من قصائد الامير عبدالرحمن بن مساعد

[ابوفواز]

السلام عليكم ورحمة الله وبركاته :

اخواني واخواتي اعضاء هذا المنتدى الغالي اقدم لكم قصائد مختارة للامير عبدالرحمن بن مساعد

لجل أوصلك

بافارق فراقك وبأخنق عبرتي
واجرح اضمادي وأسافر لك معك
بشد للماضي وأقدم ساعتي
وأعاند اعنادي وأقودك واتبعك
باجامل أحزاني وأجافي فرحتي
وأعادي خلاني واحبك وأخدعك
بصير أنا طبعك وأنتي طيبتي
وبيحزنك ضحكي..وأهلي بمدمعك
بسامر دموعي واعزي ضحكتي
وبهدي أنا ضلالي..ضلال ياسعك
بلبس أنا ِذلك.. وقيسي عزتي
وبتصيري ذنوبي وخيري بيطبعك
باحارب في ضعفي وافر في قوتي
والى رضختي لي لموتي بدفعك
ولجل القاء بارحل وتمضي رحلتي
والى حصل شوفك بكون مودعك
أببعد وأوصلك وبسبق خطوتي
وبنثرك فيني وأنسى أجمعك
بضم أنا هجرك في قربك وحدتي
وتدلك عيوني وقلبي مضيعك
وإذا اضلمت دنياي بطفي شمعتي
وإذا كثر زادي بجوع وبشبعك
شردتي رقادي وسمعتي نظرتي
وغمضت أنا عيوني لجل ما أسمعك
صرخت في سكوتي ولمستي صرختي
وقربتي وجهك لي لجل ما أصفعك
عند الحزن تثقل خطاكي دنيتي
وعند الفرح قالت خطاكي مسرعك
قصيدتي يكفي..غبية كذبتي
حبيبتي آسف بخونك ..بس معك

[ابوفواز]

مساء الخير
مساء الخير والاحسـاس والطيبة مسـاءٍ مـا يـليق إلا بأحبـابي
مساءٍ غير غصن لطير يحكي بـه عن اللي مـسكنه جفني وأهـدابي
هلا باللي أحـبه كثـر تعذيـبه وكثر ما هـو يغيب وكثر ترحابي
حبيبي هـو ولو ما قصّـر الغيبة ولـو عن بسمتي قد طـوّل غيابي
أعـرفه زيـن وأعيتني أسـاليبه عدوي يوم ويوم أقرب من أصحابي
مـلكني بين تـرغيبه وتـرهيبه يفـارقني وهـو واقف على بـابي
به الصادق به الغـارق بأكاذيبـه يبي بعـدي ودمعـه بـلّل ثـيابي
به القسـوة به الرقـة به الهيبـة به الضعف القوي به نشوة إغضابي
هلا باللي يصيب العطـر بالريب يقول العطـر أنا زايـل ويبقى بي
هلا باللي يقول الورد وش لي به؟ من المهـدى؟ أنـا أو هو لأطيابي
هلا باللي علي يقسى وأمـاريبه هلا باللي أبـد مـا لان لعتـابي
هلا باللي عجـزت ألقى عذاريبه هلا بـاللي تـحبه كل أسـبابي
مسـاءٍ فاق كل الشعـر ترحيبه بجيّة مـن سـكن قلبي وأهـدابي
مساءٍ فاض بالاحسـاس والطيبه مسـاءٍ مـا يليـق إلا بأحبـابي

[ابوفواز]

.. تعبـت أنـزف جراحـي حبـر و أدور للألـم أسبـاب
.. لجـل أكتـب شـعـر يحكـي بعض أصغـر معاناتـي
.. قفـلت من الأسـى بابـي وسجنت الكون خلف البـاب
! .. وعـصـتني دمـعـٍة فيـهـا سـؤال لكـل اجاباتـي
.. مـلل أخبـار حسّـادي أحـد صـادق واحـد كـذاب
.. و أحـد مـا طـال تـجـريـحي و أحـد عـايش لزلاتـي
.. أنـا شـاعـر رغـم أنـف الحسـد والحقـد و الأحبـاب
.. و انـا يـا حاسـدي المسكـين بعيـد العيب عن ذاتـي
.. أنـا مـا زادنـي شعـري ولا زادتـنـي الألـقـاب
.. تجـي دنيـاي أو تدبـر عـزيـز فـ كـل حـالاتـي
.. أنـا فـرحـي لمِن حـولي وأيـامي فـدا الأصحـاب
.. قـصيـدي بـلسـم المجـروح ونبض النـاس أبياتـي
.. كسـرني قـلبـي المكسـور نادت دمعي الأهـداب
.. تعبـت أركـض ولا أوصـل ولاتـوصـلني غـاياتـي
.. أي ذلٍ يـغطـي الأرض لـك يــا رب يــا وهـاب
.. وابـي أحيـا جبـيـني فـوق مـا تمـلكني رغباتـي
.. من الدنيـا أنـا مابـي سوى عـفـو العلي التـواب
.. ويحسـن خـاتمـة فعـلي ويغـفـر لـي ضـلالاتـي
.. " أبمـلا العمر "بالتوبة" و "نوح" و "هود" و"الأحـزاب
.. متى كـانت سنيـني عمـر انـا عمري في ركعاتـي

[ابوفواز]

بهـو فنـدق

..بهو فندق
..بلد غربي
..في فصل الصيف
..على ميعاد أو صدفة
..جمع أجناس مختلفة
..ولافيهم أحد وافق
..أحد ثاني
..على تعريف للمنطق
..بهو فندق.. فيه الناس مكتظة
..فخامة تكسي الجنبات
..نادل يحمل الطلبات
..على أواني من فضة
..هنا تجار يحكوا أسهم وسندات
..هنا سمسار
..هنا شاعر.. هنا بنيّات
..هنا فلكي
هنا صاحب سمو حركي
..هنا لاعب كرة بارع
..هنا فنان.. هنا متعهد السهرات
..هنا يحكوا عن الأوضة!.. هنا يحكوا عن الموضة
..!!هنا يحكوا عن السادات
..وبركنٍ ماهو للصفوة
..بجنب الباب
..كرسيين.. حوار يدور بين اثنين
..حيل أصحاب
..ملامحهم تودّي يمّ.. شرق أوسط
..وهيئتهم.. وحالتهم.. بسيطة أو بعد أبسط
شف سايح من اليابان.. يداعب آلة التصوير -
..يغازل آلة التصوير
سايح هذا يا غلبان ؟ -
..هذا السايح البارح
..كانت صورته تحكي
..في صدر الصفحة الأولى
..يقولوا خامس أغنى شخص في العالم
..وأظن أنّه .. وربي وحده العالم
..جمع هالمال والثروة
..من استيراد أو تصدير
..نسى الكاميرا على الكرسي
لا يا شيخ.. مثل هاذول.. ما ينسوا -
صدقني نسى الكاميرا على الكرسي -
..لا والله.. رجع خذها
ظنك وين هو رايح؟ -
..أكيد يزور له متحف
..سخيف
..!هوايته أسخف
..شفه.. مستني يمّ الباب
وش ينظر -
!أظنه ينتظر تكسي
..!ركب تكسي
..أقول عدنان: فاخر حيل هالفنجان
..خذ شايك قبل يبرد
أقول أحمد: هذاك هناك.. هو من هو..؟ -
..أي واحد -
..! هذاك اللي معه واجد -
..تخطرف إنت.. أو عميان
..هذاك فلان
..هذاك اللي كلامه منتهى الحكمة
..وجوده مثل غيث السحب
..هذاك اللي لأجله ترخص أيامك
..وتقضي النحب
هذاك اللي يهينك وانت تتلقى
..إهاناته بصدرٍ رحب
..هذاك اللي شعورك نحوه مبيّن
..مزيج من الولا والحب
..هذاك اللي إذا لا قدّر الله راح
..يغطي حزنك الدنيا
!!......وتهمس.. راح ابن الكلب
كذا يا أحمد..؟
شايفني أنا.. منافق
..أنا مسمح ولا أوافق
..تظن إني بقلب أسود
..كذا يا أحمد-
..لا تزعل.. أنا آسف.. أنا آسف
..ترى الدعوة سوالف
..شف هذا خفيّف دم
..يضحك هذا .. من هذا
..خفيّف دم
..! ويعطونه
يعطونه..؟ -
..يعطونه -
..ويرجع باكر لهذا.. يقطع ذاك
..يشرشح أصله وفصله.. بخفة دم
ويعطونه..؟.. -
..! يعطونه -
..ويرجع بالأخير.. ضاحك على هذا وعلى هذا
أقول أحمد: ظنك هو رصيده كم..؟! -
..دقيقة صمت.. فرضها جيّة النادل
..يشيل الشاي
..!ويقول إنّ العصير.. اللي يبونه لحظتين.. وجاي
..شف الشاعر -
..هذيك الحلوة تضحك له
أي واحد..؟ -
..شفه واقف.. يوقع دفتر لطفلة -
..تخيّل ياخي يقولوا
..بإنه يشتري شعره من الشاعر
..! اللي الشاعر المشهور يكتب له
..ياحظه.. وسيم مشهور
..ياليتي أكون مثله -
..قوم نتصور معه
قوم نتصور معه..؟! -
..ما باقي سوى هاذي
..نكبر راس هالمغرور
..خفيف أنت.. وغبي أحمد
..ودايم فيك هالعلة
..أقول عدنان -
..ترى صاير طويل لسان
..أحمد ياخي لا تزعل.. ترانا اخوان
تعوّذ بس من الشيطان..؟
..وأنا آسف.. وترى الدعوة سوالف
..فخمة حيل هالكيسان
..اشرب.. لا تزودها
..ترى يبيّن عليك تعبان
..شف مو هاذي صاحبتك
..هلا والله.. إلاّ والله صاحبتي
..تدري..؟ تموت هي فيني
..يا رجال.. خليني -
..خادعتك.. تراها والله خادعتك
..أقول أحمد: عشان انسرقت فلوسك-
..من زبيدة
..صرت تشوف كل وحدة
..هي زبيدة
..يا عدنان.. خادعتك -
..أنا قصدي لمصلحتك
..شفها تكلم الرجّال
..أي رجّال.. أخوها ذاك
..يا عدنان.. خادعتك
..أقولك ما تبي غيري
..يا عدنان.. طع شوري -
..مشاعرها.. وهم.. كذبة
..حمد .. احترم نفسك -
..افا عدنان.. تمد يدك علي -
..وهذي السبّة
..صفعه دوّت بركنٍ
..قريبٍ من هل الصفوة
..عراكٍ في بهو فندق
..جمع أجناس مختلفة
..مافيهم أحد وافق. أحد ثاني
..على تعريف للمنطق
خارج صالة الفندق.. شرطيين
..يقودوا بالحديد اثنين
ملامحهم تودّي. يمّ شرق أوسط
..وهيئتهم.. بسيطة أوبعد أبسط
..كانوا أصحاب
..في داخل
..بهو فندق .. بلد غربي
..في فصل الصيف

