قالت يا حليوه..الحقنى عشان تعرف بيتى

[capitano]

السلام عليكم..كيفكم يا ربعى

ذيك الأيام..الله على ذيك الأيام

كان معيظ يدرس بصف الأول ثانوى ..بمدرسه بعيده عن البيت وعشان الحاله الماديه السيئه كان
يروح و يرجع رجليه و الغالبيه كانو كذا بس وضعه كان الأسوء كان يسكن مع ابوه و امه واخوه الكبير
وثلاث بنات فى غرفتين عباره عن صندقه على سطح عماره حتى الحمام ونتو بكرامه فى طرف السطح
من ناحيه ثانيه المهم ...لكم الخيال مره مطر مره شمس وكل يوم حاله..


يمر معيظ يومياً من طريق فيه مدرسة بنات عشان يختصر الطريق ....وفى ذاك اليوم الغايم وحده تمشى
قدامه وتتميلح ..واعطته سهم من السهام وقالت ياحليوه اذا تبغى تشوفنى بعد العصر تعال وراي واعرف بيتى
وكانت قمة الغزل ذيك الأيام يجى الواحد ويشوف طاقة البيت و البنت اذا كانت مخربتها تبين نفسها
ولا طرف منها من بين الستاير ويعنى بالغلط كمان.....المهم صاحبنا معيظ بغى ينهبل..اول مره اصلاً
احد يقله يا حلو واول مره وحده تكلمه وهو ماله فى هالحركات ....مشى وراها وعرف البيت...وكمل على بيته
لخبطت عليه حساباته و افكاره وعلى قولة محمد عبده..(لفنى مثل السحايب و المزون فى عيونى برق و
بقلبى رعد)
كوى ثوبه الرجال واول مانتهت صلاة العصر حضر فى حارتها...طبعاً القصه فى الطايف..
-والطايف احلى- ابن امه يدخل حاره ماهى حارته على طول مضاربه ودم للركب....فشاف معيظ مكتب
عقار جنب بيتها وهوى دخله وسلم و جلس قريب من الباب...كان فيه اثنين صاحب المكتب وواحد معاه منكبين على خريطه ويتكلمون على ارض و يتفاصلون فى سعرها..وراعى المكتب يقول لو اعطاك اياها ب250 الف انت الربحان.. فى هذى الأثناء معيظ يطالع فى بيت البنت والطيق ويتلفت لا احد يكفشه...شويه وخرج الرجال
وقال راعى المكتب وش عندك يا ورع...طبعاً اثرت فى نفسه ذا الكلمه ...ورد معيظ انا رجال مانى ورع..طيب
يارجال وش تبغى ..قال ابغى اشترى الأرض الى تتكلمون عليها من شويه...قال من يبغاها قال انا ..وابغاك تورينى ايها...طبعاً على مضض تلحلح راعى المكتب وقفل المحل وراح يورى معيظ الأرض الى كانت
فى نفس الحاره ورى بيت البنت ...وشاف الأرض و اعجب بها ..وهو من جنبها لا يفهم فى العقار ولا شى اولى ثانوى يا هوه..المهم قال بكم تبيعها ..على باله خضار..قال راعى المكتب صاحبها يبغى فيها 280 الف..قال معيظ لالا ..مستحيل كلم صاحبها اذا يبيعها ب 250 انا شراى و فلوسى جاهزه.....قال راعى المكتب
طيب جيب عربونك بعد المغرب وبزهم راعيها و نشوف وش يقول......وافترقوا على كذا

بعد صلاة المغرب ...كان معيظ محضر فى المكتب و معاه 5000 ريال عربون ....و تفاجئ راعى المكتب وقال ذحين ابزهم راعيها...وبعد فتره جا راعيها وقابل معيظ وقاله انت الى بتشترى قاله ايه انا و هذا عربونى
وكان صاحب الأرض شهرى وانبسط من مرجلة معيظ رغم سنه الصغير ....وقال طيب ب250 وتوكلنا على
الله ...انبسط معيظ وقال عندى طلب ..قال الشهرى وش عندك ..قال ابى اعطيك كامل المبلغ بعد شهر بالظبط
وارجوك لا ترد طلبى ..قاله تم...

