اعز نفسي

[صمت]

المجلس اللي فيه نمه وغيبه
ماني بمجبور على جلسة فيه
لو اجلس لحالي براس الجذيبه
بارضٍ فلا عجه تتابع ذواريه
اخير لي من مجلسٍ ما اهتني به
ماغير قيل وقال هرجٍ ما ادانيه
الله ولا عرف الردي ويش ابي به
اللي علي يمن فنجال شاهيه
اعز نفسي ما رضيت الغليبه
اموت وافنى ما لحقني مشاريه
ومن لا يعز النفس يبشر بخيبه
كرامته تنداس لو هي برجليه
وعز الرجل نفسه ترى مايعيبه
عزه لنفسه يرفعه عند واليه
العيب ياللي جاهل بالمعيبه
تقدير شخصٍ عدك شراك نعليه
من لا يراك الراس وش ترتجي به
من لا يراك الراس حذرا تماشيه
اترك مجال النذل لا تشتقي به
اترك مجال النذل لا عاد تطريه
محدٍِ عليه بجابرك بالغصيبه
تلقى طريقٍ غير دربه وتمشيه
تلقى مع الأجواد من تعتزي به
وقت الشدايد صاحبه ما يخليه
لامن نخيته بالليال العصيبه
يفز مثل الحر من كف راعيه
من رافق الطيب تطيب بطيبه
ومن رافق الخايب يخيب مساعيه
هذا وانا اللي مارضيت الغليبه
أحيا واموت وما لحقني مشاريه

[المسكت]

وعز الرجل نفسه ترى مايعيبه
عزه لنفسه يرفعه عند واليه

رااائع يافيصل
قصيده مليئه بالفخر والاعتزاز
وبكل جماليات المديح وقد اشتملت
على النصح والحكمه بإسلوب راقي


صح الله لسانك ولاعدمنااك
مودتي

[بن ظافر]

تبارك الرحمن الله يعطيك العافية على هــذا الا ختيار


لامن نخيته بالليال العصيبه
يفز مثل الحر من كف راعيه
من رافق الطيب تطيب بطيبه
ومن رافق الخايب يخيب مساعيه
هذا وانا اللي مارضيت الغليبه
أحيا واموت وما لحقني مشاريه