[ابوفواز]

الشـاعــر الأول
قــرّر التـاجـر يـكـون الـشـاعـــر الأول
افرحـوا يـا اهـل القصيـد وجهـزّوا السـاحـه
سـهـلـّوا الأوزان لـ اجـل المـبـدع الأفضـل
بـعـد إرهـاق الـعـمـل يـحتـاج لـه راحـه
فـاضـي هـو يـوزن ؟ .. كـلامـه كامـل مـكـمّـل
يكـفـي انّـه لـ اجـلنـا يكـتـب عـن جـراحـه
الكـسـر فـاسـمـاعـكم وادراكـكـم يجـهـل
عـبقـريـه فـرحتـه والـفـن فـي نـواحــه
جـدّدي لـه يـا صحـافـه عـهـدك الأمـثـل
وارسـمـي الأشعـار صـحـرا وشعـره الواحـه
واكـتـبـي عـنـه العظـيـم الشـامـل الأشـمـل
كـان يـحـتـاج الشـعـر جـهـده واصـلاحـه
واسـألـي كـيـف ومـتـى وهـل كـان أو يعـقـل
! عـمـرنـا مـن غـيـره فكـره تكـمـل افـراحـه ؟
ويـن "نـوبـل" عـن قـلـم مـن أشـرق واشـعـل
ظـلـمـةٍ كـنـّا بـهـا أفـنـاهـا مـصبـاحـه
مـن يـقـول إن الشـعـر فـي وقـتنـا مـبـهـذل
سـعـرنـا عـقـب الـخسـايـر زادت اربـاحــه
لحّـنـوا الشـعـر البـديـع الأصعـب الأسـهـل
واعـرضـوه بكـل شـاشـه ليـل واصبـاحــه
وادفـعــوا للـي شـدا للـشـاعــر الأجـزل
مـبلـغ وقـدره "كـذا" يستـاهـل صيـاحــه
ابـشـروا يـا مطـربيـن الدفـتـر الأجـمـل
يكـفـي عـن مُـرّ السـؤال وذل إلحـاحــه
دفـتـرٍ فيـه القصـايـد تشتـري الأخـطـل
وعنتـر يضحّـي بعبلـه ويـرمـي سـلاحــه
دفـتـرٍ فيـه المـعـاني فـي الـيميـن اسـفـل
!! أقـوى أبيـاته : فـقـط لا غيـري فـي السـاحــه

[ابوفواز]

مليت
قالت لي مليت..ودي بحد غيرك
جمع جروحك..لملم مشاويرك
واذا قضى صبرك..جرب صبر غيرك
لو اشغلك وعذبك طيفي..ابكي
واذا بكيت اكتب بدمعك شعر اشكي لمراسيلك
وبوعدك اذا صرخ جرحك ونادى..دمعتي تنزل عليك
بضحك على ايامي معك..واخذ على قلبي عهد مايخلص لغيرك
اعذرني..مليت
ماتبيني ملت الصدق المشاعر..يانور ايامي وسنيني اللي مضت
يالظلام اللي بيديني..مابقى فيني بقايا اتركيني
سل الحزن لغدرك خناجر ومالقاني فيني
وجرحي نادى..يامحاجر الدمع مايكفيني
ضاعت بداياتي..بقيت نهاياتي واسأل اجاباتي..هو أنا اخطيت
هو بقى في اللي بيجي ياليت..ماتت اجاباتي
قالت لي..مليت
يا اكثر جروحي الاخيرة..لو عرفتي اليوم قلب ودعك
يا آخر جروحي الكثيرة..ماعرفتي اليوم ما عاد اذكرك
وما اذكر من اللي مضى..الا غرامك والفراق
بعض اللقاء والاشتياق
وكل الاحاسيس الصغيره
يابرد عمري وياهجيره..تخطين لو يخطر في بالك
انك في بالي كل دقيقة..وانك خيالي والحقيقة
واني احبك مهما كنتي..يابرد عمري وزمهريرة
ان كان قلتي اني فقدتك..ماصدقتي
وان كان قلتي مانسيتك..ماصدقتي
لو عرفتي مااذكر من اللي مضالي الا انتي
وما اذكر من اللي مضى الا انتي
وما اذكر الا اني بكيت
وفي ليلة مافيها وفاء..قلتيلي مليت
يا انتي اخر أولي..لاتصدقي اني نسيت

[ابوفواز]