خلونى اقولكم شى هنا
يوم من الأيام فى سنه خامسه ابتدائى كان معيظ يتفرج على بباى(فلم الكرتون)...وكان منسدح على ظهره
ورجوله على دولاب التلفزيون يتابع ...دخل ابوه وبكل قسوه ركل رجوله بغى يطيره ..قم شف لك شغله
وساعدنا بلا هذ التسدح انت فاشل انت يخطيك و يرضيك ومن هذا الكلام......طبعاً من ذاك اليوم الى اليوم هذا
وطول السنين ماقد اخذ معيظ من ابوه ريال واحد واعتمد على نفسه...طبعاً خرج من البيت وراح عند جارهم
باسمح واشتغل فى الدكان معاه واعجب بمعيظ وامانته ...طبعاً الحاره حقتهم اغلب الى فيها حضارم وافضل
بمراحل من معيظ واى اسره سعوديه فى ذالك الحى ..تنقل معيظ من محل الى محل و من تاجر الى ثانى
لدرجة فتره من الفترات كان يخرج من المدرسه يشتغل فى شغله الى العصر وبعد العصر مكان ثانى
وبعد المغرب مكان ثالث .....طبعاً فى المدرسه من المتفوقين دائماً
فكان معيظ يساعد اهله و يحط الباقى فى صندوق عند فراشه

......
نعود للأرض..
لما تواعد معيظ مع راعى المكتب ...رجع للصندوق واخذ 5000 ريال وكان فى الصندوق حوالى
36 الف تحويشة سنين
وسوو عقد مبايعه ....ومن وقتها رجع معيظ لخاله الى كان بمثابة الأخ و الصديق و الأب
وقاله على الأرض ووراه العقد...وقاله سلفنى انا عندى 30 وخل الموضوع سوكيتى
واعطاه 70 وكملت معاه 100وراح لباسمح ووراه العقد وقاله باقى 150 عطنى الى تقدر وبردها
لك فى 10سنين واعطاه 50 الف ....وراح لكل التجار الى يشتغل معاهم واخذ من هذا 10 ومن
هذ 20 و من هذا 12 وزى كذا حتى كمل المبلغ 250 الف فى نص المده اسبوعين بس....ورجع
معيظ لمكتب العقار وتواعدو فى المحكمه اليوم الثانى بعد الظهر ...

فى المحكمه طلبوا التابعيه حقة معيظ...وقالهم اية تابعيه ما عندى ايش دخل التابعيه فى الأرض
قالوا لازم ماتتم اى بيعه الا كذا..قالهم طيب...ورجع معيظ لخاله ...الى ساعده فى الأحوال وطلع له
التابعيه فى يوم واحد ....وتواعد مع الشهرى وراعى المكتب اليوم الثانى وراحوا المحكمه ..واخيراً
افرغوا الأرض بسم معيظ.....ونشب راعى المكتب يبغى الدلاله...وبعد جهداً جهيد رضى ب1000
ريال وزيد 500 الأسبوع هذا و 500 الأسبوع الجاى.

طبعاً بعد ما اخذ الصك معيظ كل ما سنحت الفرصه اخذ الفرشه وفرشها فى وسط الأرض..وتربع
فيها ...ارضى ملكى حلالى.

..............

اذا عجبتكم القصه كملتها فى وقت ثانى.....

[بہرسہتہيہج]

هههههههههههههههههههههههههههههههههههههههههههههههههه هههههههههههههههههههه

ماانت صاحي ياهووووه ..

اجل ملكي حلالي ههههههههههههههههههههههههههههههههههههه

بالله كمل ولاتقعد تسحب فينا ههههههههههههههه

[capitano]

السفير اهلين وسهلين

[ريانة العود]

ذكرتني بواحدن كوذيه دخل محل ماركه خونفشاريه نسيت مذاهي
المهم اخذ خمس كابات وعاد وده يحاسب بس باقي يبغا يختار واحده منها والواحده بذاك الحساب
فقال كوذيه الا وراه بنتين ينتظرون دورهم فاستحى منهم وده ييود انه في حياتي فحاسب على الخمسه وباقي حرها في قلبه الى ذلحين

[capitano]

اهلين ريااااااانة العووود

كثير الى يفغرون ..بس معيظ فغرته غيرت حياته للأبد
تابعى القصه ...بس قل حيلى ذلحين.

