تبي تعرف الخنبقه اللي تصير في العروس ... تعال فيـــذا

[جبل حرفه]

يالله انك تحيي هالفيوس المنوره ( الفيوس جمع فيس وهي بمعنى خشش ) ... اليوم عندي خنبقه مدري وش تبي وحطوا تحتها خطيــــن يعني اللي مهوب فاضي تراهم يمدحون الديليت

موضوعنا اليوم عن الزواجات و العروس و البربسه التي تسبقها و تتلوها .. أما عن البربسه التي تسبقها فتبدأ فور وصول كرت الدعوه عند المدعوه .. أول ما تدري الأم انها معزومه هي و بنتها على زواج تقوم تسحبها ( انتي يالام ) من مرقدها ( انتي يالبنت ) و تطير بها على أقرب ورشه والا كوفيره تصنفر خشتّــا قبل العرس ... بس مهوب ل الله والا حبا في بنتها ... لا و ألف لا ... بس عشان تبي ترزها عند ذا العجز و يشوفونها الحريم و يخطبونها ... عاد تدخل على الكوفيره ... و تبدأ مرحلة الصنفره ... ياما تنتف في ذا الحواجب تقل كنها سعفتين متشابكين ( مع انه حرام لعن الله النامصات و المتنمصات بس من اللي يسمع ) والا تمصع في يدينها و رجولها و هي تشيلها ( والله نشوف بنات يديهم أشين من يدين الرجال من كثر الشعر اللي فيها غابات استوائيه تقل ما عمرها سمعت بالحلاوه المهم ما علينا ) بعدها تبدأ مرحلة فرد العراده أي فرد الشوشه أو بمعنى آخر فرد الشعر ... تلاقي شعرها عرادة شاقصه شامخه منتصبه فوق رأسها و كأنها برج المملكه وفي هذه الحاله يجتمعون 3 فلبينيات على الفريسه ( اي البنيه ) ياما يمعطون وياما يجرون ... ثم تبدأ مرحلة المساحيق ... تجي وحده تمسك فرشة تلوين بيد و اليد الثانيه فيها علبة ألوان و هات يا شخبطه على وجه البنيه ... تطلع الفريسه من عندهم و حسابها الشيء الفلاني و خشتّـا تقل بهلوان أو مهرج و فوق راسها شيئون يقال له تسريحه وهي أشبه ببرج الفيصليه تلاقي وحده يقالها الحين مسويه تسريحه على الموضه والا شي فارقه شعرها من النص و كاشفه عن طريق صحراوي في الوسط و أنواع التوكات و المشابك و البكل تقل بسطة مساويك

الين تصير على قولة الشاعر

شي ما ينشاف شيف لجل الاول والوصيف

طبعا المقرود اللي امه بتشوف هالبنيه
وتخطبها لولدها

[جبل حرفه]

طبعا بعد الخنبقة اللتي ذكرت سابقا
تعالوا شوفوا قاعة الافراح الله لا يوريكم


تدخل البنيه لصالة العرس شايفه روحها شي و نافختن ريشها على ايش يا حسره على برج الفيصليه اللي فوق راسك والا على الجسم اللي تقل ثلاجات ال جي ... والا الفستان اللي مدري وشلوون دخل بس شكلها مدخلته بالغصب بفازلين والا كريم

بس تعالوا شوفوا الحش اللي يصير هناك ... قسنب بالله ماغير يقطعون في جلود بعض ... نوال تلتفت على عبير و تقول

نوال : عبير شفتي نوره ايش لابسه

عبير: لا وش هي لابسه

نوال : يووه يووووه بسسسرعه التفتي لا تفوتك شوووفيـــها

عبير تلتفت تطالع بعدين تقول

عبير: يا ويـــــلــــــي لابسه فستانها القديــــم أيام خطوبتها ... يا حرااااام

( وش دخلــــكم طيــــب فستان خطوبتها والا فستان شغالتهم هماها راضيه وواثقه من نفســـها ) ... حوار آخر يدور بينهم

عبير: نوال لا تفووووتك البنت هذيك شوفيها وش هي لابسه

نوال : يووووه هذي فلانه الفلانيه ... وش ذا يا خزيااااااه كل ظهرها طالع شوي و تبان ( طوووووووط ) عاد يقولون أبوها امام مســجد

عبير:ايه هذي حالتهم ذا المطاوعه خيرهم لغيرهم و بنته والا اخته تلاقيها .. الله يستر علينا و عليهم بس ... الله لا يبلانا يا شيخه