اسئل الاعمى

اسئل الاعمى .. ان كان في نومه يشوف
ليه يصحى
واسئل الى مادرت عنه الهموم
الى درا ان العمر محدود
وان الفرح مهما اختفى.. موجود
اسئله ليه ينوم؟
وان جاوبوك اسئلني ليه حنا افترقنا
ياصاحبي مابه سبب لفراقنا
غير اننا جينا بزمن ماهو زمنا
ياصاحبي مابه سبب لفراقنا
غير اننا في حبنا عشنا الصدق
وفي وقتنا وشهو الصدق
في وقتنا لجل القاء تكذب
ولجل تاصل ماتبي تكذب
ياصاحبي خذها من جرحي نصيحه
كانك تبي تاصل ؟ اكذب .. اكذب .. اكذب
الصدق في وقتنا اصبح فضيحه
في وقتنا دايم تهيم في شي ماتعرف مداه
دايم تهيم فلي بعد عن سكتك
والي زهد في محبتك
والي فيدك ومتحمل جروحك معك
مايهمك تنساه
ولو تقتله مايالمك وبقدامك تاطاء على دماه
ياصاحبي وقتنا في اوله ضيعنا اولا القبلتين
وفي آخره الله اعلم وش بيبقى
في وقتنا صار الغدر شيٍ عظيم
والوفاء ماظنتي ان كان بتدور بتلقى
ياصاحبي في وقتنا اطول مسافه ممكنه
تمشيها بين النقطتين
الخط المستقيم
ياصاحبي في وقتنا وقت الالم
من يسمعك مهما حكيت
من ينصفك مهما شكيت
منهو الى مايضحك اذا ذلتك دنياك وبكيت
ياصاحبي في وقتنا
ماللمشاعر ناس
ياصاحبي في وقتنا لبعض القلوب احساس
ياصاحبي في وقتنا وقت الكلام
وقل الفعل لامات احد وانتقل لعلا رفيق
من طيبنا نحزن عليه
نصلي عليه
ناصل معه للمقبره
وفي المقبره غير الدعاء وقولت الله يرحمه
مابه كلام وندفنه .. ولادفناه نبكي
بدون دموع او بدموع
المهم بعد مانبكي نتركه ونروح
وتلقانا نقول مسكين يافلان مسكين
من دنيتك وش الى خذيت؟
وبعد باب المقبره بشبرين
واقل من الدقيقه لامن دخل فينا الزحام
من طيبنا نضحك ونسمع اغنيه
لجل نتسلي في الطريق بين المقبره والبيت
ياربي سبحانك يالي تجير من العذاب
قلوبنا وش صابها ؟
في وقت غدا بين الحياه والموت
وبين البكاء والضحك
شبرين ودقيقه وباب
ويدنا الي قد حثت في وجه ميتنا التراب
هي نفسها الى بعد شبرين واقل من الدقيقه
اختارت شريط وحطته لجل تقتل طول المسافه
بين المقبره والبيت
ياصاحبي في وقتنا احسن كثير
من بعضنا
في المقبره على الاقل ميت وندري
المشكله متنا ولالحين ماندري
ياصاحبي في وقتنا ضاع احترام الموت
في وقتنا حكينا ما اكثره
وللأسف كل الحكي من غير صوت
وان كان به فم صدق
وسمحو يحكي بصوت مانسمعه
ياصاحبي قدامنا كان اختيارين
يانجاري وقتنا ونكذب ونخدع نفسنا
يانفترق لان الفراق في وقتنا
هـــو الـــصــدق
افــتــرقــنــا
ياصاحبي كانك تشك في اسباب الفراق
دور لك اعمى واذا صحى اسئله
ان كان في نومه يشوف ليه صحي
وليه أفترقنا

[ابوفواز]

استاهلك
ابسألك عن حالنا انتي وانا
ياللي احس..انك انا
حالنا ما هو غريب
انا نكون متأكدين ان الفراق ما هو بعيد
بالرغم من جرح السنين
ماهو غريب .. اني لو مرة في همي
نسيت وبكلمة جرحتك
قبل ما تتألمين .. اللي ينزف هو دمي
ابسألك ماهو غريب .. استاهلك
ابسألك لو قلت لك ان الحنان اللي في قلبك
ينبت من الصخر الزهر .. بأستاهلك
وان النهار اللي في خدودك يخلي النسمة عطر..بأستاهلك
وان العذاب اللي في عيونك يعلم الناس الشعر..بأستاهلك
ولو قلتلك اني احبك اكثر من هموم البشر
وكثر الجفاء وكثر السهر ... لو قلت لك
وانك اقرب من عيوني للنظر
كل الذي اقدر اقوله
واللي ما اقدر اقوله
بأستاهلك.. حبيبتي
وباجاوبك ..للاسف ما به احد يستاهلك

[ابوفواز]

البرواز

قلتيلي انسى
ومن يومها وانا كل ليلة..قدامي البرواز
حبر العيون ودمع القلم.. في دفتري
وصورتك..رغم الألم..ورغم انها خذت من اطباعك كثير
وخانت البرواز..اشوفها في خاطري
حبيبتي مابيدي حيلة
لاصرتي الصورة..وعيوني البرواز
وشلون ابنسى
اتعبتي الصوره مشاوير
وتعبت انا بلقى لغدرك معاذير
وصورتك اللي سجنت بروازها طول السنين..
كانت جسد وبروازها الروح
ويوم انزعت منها الجسد..تجرحت اطرافها
وبجروحها راحت لمين؟
لبروازها الثاني!!
مسكين..بيسجنك ويبقى سجين
مسكين
تشبهلك اقداره..خانته
وصورتك يجي يوم وتخونه
حبيبتي..أو للأسف حبيبته
لاصرتي الصورة..وجفونه البرواز
وشلون ينسى
حبيبتي لجل أنسى جرحك واستريح..ببكي
وبعد البكى ..ببكي
وأكيد في لحظة بتجي..وبيجف دمعي
وعندها صورتك اللي في عيوني
بتموت من ظلم العطش..
بروازها بيصبح نعش
وبتمرني الدمعة الأخيرة ...تاخذ معاها صورتك وتطيح
وكني بالمسافة تطول مابين عيني..ودمعتي..وخدي
وكني بقلبي الحاير المسكين
نبضه يقول لا تودع الفرقى الدمع مايرقى
وعندها لانزلت الدمعة لمثواها الأخير
وفارقت وجهي
بغمض عيوني..واكسر البرواز
واكيد ابنسى

[ابوفواز]

دخون

هو فيه مثلك..ياللي الحسن ظلك
ليه العطر
وانتي انفاسك دخون
وليه الكحل
وانتي ماغيرك عيون
وليه تفكيرك يكون
انك تكوني دايم اجمل
انتي اجمل
من جمالك
من دلالك
من خيالك
ياللي كل افراح قلبي والحزن
في المسافة بين فرقاك ووصالك
وليه يالقلب الحنون
تاخذك فيني الظنون
ضيعتي عدلك..هو فيه مثلك..انتي ماغيرك عيون
وانا احبك .. وانتي انفاسك دخون
ياللي احبك..ليه احبك؟
او ليه ماحبك..وانتي علمتيني ان الحب كله اسئله ما تنتهي
ليه ما احبك وانتي علمتيني ان الحب لا غدا لمثلك ابد ماينتهي
ياللي علمتك عذابي والهجر..ليه ما احبك
ياللي علمتك تكوني..في ضعف ضعفك..اقوى مني
يا انتي ضحكاتك تغني..وابتساماتك شعر
يانتي ضحكاتك تغني..وكل ما شفتك اصر
انك اجمل من جمالك..من خيالك..من دلالك
على حبك انا..بقفل ابوابي
وبطيوفك انا..باسقي اهدابي
يا انتي..يا انتي احبابي
تصدقين..تصدقين..صدقي
قلبي لكي وحدك..صدقي
ماقوى على بعدك دقايق..بس دقايق
ياظلي .. يا داري
يا اجمل..افكاري..تظلمني لوتقولي اني عاشق..بس عاشق
ياللي وحدك تسمعي صمتي وكلامي
ياللي ضيك
..اتعب همومي وظلامي..صدقي اللي في قلبي لكي
اكبر افكار من القصيد والحكي
تصدقي انك اجمل في عيوني من جمالك من خيالك من دلالك
لا يالقلب الحنون لا تاخذك فيني الظنون

[ابوفواز]

شهر

ياللي تحبيني شهر..ثم تجافيني شهر
ثم تحنيلي شهر..وتفكري كيف الرجوع كذا شهر
وترجعيلي في شهر
ماقد خطر في خاطرك ..ان السنة اثنعشر شهر
وقتي معك نصفه هموم
ونصفه الباقي اسى..ولو طبعك القاسي نسى
وبالصدفه جاء مره صباح..وكلمه منك فرحتني
لابد ما همس الجراح ..تسمعيني في المسا
ولو تعتب اجروحي عليك..وتشتكي منك اليك
بترجعي تحبي شهر..ثم تجافيني شهر
ثم تحنيلي في شهر..وتفكري كيف الرجوع كذا شهر
وترجعيلي في شهر..ولا يجي في خاطرك ان السنة اثنعشر شهر
اعذريني لو اقول ..حبك نسى معنى الفرح
اعذريني لو اقول ..وشلون يذكرنا الفـــرح
مادام اذا كنتي قريبه..كل تفكيري يكون
بعدك متى..والى بعدتي ابلا سبب
الاكيد بترجعي..بس الاكيد هذا متى؟
ولو تعب مني الصبر..ومل من صبري العذول
وقلت ياناس اسألوها ..الحب هو كله هجر
ردك يجيني في شهر..
قالوا تقول "ماينتظر ..بس يشتكي
يصبر علي..ترى السنة اثنعشر شهر