[capitano]

نكمل شويه لعيون السفير و ريانه العود و المستمعين

وصلنا فين......
قلنا الرجال صار يحضر فى الأرض ...ومعاه الصك يبغى يحطه فعيون الى يقول تلت التلاته كم.....وكل فتره يمر عليه
راعى شاص يتلفت عليه ويمشى .....وفى يوم من الأيام صاده معيظ ....وش عندك هنا هاااه....قال يا ابنى انت ايش
عندك هنا ...كل ما امر القاك هكذا

قاله انا صاحب الأرض وهذا صكى وانا حر....وكان راعى الشاص شايب يمنى اسمه على عزيز..قاله اى خدمه يبنى
قاله معيظ لا
واستمر يمر على عزيز ...ويسلم ...ويروح ..من بعيد لا بعيد...ومره جا عم عزيز وقا اسمع يا معيظ ليش ما تشتها
(تشد العماره)..قاله ياعم ماعندى ولا هلله ....قاله اسمع يا وليط(وليـــد) انا مقاول و قد أمرت نص الحاره الى باتشوف
توكل على الله وانا اشتها لك ...وكل ما جا معك زلط (فلوس) نكمل واذا شحت نوقف وهكذا و بصبر عليك .......
عدل جلسته معيظ ....وقال شتها يالله شتها من بكره ....قاله يبنى لازم نسوى خرايط ولا معك تشاهزه(جاهزه)
قال معيظ ..اية خرايط .....قام عم عزيز و شرح له من الألف للياء ..ومن بكره ركب معيظ مع على عزيز و راح به مكتب
هندسى يعرفه وسوو الخرايط ب 6000 ريال كانت متوفره مع معيظ ....وكان عم عزيز يعدل و يزيد و ينقص حتى
وافق على رسمها النهائى ...ومعيظ عضو شرف فى الموضوع لا ناقه و لا جمل (طبعاً الخرايط هذى بعدين بنا معيظ بها 7 عماير قولوا ما شاء الله).

...وبدا ابو يمن فى الأرض يحفر...



بريـــــــــــــــك لو سمحتو هاف ابريك هاف اكتكات

[ريانة العود]

خلصت الحكايه؟

[capitano]

القصه مازالت مستمره ...نكمل


بدا عم عزيز فى الحفر و البنا ...شويه شويه و معيظ يعطيه شهر وثلاثه لا و قبل الحج تسلف معيظ 50 من خاله
و 50 من با قادر وزاد عليها تحويشة ذيك السنه واعطاها عم عزيز بعد صلاة الفجر وبغى يطير فرحه....
المهم تفاجأ معيظ فى نفس اليوم قبل العصر...بعم عزيز داق بلأحرام ومحمل الشاص زيود ...يشتو يحجو!!

وقف عم عزيز عند المحل الى شغال فيه معيظ ..وقدام الزباين وامام دهشة الغاضبه ...حلف بأعلى صوت
انا نفسى احج ووالله ما اخونك وهذى رقبتى وامام الكل انى اذا رجعت اشتها من كيسى حتى اخلصها عظم
واشهدو يا جماعه...
ما كان من معيظ الا انه وافق....وفعلاً رجع من الحج وبدا بهمه وعزم قد ما قدر....ما جاء الحج الثانى الا
و العماره كامله عظم .......فى الوقت هذا خلص معيظ الثانويه وكان جهده فى العمل مضاعف...

قال يا عم عزيز ....كم يبغالنا حتى نخلصها كامله؟...قال التشطيب يبنى يكلف اكثر من العظم ...بس اشير
عليك واساعدك نشطب الشقتين الى فوق...عشان تتأجر وتنقط لنا....وطبعاً انبسط معيظ مافيه الا كذا...
وبدا عم عزيز فى تشطيبها عشان يخلصها فى ريب و رينب و الشهر ذا ينب...واما معيظ نزل جده من الماقفه
وقدم على الطب وقالو له ...انتهى التقديم ورجع حزين ...وسمع ان القبول مازال مستمر فى الرياض وركب
الطياره لأول مره الى الرياض عشان يلحق ...وللأسف مالقى الا هندسه...توكل على الله و دخلها يدرس و
يشتغل انتهى الترم الأول ورجع لقى الشقتين زى الى يتمنى ...والعماره نظيفه وعليها بيبان حديد فخمه
انبسط مره ...واعطاه عم عزيز المفاتيح ..وقاله متى تيسر لك وفنى ....طبعاً معيظ اعطاه الى حوشه فى الرياض
ووعده انه يوفيه دينه قبل اى احد

