلّه قد تغيّم في سمـاك=وليت يا غـيـمٍ أحـبه تمـطـر اللي يستقيك
كل ما ليلي تهادى غـلّفه صمته وجـاك =لين له تعـزف بهمسك نغمة الحـب الشـريك
لك أغني كـل شـوقي لي تمنى ملتقاك=وأشهد أن الشـوق كلّه جـل هـمـه يلتقـيك

ساعة نظرت الزين والزين ملموم=جوف العباه وطرحة الوجه مافيه
الوجه مثل البدر والبدر محروم=خلي يزيد عليه بعيون تحليه
والجسم غصن البان والخصر مزموم=يابخت ثوبن فوق جسمه يغطيه
ساعة نظرته صوب القلب بسهوم=سهم خلج قلبي وزود مداميه

والقصيدة كتبناها بماء الذهب = وافتخر في قصيده نالت اعجابها
( غالية ) لو ذكرناها لحقنا عتب = والأمور الطويلة ينفتح بابها
بنت ناس(ن) يغالوا بالحسب والنسب = نارهم حاميه يا ويل شبّابها
ناس يطول شنب معهم ويقصر شنب = ( والملامات ) انا ماني بجلاّبها
(بس من حقّي ) اكتب في جمال العرب = مركزه في محاجرها وباهدابها
والتهب واهجه في خدّها واحترق = (والحسن ) كل خيط(ن) به ( تلوّابها )

كلكم يعني تحبوني وانا ما احبكم=يعلم الله حبكم جاء فوق ما تتصورون!
ويعلم الله وسط قلبي جمعكم=مايجيه النقص وأنتو تحلمون
أنزرع في داخلي حب(ن) لكم=إن سقيته عاش وأنتو تزهرون
الزمان إن طال بيني بينكم=لازم الفرحه يغطيها مزون!

علامه قسى قلبك عليّه يوم قلبي رقّ= وطال الزعل بيني وبينك وباركته
كسيتك ثياب العزّ سندس وأستبرق = وطاولتك اللّي طول الايام ما طلته
ولمّا شعرت انّي يقيــ(ن) بديت اغرق = حسب ماترى او حسب ماتصوّرته
علامك قطعت الحبل بي في محيط ازرق = ونجّاني الله عقب ما الموت صارعته
برودك دليل انّك تريد ( الفتى ) يحرق = وكلّ الذي بينك وبيني تجاهلته

أرفع الغشوة عن الوجه المنير = جلّ من صوّر جمالك يا ملاك
لا تورّيني الهوى توّي صغير = ولا تمشّيني على درب الهلاك
لاتعلّمني على الغيره واغير = ولا تقول ابعد ويمكلني سواك
خلّني جاهل الين اصبح كبير = واتجاهل زلتك وادمح خطاك
يا شذى يا ورد يا مسك وعبير = بعد رجو الله عايش في رجاك
تصبح المسؤول لو عقلي يطير = ماترى قلبي يحلّق في سماك