[ابوفواز]

عيونك

عيونك اخر آمالي وليلي اطول من اليم
كيف القى كلام عذب يوصف داخل احساسي
عشقتك قبل ما اشوفك وشفتك صرت كلي حلم
ابي رمشك يغطيني وابيك اقرب من انفاسي
يهمك تعرفي انك قتلتي في سنيني الهم
قتلني ضحكك وجدك قتلني لينك القاسي
رميت اقداري في دربك وصرتي في عروقي الدم
احبك كثر ماسالت دموعي وما نسى ناسي
يجول الحزن في ضلوعي بردت وذاب فيني العظم
كثير من الحطب حولي وعندك انكسر فاسي
سألتك بالذي زانك تحبي فيني حتى الظلم
تحبي عيوبي وغدري تحبي المر في كاسي
انا من كثر ما احبك ابيكي كثر رمل اليم
وابيكي فوق الناس وابي ماينحني راسي

[ابوفواز]

كبرية

فرقة موسيقية
كمنجة بثلاث اوتار..قيتار..ثلاث طبالين
اورق ..ناي .. شاي
فرقة موسيقية
يجون..كل ليلة يجون..ومع أول الصبح يسرون
لجل ثاني ليلة يجون
هم يعزفون
..وما يعزفون في مكان تسمع فيه الناي قانون
ازعاج .. صجة .. دجة
ايقاع خليجي غالبا مقلوب
ايقاع خليجي دائما مطلوب
شباب..بنات ترقص..والعطر في اول الرقصة حلو
وفي آخر الرقصة هبوب
غناء وطرب..عرض وطلب
وحد يغني ..بدلته تلمع..يفترض فنان
ياليلة دانة لدان
قرقعت كيسان..دخان..ما اسعد الشيطان
ضوء خافت..كل شي حلو والضوء خافت
كل شي كذب والضوء خافت
وفي اطرف الصالة..هناك اثنين
-واحد يقول "شفت هاذيك الطويلة اللي ترقص
-الثاني "وين؟
-"هاذيك اللي مع حسين
"واعدتها البارحة وجتني
..مالومها حبتني..اعطيتها الفين
"مسكينة هي
..ماودها تجلس في ملهى..بس انها تساعد اهلها
الثاني قال:"كل البنات اللي هنا تساعد اهلها
غسان..غسان .. مدير هالصالة
ركض غسان .. وصل فلان..وصل المهاب..معاه عشر اشخاص
ركض غسان "اهلين وسهلين
..شو هالحلو..يخزي العين
الفرقة تنهي الأغنية.. وتعزف بسرعة
"حمد الله ع السلامة ..يجاي من السفر
أحلى طاولة للمهاب..طاولة على البست
لفلان اللي من اسبوع كان لابس البشت
اليوم على البست
غسان قلقان..مضت ساعة..ومانقط أحد
نادى "ياجارسون" وحط يده في جيب البنطلون
"خذ هالألفين
..على المغني ارميها..وشاور على فلان
ادريس قام "فلان ينقط وانا لا..ياللاهانة..والله لنقط
- "يادريس لا
..هذي فلوس التذكرة..وشلون نرجع..السفر بكرة
ادريس قال "بكره اروح لفلان احلف له (انسرقت فلوسي
..الاوتيل غالي..وانا معي عيالي) وارجع انقط
جارسون هناك يحكي مع زميله
غسان قال "الفواتير ماتنزل الا آخر السهرة
الحق معه..بهذا الوقت ..مافيه احد يقرأ
جوزيف وين..اليوم فل..ودوه للشرطة..غسان شافه يسرق من النقطة
والكل عارف..الثلث للفرقة..والثلث للنمرة..والثلث للصالة
وكله لغسان
طلعت الشمس..الساعة ثمان
الكل سكران..الكل تعبان
ماعدا غسان "قفل الصالة ..الوعد بكرة

[ابوفواز]

مردخاي

سمعتوا قصة مردخاي
من زمان قالوا لأخوكم مردخاي
"مردخاي هذا زمانك جاي"
شفت هالخوان قاتلهم..خذ أرضهم..اهدم منازل بعضهم..وشردهم
غير معالم ارضهم..واطمس ملامحهم ..فرقهم وتصير سيدهم
وامسك بتلمودك ودينك..وبعثر مبادئهم
وبعد ماتزرع بذور الحقد فيما بينهم..وتحصد مشاعرهم
قد ماتقدر حيد اكبرهم..رد له كامل حقوقه
واعزف على اوتار فرقتهم
واضرب أغناهم بافقرهم
حاربهم بهم..واشعل معاركهم
وبعد مايستنزفوا قوة بعض
خذ مابقى منهم ..وفاوضهم
فاوضهم على الفتات
واذا عطوك حق الفتات..رجع لهم ربعه
وســــــالمـــهم
هذي قصة مردخاي سيد الزمان الجاي
عــــاجبــــكـم

[ابوفواز]

ياكاعب

يا كاعب الطبع الفريد 000ياللي في صدقك تكذبي
يا أقدم الكيد الجديد 000 كيد انسجن منه نبي
يا جاريه تملك عبيد 000 يا مقيده تسبي سبي
القوه في ضعفك تبيد 000 وسلاحك الدمع اسكبي
ما يعجزك قاسي عنيد 000 الكهل يصبك بك صبي
ينصاد ويظن انه يصيد 000 ويصدقك هذا الغبي
ويظن انه الفذ الوحيد 000 ما يدري انك تلعبي
مسكين هالجاهل بليد 000 ظنك بوصله ترغبي
ان جاك اقفيني بعيد 000 وان صد عنك تقربي
وان شفتي اخلاصه يزيد 000 في حيرتك تتقلبي
وان بان لك فجأه سعيد 000 من هالسعاده تغضبي
وان قلتي عني لا تحيد 000 وطاوعك تستغربي
وان قلتي فراقك أريد 000 وغاب عنك تندبي
ياطالب الراي السديد 000 يا حاير بطبع الظبي
أقرب من حبال الوريد 000 وابعد من المجد الأبي
وأوضح من أنوار تقيد 000 واخفى من النمله دبي
الشك فيها الأكيد 000 وغموضها به تختبي
شف فعلها يحكي ويعيد 000 الغدر شيمة مذهبي
زادي النكد به استزيد 000 والمكر صافي مشربي
البعض ينصاني مجيد 000 والبعض يحبيلي حبي
ضعفي قوي وذلي عتيد 000 يا ليت اعرف مأربي
شف فعلها برجل شديد 000 تلقى طلبك ومطلبي
تعطيه بعض اللي يريد 000 وتاخذ جميع اللي تبي
أستثني من هذا القصيد 000 كل النساء بكوكبي

[ابوفواز]

تعاريف

الاقتصاد
ناس تزرع من فجر ربي 00
الين الشمس تغرب 00
وناس تصحى في العشا 00
تتولى تقسيم الحصاد 00
***
بغداد
حضارة شاهقه
وأمجاد 00
أقدار صلفه 00
وشعب يفاخر بنزفه 00
وتحتاج الحكايه لص 00
يصير الأقوى بالصدفه 00
ويكون القاضي والجلاد 00
وبحسن اعداد 00
وقدرة فائقه 00
في البطش والتنظيم 00
وبداعي خوفه 00
الأطماع 00 والتقسيم 00
والأنواء 00
يقسم شعبه لأجزاء00
جزء يعيش في المنفى00
وجزء ف عيشته منفى 00
ومواطنين 00
معززين مكرمين 00
مقرنين00
في الأصفاد 00
بغداد00
خبر لو أنها أنداد 00
مدينة 000بائها بوابة التاريخ
ودالها 00 دنيا من الأمجاد00
سنين صلفه00
وشعب يفاخر بنزفه 00
وتحتاج الحكاية لص 00
يصير الأقوى بالصدفه00
ويوطد حكمة الأوغاد00
!!بغداد
***
السجون
هي مكان 00
لعزل من يخرج على القانون
وان غدى القانون جائر 00
تصبح القضبان دنيا 00
تعزل الخارج عن المسجون 00
***
النفاق
رغم اختلافك00
تبقى آرائك00وآراء الذي تخشاه00
دايم في اتفاق00
أو نقول:هو انتمائك 00
كل فتره لانتماء00
أو نقول : هو ارتماء00
أو بمعنى آخر نقول : النفاق00
هروله صوب اليهود 00
وبكا على أطفال العراق 00
***
السراب
وهم ما هو ماء
لكن يعطي 00للظامي أمل00
احساس مفعم بالرجاء00
والسراب ينادي : يا ظامي تعال00
ما بقى الا خطوتين 00
وتنعم برشف الشراب00
أو بمعنى آخر 00
نقول : السراب00
الوعود اللي قطعها 00
المرشح للمرشح في انتخاب 00