و تلاقون عبير و نوال نص صدرهم طالع و عادي ما يخالف بس أشين شي اذا شفت بنت ظهرها طالع و دبــــه أحس تعذيب و تحوم تسبدي ... يعني اذا بنت نحيفه و جسمها حلو وش حليلها .. على الأقل أهــــــون مما اذا جتك وحده ظهرها متسفط مدري كم عشرطعش سفطه ( يلعن أم الثـقه اللي خلتها تلبس فستان بالشكل هذا و بالجسم هذا ) لا و احمدوا ربكم بعد ان معظم بناتنا ما يلبسون قصيــــر والا كان راحن فيها هم و كربهن السوود لوول

ننتقل بكم الآن إلى المنصه أو البست و هو مكان تحت رجول الطقاقات و انتوا بكرامه .. يجلسون فيه البنات اللي ما بعد أعرسن وماغير يترززن عند العجز .. أول شي تغني الطقاقه ثمن ( بمعنى بعدين ) تلاقي كل البنات قايمين يرقصون والله ما تلاقي مغز ابره .. والله مايدرون وش الاغنيه هي راب والا جاز والا فصحى والا مايكل جاكسن .. أهم شي كل مكان فيه وحده ترقص .. و ليتها وحده والا ثنتين بعد كان نسكت بس تلاقي أربع والا خمس بنات يرقصون مع بعض يعنني شلــتي ... والله من زين الرقص بعد

يا تلاقيها واقفه من الزحمه والا تدور على الحلبه تقل ظايع لها شي

والا تجيك وحده تسمع بشي اسمه رقص ما غير ترجرج كنها غسالات البابطين ... تخلص اغنيتها عاد يهجدون البنيات شوي ثمين ( انظر ما سبق ) يبدا شوط العجز يجون يرقمون عيني عينك

العجوز : ماشاء الله تبارك الله .. أقول من انتي بنته

وهي تمعط شعر البنيه عشان تتأكد هو صدز والا تركيبه

البنت : أنــــا

العجوز : لا العجوز اللي جمبتس ... ايه انتي أجل من

( هالعجوز أخلاقها رايحتن وطــــي )

البنت : معليش يا طنط شوفي مامي هناك كان ودتس ترقمينها

( لعنبوا الدلع لين جا في شين غلـــط )

[بنوتي]

تسلم اخوي جبل حرفة
بس جنه حاطط ع البنات وايد

[ابو امجاد]

الأخ جبل حرفة
ويا سعد من يتكي على جبل

الا
قلي
كيف يجتمع خنبقة وفيذا
وبعدين الزعل ممنوع تكفى يا جبل حرفة
اتصدق اني لما اذكر جبل حرفة في الليل اقول حرزي الله ، الله يحرصني
مدري ليه بس اصبحت عادة
وبعدين وين شفت كل الصنفرة والمعطة والأشياء الثانية الي قلتها. ترى ياجبل حرفة فيه اشياء اكثر من كذا. و اقولك نكته، واحدة قالت لزوجها سويتلك مفاجأة اليوم عند الكوافيرة قال زوجها وش هي
قالت بعدين عند النوم اقولك اياها
لما جاء النوم سئلها عن المفاجأة قالت نتف ..... عند الكوافيرة قال انت طالق. ويا تعب مالك خلف

وبعدين تدري ليش كل هذه المعطة والصنفرة والبهذلة والبربسة وضياع الفلوس
علشان حضرة مثلك وشرواك (وانا معاكم ترى) اللي ما يملى عين بني ادم الا منثلة تراب
منثلة معناها باسكت
اما الي بعد البربسة ( بعدين ارد ان حصلت على فرصة)
سي يو ليتر يا هرفة ماونتين

[صالح آل سلمان]

هذا الانسان كان ومازال يستهويني بكتاباته الممزوجه بالسخرية وتجد في لبها نصائح رائعه0
رفع من قبلي احتراما لذلك الشخص الخلوق الذي يعد من القلائل في طيبة قلبه
فتحية عطرة لك اخي علي0
اخوك ابو عبدالله

[العاقل]

المصيبة يغافل لك الله إحنا متمرمطين بالشوارع وإن خطبنا عى طول أنطردنا والله كنا جربانين والمشكلة ننطرد على شيئ فاضي
هذي تقول ماهو حلو
وهذي تقول خشمة طويل
وهذي تقول راتبه مايكفيني
وهاذيك تقول وانيتة قديم
والله لو إني بتزوج ملكة جمال الكون
وبعدين إن وافقت وحدة وبعد تعب على هالخشة تلقاها زي ماتكرم أخي جبل حرفة كلها غش بغش
وإحنا ياغافل لك الله



من جد القانون لا يحمل مغفلين