ايـــــــه الدنيا باقى فيها خير و الحمدلله

رجع معيظ ليلة رمضان وقال لأبوه ....يبويه ابغاك تروح معى مشوار ونرجع؟...وين!!؟...امش معى وبقلك
نزل معيظ و ابوه الشارع ...وأجر تكس وركبو( مين يركب تكسي ذيك الأيام) ومشو لاعند العماره..وقال لتكسى
لا تروح...ونزل وطلع المفاتيح و فتح الباب ...وذهل ابو معيظ...وصاح عمارة من ذى؟ ... قال معيظ تعال تعال فوق
وبقولك..فتح الشقه الأولى ماشاءالله تبارك الله ...وعاد السؤال منهى له ياولد؟؟ لى يبويه لى عمارتى ..من فين لك
تسلفت جزء وساعدنى خالى و فلان و علان و علان

خرج الأبو مسرع و نزل وراه معيظ و يقفل ...ووصلو البيت ..واول ما دخل السطح اغمى على معيظ

فى آخر الليل فاق معيظ و اخته الى زواجها فى العيد تبكى عند راسه والثنتين الثانيات و امه ...اشبكم اش فيه؟

طبعاً تدارك معيظ الألم ...اول مادخل السطح رنه ابوه بخشبه على راسه ودمان وراسه ملفوف وحاله

قالت اخته الكبيره ايش سويت ابويه يقول انك سودت وجهه و ضيعت سمعتنا..... قالهم معيظ سالفة العماره
واسألوا خالى كمان و عشان تتأكدين روحى شوفى علبة النيدو الى عند ملابسى كل من دينى كتبت اسمه
والمبلغ الى له...ونا رحت ابغى افرحه وصراحه نبغى ننقل من ذا العيشه ونسكن هناك.

راح اخو معيظ وزهم خاله...و جا حكى الحكايه وان معيظ طلب انها تبقى سر و تسحر معاهم
...وطبعاً وهم على السحور قال الأبو خلو معيظ يجى يتسحر!! كان فى طرف السطح ولا يجرء
يدخل من غير اذن ابوه...و الأذن عباره عن عفو شامل مؤقت ينظر فى حال المتهم و يؤخذ
عليه زيادة ادله تثبت مانسب اليه

...........

فى اليوم الثانى بعد ما افطرو اول فطور فى رمضان...

اقول...اكمل بعدين والى يدخل الموضوع اقلها يسلم مو رد السلام واجب!!

[capitano]

راجعت ما كتبت..مليان اخطاء فى الأملاء بعضها للهجه وبعضها خطاء غير مقصود
الى يقراء يعدلها فى مخه
قل حيلى

وصلوا على الحبيب ...

[بہرسہتہيہج]

معك معك معك معك

[ريانة العود]

افتكو لحي البو

[capitano]

خخخخخخخخخخخ
استغفرى

وحياكم

[بہرسہتہيہج]

هههههههههههههههههههههههههههههههههههههههههههههههههه ههههههههههههههه

[أبو مانع]

قرع مايشين يامعيض
ماعاد ورى رأسه رأسه ذلحين
غير كأنه نسي من البنيه وعاد قلبه بالعقار
ولا هو باااقي يتبحلق في الطاقه في الرايح والجاي خخخخخخخ

الله يستر عليك يامعيض
وصدقني إن فيه الف معيض
لكن تلاقي من يكسر طموحاتهم
ويقلل من هممهم وهذا سبب
تعاسة الكثييييييييرين ..

لي عوده بعودة معيض والأحداث الدراماتيكيه ....

[capitano]

اهلاً بالجميع ...
وحياك ابو مانع..معيظ وليس معيض يسلم عليك ويقول
اعذرونى فى الهوى يهل الملام و السبب نظره وربى قد بلانى بالسهام

........

انا ما احب التعليق و المماطله لكن اهم الشى الرواقه....اروق فى الخامس
واكمل القصه..

[capitano]

اهليـــــــــن و مرحبتين نكمل شوى

نترك المايك لمعيظ:
تعرفون رمضان و جوه الحلو-الله يبلغنا وياكم رمضان-
المهم جا مطر فى العصر غسل الدنيا و تساعدنا فى غسل السطح والدرج و كن ابويه روق
...وبعد الفطور راح ابويه يعتمر مع مجموعه من الجيران و الأقارب
ونا تنحت شويه كالعاده ... بعدين قلت ياامى ابغى اوديكم العماره ونتشوفونها ..اخذتهم
واحنا فى الشقه والفرحه باينه عليهم قلت تكفين يامى ما نبغى نعيد الا هنا...طبعاً ما يجيبها
الا نسوانها

عشره ايام بس وصدر مرسوم بالنقل وفعلاً عيدنا فى الشقه ...وجانا العريس يعيد وكذا
فمسكته ودخلته الشقه الثانيه واوجس فى نفسه خيفه..وقلت له هذى اعتبرها هديه او رفده
الى هيه وافق على طول ...وبعدين صار فيها حلف وما حلف انه ما ياخذها الا بإيجار..واتفقنا
على حل وسط إيجار رمزى.