[ابوفواز]

تحضنه

تحضنه لجل تضحك للي وراه
وماهمها لو شافها
.. غايته اسمى كثير من العتاب ومن الغضب
تحضنه وفي بالها
.. ذاك الى اعطاها الرقم
في ليلهٍ كان النهار
.. فيها بقايا سكرته
وللأسف انه نسي يكتب لها
كم غرفته
تحضنه وفي يدها ساعه ذهب
كان اشترها لها البارحه
لجل تعرف كم مساحه غرفته

[ابوفواز]

مايقول الشعر
مايقول الشعر .. من باله خلي
ومن نساه الهم لايطري القصيد
ماكتبت الشعر قصدي تزعلي
وان فرحتي فيه ما اقصد اكيد
حس يشعرني .. وضيقه تنجلي
ودار تسكني وانا عنها بعيد
واوصف العله لعاشق مبتلي
لاكساه الليل يلقابي عضيد
لالفوك الغيد عني اسئلي
تجري حروفي بهم مجري الوريد
من هوى هذاك وفلان وعلي
الوكاد انه عن اشعاري بعيد

[ابوفواز]

سيد جروحي

سيد جروحي شمس عمري وظلي
البعد طول والخطأ منك واضح
اذا غرورك يمنعك تعتذرلي
تعال جنبي وابتسم لي واسامح
تدري احبك لكن الموت ذلي
ادوس انا قلبي لو الشوق جامح
الله عطاك الحظ واصبحت خلي
والله عطاني اياك طاغى ملامح
سألتني يا ياسميني وفلــــــي
ياكيف يشفى الورد..والشوك جارح
مثل العيون اللي لها كل كلي
زايد حلاها لكن الدمع مالح
وش تنتظر يكفي دلال وتغلي
الوقت ماهو للوصل دوم سانح
مادمت ترحالك ومادمت حلي
ان صرت انا خسران ماصرت رابح
لا تعطي الفرصة لعذالنا اللي
لكل ماهو يهدم الحب طامح
مالك صبر عني ومالي تسلي
والوقت خيل صوب الاجال رامح
سيد جروحي شمس عمري وظلي
الحب بعد وقرب ..مخطي وصافح
اذا غرورك يمنعك تعتذرلي
لاتعتذرلي قول اسمي واسامح

[ابوفواز]

الحرامي

احترامي.. للحرامي
صاحب المجد العصامي
صبر مع حنكة وحيطة
وابتدا بسرقة بسيطة
وبعدها سرقة بسيطة
وبعدها تَعدى محيطه
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
صاحب النفس العفيفة
صاحب اليد النظيفة
جاب هالثروة المخيفة
من معاشه في الوظيفة
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
يولي تطبيق النظام
أولوية واهتمام
ما يقرب للحرام
إلا في جنح الظلام
صار في الصف الأمامي
احترامي.. للحرامي
احترامي.. للحرامي
صاحب المجد العصامي
يسرق بهمة دؤوبة
يكدح ويملي جيوبه
يعرق ويرجي المثوبة
ما يخاف من العقوبة
صار في الصف الأمامي
احترامي.. للحرامي
احترامي.. للحرامي
صاحب المجد العصامي
صار يحكي في الفضا
عن نزاهة ما مضى
وكيف آمن بالقضا
وغير حقه ما ارتضى
صار في الصف الأمامي
احترامي.. للحرامي
احترامي للنكوص
عن قوانين ونصوص
احترامي للفساد
وأكل أموال العباد
والجشع والازدياد
والتحول في البلاد
من عمومي للخصوص
احترامي
للصوص

[ابوفواز]

سألتها

سألتها ليه البحر ساكن عيونك
جاوبتني للغرق
سألتها ليه السواد اللي في عيونك
قالت للأرق
سألتها ليه الخدود
قالت عبق
سألتها هي رقتك مثل النسايم و الورود
قالت لي لأ يمكن أرق
سألتها عن حسنها كنه يقول ماللشعر فيني حدود
قالت صدق
سألتها يا اغلى الأنام .. وشو الغرام ؟؟
قالت لي انك ما تنام .. و أوهام
و تنتظر شمس اللقا و ما تجي شمس اللقا
ومشوار ما يعرف وصول
و لحظه بها كل الفصول
و قلب واحد يحترق
و بعض الصدق
و وقت عصيب و يتبعه وقت عصيب
و لين يتعدى الصباح
و جراح تدمى لو تطيب
و في الأخير .. خل عن خل افترق
و في الأخير كل النهايات الفراق
ما في فرص
مافي نهايات بلقا إلا في خيالات القصص
سألتها وش هو الوفا ؟؟
قالت كفى .. النور من ضيي اختفى
و الليل في عيوني غفى
اترك كثير الأسئله .. اسأل عن عيوني و كفى
اسألني ليه البحر ساكن عيونك ؟؟
ليه السواد اللي في عيونك ؟؟
سألتها جاوبتني للغرق .. للأرق
سألتا عن حسنها كنه يقول
ماللألم فيني حدود
قالت صدق ...

[ابوفواز]

ماأظن

ماأظن الصبح .. يدري باليالي
وماأظن الليل يعنيه الصباح
وماأظن في يوم قد زارك خيالي
وماأظنك حاسباً عمري الى راح
ياقديم الظلم مافارقت بالي
ومافي بالك لي سوى هم وجراح
لو همومي تسعدك.. زد لاتبالي
ولو معي اخطيت اطلبك السماح
تبعد دروبك اذا اقبل وصالي
ولجلك دروبي يضيق بها البراح
رغم بعد البعد جرحك هو ظلالي
كنك الرامي وفرقاك الرماح
يالغرام السجن والسجان غالي
والسجين يخاف اطلاق الصراح
لو هو في الأوراق قدر الغصن عالي
بتاخذ الاوراق اقدار الرياح
للكسر غصنك وانا يمضي بي حالي
ولضمى اورقي خلق ربي قراح
بسبقك لصبح مليت الليالي
واتركك في لليل ناسيه الصباح

[ابوفواز]

تجاعيد
تجاعيد
في وجه الزمن صاروا
تجاعيد
رماهم حزنهم اوراق
خريف وعاث بالعاشق
عطاهم الأمل لحظات
ورسم أوقات الآلام
وللذكرى مواعيد
وتجاعيد
في وجه الزمن صاروا
تجاعيد
جروح تؤلم الإيلام
عذاب يضج باستفهام
متى قد كانت الدنيا مع العاشق؟
متى قد كانت أعظم خاتمة للحب
ماهي افراق
هذا طبعها الأيام
كذوبة كانت الأحلام
بالتأكيد
تفاؤل زاد في الإغراق
وصدق بهجته عشاق
خذلهم..بدل ضحكهم تنهيد
وتجاعيد
في وجه الزمن صاروا
تجاعيد

[ابوفواز]

المبادئ
..بدء ذي بادىء
..هذا تعريف المبادىء
..كل وقت ..وله أذان
..الزمان..غير الزمان
..ياكلام الليل..يمحيك النهار
..باختصار
..المبادىء ..شىء تحكمه الظروف
..مثل طفل ..ترتبك في الحروف
..ما اجمل أغلاطة
..المبادىء ..للأسف
..كلمة مطاطه
..بدء ذي بادىء
..يا بايع إحساسك
..وش احساسك
..وأفكارك لغيرك
..ياشاري إحساسك
..وش احساسك
..واحساسك لغيرك
..ليتك توصف متعتك
..لاخذت من غيرك مشاعر
..تدري لو تقدر ترى
..ماهو بعيد تصير شاعر
..كيف الخلاص..من ناس تغتال الشعر
و حد القصاص في كل سرقة..البتر
..الا الفكر
..بدىء ذي بادىء
..هذا تعريف المبادىء
..يا بايع أموالك ..لفقرك
..وللعذاب اللي في بيتك..ودمعة عيالك
..ليت توصف متعتك
..ليت أوصف ضيقتك
..لو جرى لك
..في القمار ..اللي جرالك
..ليت نعرف
..متعتك أو ضيقتك
..أيهم اللي بقالك؟
..يا بايع أعصابك ..لخمرك
..ياكثر ماحرت بامرك
..يابايع الصحة..لخمرك..أو سمومك
..وش يفيد أني ألومك
..!كيف تلقى متعتك..لا ضاع عقلك
..وبان بين الناس ذلك
..وكيف تسعد في شعورك
..وانت خارج عن شعورك
..يا بايع اعصابك و وعيك
..ياللي تهرب في عذابك
..من عذابك
..لو بغيت في يوم
..تهرب من هروبك
وش هو احساسك؟
..بدء ذي بادىء
..هذا تعريف المبادىء
!يابايع بلادك ..بكم كان الثمن؟
..يا بايع بلادك
انسى المباني ..والبيوت..والحب الأول
..انسى غبار المدرسة..و وجوه اصحابك
..انسى فؤادك ..وميلادك
..وارمي ورا ظهرك
..كل العبارات الكبيرة
..عن الوفا ..والتضحية
..وعن حب الوطن
..يا بايع بلادك
..لو كبروا أولادك
..وكان السؤال في عيونهم
..!سجنك وجلادك
!"احنا يابوي من وين؟
!وش هو احساسك؟
يابايع آخرتك..يالعاصي القاسي
"..اسمع نصايح صاحبك "ابليس
"لا تترك التدليس
اظلم ولا تفكر في باكر
هيم في العصيان جاهر
واختار من بين الذنوب
.. مايسعدك
..ولاسار عمرك للغروب
..لاتتوب
..لا تحسب للعمر
..ولا تفكر بالقبر
..ولا العذاب
..توك شباب
هذي نصايح صاحبك ابليس
يابايع آخرتك بدنياك
لا عدمناك
لو عدمناك
وش هو إحساسك

[ابوفواز]

عجب عجاب
عجب عجاب .. طيبة قلبها أبيض سحاب
أخلاقها مامثلها .. أخلاقها
أخلاقها تنتظر عشاقها
ومايجون
ياهي جريحه طيبه .. لكن جريحه
عجب عجاب
وسيم أنيق شاب .. كسبه حلال مشروع ماجرب الجوع
ناجح مركزه مرموق
ورغم هذا الحزن ساكن عيونه
ماتت امه .. وحبيبته كانت
تــخـــونـــه
عجب عجاب كثر الفقر ماله
كلاً يبي قربه ورضاه
رغباته قوانين وزلاته صواب
الناس حوله من شمال ومن يمين
يأمر يــطــاع
الدول تحسب حسابه
والكل يخشاه ويهابه
لاكن مريض ياعذابه
ممنوع يأكل لو أكل جايز يموت
عجب عجاب
مرتاح الضمير لاسرق لاظلم لاحسد
عنده قليل أصحاب
قلبه كبير بيته صغير
والمرض عن صحته بعيد
عنده ثلاث اطفال
أحمد وايمان ويزيد وامهم
وكثر السماء يحبهم
لاكن فقير مالقاء لصوته مسامع
مايملك الا طيبته وملح المدامع
ولو مادفع مبلغ حقير
ينطرد هو والعيال وامهم في الشوارع
عجب عجاب
عبقري في الطب ملحد
عجب عجاب
شاعر عظيم داخله فارغ
عجب عجاب أمير كذاب
عجب عجاب ملايين البشر
تعبد بقر
عجب عجاب
ماتصلي فرضها وتلبس حجاب
ياصاحبي عطني يقينك والظنون
؟..من ودك تكون

[ابوفواز]

الصبر
الصبر...مالي انا الا الصبر
الغدر...وشلون جاء منها الغدر
ياقلب ابي منك العذر
انا ما هقيت ان الفجر يقدر يخون وقت الفجر
وان السنين تقدر تمر ابلا عمر
لا ماهقيت ان الوفاء في قلبها ماله قدر
واني انا محتاج مني الصبر
ياقلب ابي منك العذر..وان مارضيت مالي جدى كود الصبر
ياجرحي في كل الدهر فارقت انا الدنيا
ياطعنة وسط الظهر لابد انا انساك
بنسى ان كل اللي راح..بنسى الفرح لجل الجراح
بنسى قصيدي والشعر..بنسى سنيني والعمر
مع الهجر يمكن في يوم اسلى
وان ماسليت او ما نسيت
منك العذر..مالي جدوى كود الصبر
ياللي خذلتي مدمعي..ان كان ودك ترجعي
عندي طلب..لاترجعي
ياللي خذلتي مدمعي ..وتنسي السعادة والفرح
وتتعذبي وبعد العذاب تتعذري

[ابوفواز]

النظـرة الخجـولـة

.. مـا سـألتـوا صـاحـب النظـرة الخجـولـة
! .. كيـف يـسـهـرنـي ولـه وجـهٍ صبـوح
! .. كيـف يظـلـمـني وله طـهـر الطـفـولـة
.. كيـف يـفـتـنـّي وهـو دايـم يــروح
.. وكيـف أنـا ألقـى ربـيـعه فـي فصـولـه
.. دام كـذبـه صـادق وصـدقــه مـــزوح
.. لـه صـفـاتٍ تـورد العـاشــق ذهـولـه
.. مسـتـكـيـن صـامـت وكـلـّه جـمــوح
.. أصـعـب الأشـيـاء و أكثـرهـا سهـولـه
.. أغـمـض الأشـيـاء و أكثـرهـا وضــوح
.. سهـل تـغـرم بـه وصـعـب إنك تنـولـه
.. غـامـضٍ طـبعـه وواضـح فـي الجـروح
.. أسـعـد بشـوفـه ولكـن مـا أطـولـه
.. كنّـي الـوادي وهـو أعـلى السـفـوح
.. يـبتـسـم لا مـنهـم عنّـي حكـوا لـه
.. ولا حكـوا لـي عنه أعـمـاقي تـنـوح
.. لـي بقـلبـه شـيٍ لكـن مـا يقـولـه
.. ولـه بـقـلبـي كـلّ و لكـنّـي أبــوح
.. كنّـه الغيـمـه و انـا أرجـي هطـولـه
.. مـا نـزل غـيثـه ولا بـرقـه يـلــوح
!! .. مـا عـرفـتـوا ليـش تسهـرني فعـولـه
!! .. وليـه يـسكـنّـي وهـو دايـم يــروح
.. هـو يـبـيـني بـسّ أطبـاعـه خجـولـه
.. ومـا يـبـيـني أغـفـا وهـو وجهـه صبـوح

[ابوفواز]

يوميات مواطن عربي

السبت 000
ديون 000 وأمراض 00 وكبت
الأحد 00
منذ اللحظه الأولى 00
والى الأبد 00
ينادي 00 ولا يسمعه أحد 00
الأثنين 00
القافلة تسير 00 لكن الى أين ؟؟
لا جواب يصدم 00 ولا كلاب تنبح 00
الثلاثاء 00
أصبح ثرياَ 00وازداد عدد الأثرياء
مات خمسه وأربعون مريضا 00
من ندرة الدواء 00
الاربعاء 00
احتفال 00 صاخب 00فاخر 00معطاء
شعر 00وفكر 00وولائم00
وخطابات وثناءات00
وجمع من الأدباء00
هو احتفال مكلف 00 ولا يكاد ينتهي 00
لكن ما يأتي به 00من سمعة00
جدير بالعناء00
قرية صغيرة هناك00أهلكت من وطأة الوباء 00
الخميس00
كل شيء سعره الى ارتفاع00
الا المواطن التعيس 00
قاتل الله 00 00 00 ابليس
الجمعة00
اجازه من مجتمع طيب السمعه 00
حكمة السبت
قل لكل من تخشى 000أصبت
حكمة الاحد
اذا طرقت الباب 00وقيل من ؟؟
قل: لا أحد
حكمة الأثنين
انظر بلا عينين00 واسمع بلا اذنين00
وانطلق بلا لسان 00 ولا شفتين 00
حكمة الثلاثاء
الثروه تاج على رؤوس الأثرياء00
لا يراه الا المرضى والفقراء00
حكمة الأربعاء
اللهم قني خير الأصدقاء00
حكمة الخميس
يقول الله سبحانه 00
وأخذنا الذين ظلموا بعذاب بئيس
حكمة الجمعة
العن الظلام 00لن يجدي أن تشعل شمعه