رجعت الرياض وكملت دراستى و شغلى و اشتريت مازدا تمشى على ورى اكثر من قدام وكملت
فى الهندسه سنتين وطبعاً كل فرصه اكون فى الطايف..

ذيك الصيفيه وكانت ليلة رمضان كمان جانى ولد عمى وقال ابغى تنزلنى جده ..فيه تقديم على الطيران وماعندى سياره...وبعد الحاح شديد وافقت ...وتسحرنا وبسم الله على جده ...
وقفنا عند الخطوط وقلت له انا بستناك فى السياره بحاول اخذ لى غطه وولد عمى هذا من النوع الخجول
نزل شويه و رجع قال بالله انزل معى ما يصير كذا....نزلت معه ودخلنا مكتب انتظار وفى طرفه باب للمدير
كل شويه يدخل واحد عنده ويطلع ويجى ويدخل غيره واحنا محلك سر ما احد زهم ولد عمى ولا شى
....قمت وفتحت الباب وشفت واحد طرش وكرش من النوع الى ما اهظمه... ونا راجع الا هوه
يصيح على الى ياخذون الملفات طلعوه برى ..طلعوه برى هذا يبغى يصير طيار..
طبعاً وش تتوقعون صار...اكمل لكم بعدين ولا كاتب الموضوع يكمل سلام.

[بہرسہتہيہج]

الي ودك بس كمل ..:)

[capitano]

ابشر بكمل فى اسرع وقت ان شاء الله.

[capitano]

طيب انا بكمل ..استرح يا معيظ

......

طبعاً معيظ صايم و مواصل ومسافر ...والأخ شعره طويل والشماغ على كتفه -تبكل طايفى- لما انتبه انه المقصود
بالكلام رجع على الدب ومسكه من تلابيبه وقال- ليش ما اصير طيار ها.. اصير و غصبن عنك يا ......ويا ...يا
الحاصل افطر عليه ...ولا احد قدر يحرك ساكن ونزل معيظ يقلب فى شنطة السياره - تعرفون ما يخلى فرصه الا يقدم عليها
وعنده ملفات بالهبل ونسبته 96 علمى قولوا ماشاءالله - اخذ واحد من الملفات ورجع للمكتب ودخل على المدير وقاله هذا ملفى وتقبلنى الآن انا وولد عمى وغصبن عن الى - طبعاً يحلى بعد الفطور الدسم- قاله بن ياسين (المدير) واللهجه متغيره ...ملفك كامل و السكرتاريه يعلموك ايش تسوى قال معيظ- انت الى بتعلمنى و تسوى كل شى يا ...._كاسة مويه_علمه موعد الأختبار التحريرى وكان بعد العيد
وراح الأختبار كان فى مسرح ادارة التعليم ومليان فوق 1000 متقدم ..وكان لغه انقليزيه...10 دقايق وسلم الورقه ..الى اخذ
منه الورقه قاله راجع عندك وقت قال مانى مراجع...ايش فيه بعد كذا ...قاله النتايج بعد اسبوع تتعلق عند العماره الزرقا
طبعاً هى خضرا - بس الناس تعكسها ليه ما ادرى-
طبعاً بعد اسبوع ...نزل هو ولد عمه و قد تعرفوا على حوالى 20 واحد من المتقدمين ...ما نجح منهم الا معيظ...حتى ولد
عمه ما طلع اسمه...بعد كذا حددو المقابله الشخصيه بعدها بشهر الساعه 9 الصباح.

كوى الثوب والشماغ ونزل وفى الطريق ..بنشرت السياره وقعد يعافر فيها وصلحها و توسخ ثوبه وتلخبطت الشخصيه
وصل اخيراً الساعه 10 وكانت الأمور عاديه باقى واحد بيدخل بعدين هوه وهم عباره عن لجنه مكونه من 5 اشخاص
من التوظيف ومن التدريب ومن الطيارين

الطريقه يطلع واحد من اللجنه وينادى على المتقدم ويبدون معاه من دخوله...الى نادى معيظ كان هو الشخص الى يراقب و استلم ورقة اختبار الأنقليزى اول.