[ابوفواز]

أصدق ماكتبت

انتي..تدرين من انتي
تدرين انك لي غديتي كل شي
وانك غديتي شمس ليلي وفي الهجير الفي
وانك اصدق ماكتبت
وانك احزاني وفرحي ..لاضحكت وانجرحت
وانك غديتي ياعذابي اغلى من حبي علي
قبل الحب يا ما كذبني القصيد
وبعد حبك صار يكتبني القصيد
هو يوصفك بسمة وطرف
وأنا اعشقك في كل حرف
منك شكالي..وصف حسنك اتعبه
وانا شكيتك ..وعشقي لحبك اعجبه
ومهما شكى ومهما وصف
انتي احلى ماكتبت..انتي اصدق ماكتبت
وانتي احساسي وجرحي..لاضحكت وانجرحت
وانك غديتي يا عذابي اغلى من حبي علي
.....!تدرين من انتي

[ابوفواز]

البحر

على مدى الأيام .. كان البحر بالنسبه لي
هو البحر
رمل .. امواج..صخر
كان البحر بالنسبه لي بس البحر
وعلى مدى الايام ماقد لمس فيني المشاعر
الا ذاك اليوم.. يوم انك معي
يومها كان الوداع
وكان البحر دفتر والموج بيت من شعر
وبيتٍ ورا بيت وموجه ورا موجه
تكتب قصيده حبنا
وتمحي الجراح بجراح
ومثل الفرح في دنيتي كان الفجر
عمره قصير .. وبكل حب اهدى نسيمه وراح
وتشرق الشمس ..لجل الخلايق كلها تقرا
قصيده حبنا
ويومها ماكان للشمس اي نور
وبعض السبب كان الوداع
وباقي السبب انتي خذيتي .. من سماها النور
ولجل الصدق .. يومها كنت انتي الشمس
وكان البحر عينك .. ودموعك امواج الشعر
وخدك الدفتر
آه يالقى ماخذت من طبع البحر
..ماللبحر آخر
آه يالفراق .. ماخذت من ذوق الفجر
يمرنا عابر
وآه يالعيون الى انا منها عرفت
ان البحر دفتر وان القصيد امواج
وان الغرام شاعر

[ابوفواز]

أخطيت

أنا مدري وش أحساسك
ومدري وش تظنيني
انا الصادق في عينك كنت
صرت الكاذب الخوان
انا اخطيت ما انكر ولافي عذر يكفيني
سوء اني احبك حيل واني دايماً انسان
انا ادري بمدى جرحك
وادري الحظ جافيني
يطول الوقت ما أخطي
واذا اخطيت كل شي بان
انا شفت الزهر مايل
وظنيته يناديني
قطفته يوم ضميته لقيته للأسف
ذبــلان
عرفت انك زهر عمري
عرفت انك بساتيني
وغيرك قيظ مايروى سراب يشقي العطشان
انا لو ماحصل ماكان وشو الى يدريني
بأنك ماسواك أنتى سكنتى القلب والوجدان
انا اسف على اعذاري
عجزت القي عذر فيني
يليق بغلطتي في حقك ويرجع كل شي كان
احبك كثر أخطائي
وادري انك تحبيني
وادري لو تفارقنا فلانقدر على النسيان
اذا تقوي على فراقي وبعدي عنك
خليني
انا مليت من دور الكراره
ولعبت الغفران
قليل العمر يالي انتي دموعك ماتساويني
حرام انه يضيع فراق هي من قلها الإحزان

[ابوفواز]

فقير

فقير وعندي المال الكثير
فقير وملبسي غالي حرير
وياصاحبي الحافي الفقير
ابنشدك ابسئلك وشهو الحصير
وابسئلك وشلون انا امر وانهي
واذا حكيت قبل انتهي من كلمتي
يقاللي سم ويصير
ولاشكيت من غفلتي طول زمنها
يقاللي لاتشتكي ماخلقت الشكوى لأمير
وابسئلك وشلون انا مع كل ذا
!!!اقول عن نفسي فقير؟؟؟
ياصاحبي لاصار لضحكه ثمن
وصارو اصحابي كثيربس بثمن
والوفاء مابه وفاء الا بثمن
ابسئلك ماني فقير ؟؟؟
ولاصارت اقوالي حكم
ولاقالها غيري غدت .. حكي قديم
ابسئلك ماني فقير؟؟
ولاصرت انا مانيب انا
ولاغلطت قالو صحيح وكل شي اعمله يصبح عظيم
ابسئلك ياصاحبي ماني فقير؟
وياصاحبي ابنشدك لمن جفتني دنيتي
وابتدا الدرب الطويل الى ابد ماينتهي
وانتهي العز القديم وماكنت اظنه ينتهي
والموت بدد فرحتي .. وحطوني في قبر صغير
وحزنو علي وبكو هلي وناس من ربعي قليل
وارتاح من وجهي كثير
وبقيت وحدي في حيرتي مابه احد
لاطال عمرك ولاتحت امرك
ماغير انا وخوف ولحد وحساب قدامي عسير
وقتها ذكرت اني من زمان
يوم انه امهلني الزمان
هذا ظلمت هذا جرحت ياما كذبت
وذنوبي ماتحصي كثير
وقتها الا ندمت ونفسي كرهت
عرفت ان الله كبير وان الهلاك اصبح اكيد
واني انا مالي رجاء..ولاهروب من الدجاء
من الجحيم الا بأمل عندي وحيد
ان الله غفار ورحيم
ابسئلك ياصاحبي عني في وقتها
ماني فقير؟؟؟

[ابوفواز]

أمي

اسألو دمي ..وسعادتي وهمي
اسألو التوفيق..والكدر والضيق
اسألو الطيب في صفاتي..والدعاء اللي في صلاتي
واسألو شهودي..الدموع اللي في سجودي
اسألوهم..واسألو دمي ..عن غلا أمي

[ابوفواز]

قالوا ترى

قالوا ترى مالك امل في قربها لو يوم
ابعد وجنب دربها ..هذا هو المقسوم
قلت اتركوني واسكتوا..خلو العتب واللوم
قدني غرقت في بحرها..ولاعاد يفيد العوم
قالوا ترى في حبها ويل ..واسى..واهموم
قلت ان قتلني حبها ..حسبي تقول مرحوم
قالوا انسى ذكرها..منتب بها ملزوم
قلت ابشروا ياعذلين..بنسى لذيذ النوم
قالوا بتلقى غيرها..واترك هواها اليوم
قلت العفو ياحسدين ..ما ابدل القمر بنجوم
قالوا لغيرك حبها..قلت الجواب مفهوم
دام انها متهنيه..وشلون اصير محروم
بقضي الليالي انتظر..صابر على المقسوم
متعلق بطرف الأمل .. يمكن يجيني نوم
قالوا ترى مالك امل ..في حبها لو يوم
ابعد وجنب دربها..وهذا هو المقسوم

[ابوفواز]

(أحمد محمد سلامة)

في زمن وهمي من الأزمان
كان ياما وياما كان ..
سلطنة وسلطان ..
وف يوم من الأيام ..
يتصفح السلطان جريدة ..
موضوع يسترعي اهتمامه .
أحمد محمد سلامة ..
فـرد من أفراد شـعبه ..
يائس وأوضاعه صعبه ..
في الصبح يشتغل بواب ..
في مدرسة أطفال ..
وفي الليل يشتغل شيّال ..
عنده ثلاث عيال
فيهم مرض نادرعضال .
ماله علاج إلا فبلدان بعيدة ..
كلفته ما يحتملها وفاقته أصلاً شديدة .
انسدت الدنيا أمامه ..
وارتأى أن الطريقة الوحيدة ..
لفتح أبواب الأمل ..
انه يوجه ندا .. عبر الجريدة ..
لاهل الكرم .. واهل الشهامة
تبرق . في عين سلطان البلاد غمامة .
ويهطل الدمع من عينه ..
يمسح الدمع بكفوفه ..
ويخلع العمامة ..
ويرفع للسما راسه ..
ويقول .
ياربي الفرد الصمد ..
سترك وعفوك ..
ألهتنا عن الناس ..
أمور الحكم والسياسة .
ينادي سلطان البلد :
يا حاجب .
استدعي معالي وزير السلطنة الأول .. رعد .
يجي رعد . ويبدي ولاَءه واحترامه ..
ـ صاحب المجد والكرامة .
سيدي السلطان أمرك ..
ـ أي كرامة يا رعد .. أي كرامة
والمواطن في البلد .. ضايع مقامه ..
اتركك عن هالحكي .. واسمعني زين
هذي مليونين خذها ..
وصلها لمحمد سلامة
أحمد محمد سلامة
خذ الجريدة .. تلقى التفاصيل في الجريدة
لكن اسمع يا رعد .. ما أبي يدري أحد
أحذرك .. لا صحافه .. ولا جرايد
هذي لوجه الله أبيها .
ويعلم الله .. من وراها .
ما أبي مدح وقصايد ..
أرتجي عفو الكريم ..
في يوم بالأهوال زايد .
ـ سيدي السلطان خيرك .. في القديم وفي الجدايد
ربي يجزيك المثوبة .. ويعينك بوقت الشدايد
ـ يخرج رعد .. ويستدعي وزير المال والأحوال ..
مرسال .
يجي مرسال .. أمرك معالي وزير السلطنه الأول .
تعال يا مرسال .. فوراً وفي الحال
خذ المليون هذا ..
وسلموه .. للمواطن أحمد محمد سلامه .. من سيدي السلطان
خذ الجريدة .. تلقى التفاصيل في الجريدة
مرسال .. لابد هذا يتم الآن .. فوراً وفي الحال
وبأقصى درجات السرية والكتمان .
هذي أوامر سيّدي السلطان ..
يخرج مرسال .. ويستدعي كبير الحراّس
فراس . يجي فراس
أمرك يا وزير المال والأحوال ..
ـ فراس .. تعال
خذ هذي خمسمية ألف ..
سلموها .. للمواطن أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة
خذها الآن ..
فوراً وفي الحال سلمها .. وبأقصى درجات السرية والكتمان
هذي أوامر سيدنا السلطان ..
يخرج فراس .. ويستدعي النقيب ..
حبيب .
يجي حبيب .. أمرك ياكبير الحراس
ـ حبيب تعال ..
خذ هذي المية ألف ..
سلموها للمواطن .. أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة ..
خذها الآن سلمها .. فوراً وفي الحال .
وبأقصى درجات السرية والكتمان .
هذي أوامر سيدنا السلطان ..
يخرج حبيب ..
ويستدعي مسئول المساكن
مازن .
ـ مازن .. تعال .. خذ الخمسين ألف هذي
سلموها للمواطن .. أحمد محمد سلامة .. من سيدي السلطان
خذ الجريدة .. تلقى التفاصيل في الجريدة
خذها الآن سلمها ..
وفوراً وفي الحال ..
وبأقصى درجات السرية والكتمان .
هذي أوامر سيدنا السلطان ..
يخرج مازن .. ويستدعي رئيس الحي ..
اللي ساكن فيه أحمد ..
عبد الحي ..
يجي عبد الحي ..
ـ عبد الحي تعال
خذ هالعشرين ألف
سلموها .. للمواطن أحمد سلامه
خذ الجريدة .. تلقى التفاصيل في الجريدة
خذها الآن .. وسلمها لأحمد سلامة
عبد الحي ..
أهم شي السرية والكتمان .
هذي أوامر السلطان ..
يخرج عبد الحي ..
ويتوجه لمكتبه في الحي ..
ويستدعي مساعِدُه أمين ..
ـ تعال ياأمين .. تعال .. شوف الجريدة
وخذ الألف هذي ..
سلمها لأحمد سلامه
ساكن هناك .. عمارة في آخر الشارع
جنب مدرسة الكرامة ..
الدور الرابع .. شقة ستة
وديها الآن .. وقل له
هذي من سيدنا السلطان .
واسمع ياأمين ..
احرص على السرية والكتمان .
هذي أوامر السلطان
أمين واقف ورا باب شقة
أحمد محمد سلامة ..
يدق الباب ..
صوت من خلف الباب ..
ـ مين ؟ .
ـ أنا أمين .. مساعد رئيس الحي ..
عبد الحي
يفتح الباب .. أهلين وسهلين ..
ـ هذا بيت أحمد سلامه
ـ نعم أنا أحمد سلامه
ـ أحمد محمد سلامة ؟ ..
ـ أحمد محمد سلامه ..
ـ ممكن إثبات
ـ طبعاً أكيد
ـ فعلاً أحمد محمد سلامة
سيدنا السلطان .. موضوعك استرعى اهتمامه
سيدنا بيسلم عليك
وحب يطمن عليك
وكلفنا ننقل لك رسالة :
سيدنا السلطان .. أدام الله أيامه
يتمنى للأطفال عندك ..
كل الشفا وكل السلامة
مبروك يا أحمد تستاهل .
مع السلامة

[ابوفواز]

::هُنَـا العـــراقْ::
الذكرى الرابعة
التاسع من ابريل 2003-2007

هُنَا العـــراقْ
في كل ركنٍ
حُرةٌّ تُسْبَى
وطفلٌ مُقعَدٌ
ودمٌ يُراق ْ..
********
هُنَا العـــراقْ
في كل بيتٍ
والدٌ يبكي
وأمٌّ تشتكي
ضَيْمَ الفراقْ
********
هُنَا العـــراقْ
هُنَا الأرضُ التّي
أعداءُها اغْتَصَبوا
وقبلَهُمُ الرفاقْ
هُنَا الخيرُ العميمُ المستديم
هُنَا الشعبُ الفقيرُ المستجيرُ
هُنَا الحضارةُ
والمنارةُ
والمهارةُ
والتطرُّفُ في الولاءِ
وفي النفاقْ..
********
هُنَا الطغاةُ على مَدى الأيام سادوا
هُنَا الغزاة على مَدى التاريخ بادوا
اليوم عادوا.. عانِقوهم
بشِّـروهم
هاهنا سيُقتَلون ويُخْنقون
من العِناق
********
هُنَا العـــراقْ

هُنَا الأمطارُ والأنهارُ
والأشعارُ
هُنَا الأفكارُ والأذكارُ والأقمارُ
هُنَا الكرامةُ والدناءة ُ والمودةُ
والتنافرُ.. والشقاقْ
********
هُنَا العـــراقْ

هُنَا الغناءْ.. هُنَا البكاءْ
وكربلاءْ
هُنَا الأحبابْ.. هُنَا زريابْ
هُنَا السيّابْ
هُنَا الحجَّاج.. هُنَا هارون
ماأدراكَ ما هارون
هُنَا المأمون.. هُنَا النوّاسُ من غيٍّ.. أَفَاقْ
********
هُنَا العـــراقْ

هُنَا البعثُ.. هُنَا العَبثُ
هُنَا الأصنامْ هُنَا الأزلامْ
هُنَا صـدّامْ.. هُنَا الأقدامْ
تدوسُ تِمثَال الزّعيمِ
بِلا اتفّــاقْ
********
هُنَا العـــراقْ

هُنَا بداياتُ الحضاراتِ الأبيّة
هُنَا نهاياتُ الشعاراتِ الغبيّة
هُنَا الثرواتُ تنسى الأغلبيّة
هُنَا الضَّحِكَاتُ من شرَّ البليّة
هُنَا الجيوشُ لأيِّ معركةٍ تُسَـاق
هُنَا جثمانُ أمتََّنا المجيدة
هُنَا دُفِنت مآثُرنا التليدة
هُنَا أمجادُ أمريكا الجديدة
هُنَا صار الخليجُ على الحديدة
هُنَا ذابَت بلادٌ
ذات يومٍ

إسمها كـان العـــراقْ
********