اكمل بعدين

[بہرسہتہيہج]

على القوه :)

[capitano]

حياكم

قلنا جا الى اخذ منه ورقة الأجابه اول وقاله تفضل وكأنه مستغرب من دهملة معيظ .......دخل معيظ اول واحد جات عينه عليه بن ياسين..حق الملفات و ومعاه كابتن قبانى واثنين ثانين
....طبعاً فنجل عيونه فى بن ياسين ولسان حاله يقول تراك ما شفت شى

قاله كابتن قبانى قفل الباب .......قاله معيظ مقفل ...(يبغون يلطفون الجو) ياواد بس طل يمكن ما انقفل...لف معيظ زى
لمح البصر بس عبط ...وقال مقفل
قاله بن ياسين ...ليش ملابسك كذا ....وحكاهم قصة البنشر و جيته بسرعه وانه من الطايف ....بعد سأله واحد منهم
قاله ايش تعرق عن الطيران ....قاله معيظ مثل ما تعرف عن البقر....وعاد له السؤال وعاد معيظ نفس الأجابه ...
قاله كابتن قبانى يا ولدى ما تعرف اي شى عن الطيران .....قال معيظ الطايره ركبتها تودينا من الطايف للرياض و العكس
وسألوه عن حياته العمليه ودراسته وكانو منبهرين منه...وفى نهاية المقابله قاله واحد منهم خلاص تقدر تروح وراجع
التوظيف بعد شهر......
قال لهم كيف يعنى ...حلوه ذى ...مانى طالع من هنا حتى تعلمونى نتيجتى و بعدين ما اعرف الا بن ياسين ما عرفتونى
عليكم...قام بن ياسين و عرف اسمائهم ورمى هرجه للكابتن قبانى...
قبانى قال.....اهااا هو انتا....طيب انا بسألك يا معيظ سؤال واذا جاوبت عليه اجابه مقنعه اقولك مبروك من دحين!!
قاله معيظ اسئل؟
قال لو انتا فى المجلس وعندك ضيوف اصحاب و رجال و فجأه دخلت اختك عليهم عريانه!! ايش موقفك؟؟
معيظ قال عيد السؤال..بلهجة حازمه.
عاد له نفس السؤال

سكت شويه معيظ وقال ...عادى اعطيها رضاعتها واقلها يالله عند ماما عيب.

قاموا الى فى اللجنه يطالعون فى بعض-سكتهم- وقاله قبانى مبروك القبول
باقى لك الفحص الطبى ..تقدر تسويه الأسبوع الجاى

..............

بعد الفحص واجتيازه .....اتصل التوظيف على اخو معيظ فى العمل وقالوا معيظ ما جاب الشهاده الأصل ضرورى يجيبها
والدوره تبدأ الأيام القليله الجايه

اتصل الأخو على الجامعه فى الرياض وقال ضرورى يكلمنى معيض...ولما كلم اخوه
قال يخوى انت قدمت على الخطوط ترى اتصلوا ويقولون انك مقبول ويبغون الشهاده الأصل
قال معيظ...انا قدمت بس بهلله عشان واحد فقع قلبى عندهم و تحديته وانتهت الحكايه
سلام سلام
قعد يقلبها معيظ وسأل هنا وهناك وحسبها حسبة حضارم ...لو تخرج من الجامعه اقدع وظيفه ب5000 آلاف ومتى بعد
ثلاث اربع سنين من الأن ..ولو دخل الخطوط سنتين ثلاث بالكثير ويدق فوق 10000
سحب الشهاده وانسحب من الجامعه وكمل اوراقه فى السعوديه ...

واكمل بعد شويه ولا شويتين.

[ريانة العود]

مذاب السكني ذيه يوم يقطع العلم انا اقوم اهل سنونه؟

[بہرسہتہيہج]

يلا ..........

[capitano]

احتشمى يامره واذجاك نما فسميه معيظ عسى وعل ينصلح حاله.

.........

كمل المتطلبات فى الخطوط ...وحطها فى راسه من جد عشان يوفى الديون الى عليه
ويوم جاء موعد الدوره اجلوها 3 شهور وبعدين زيها ...تقريباً 9 شهور ضيعوها عليه من الجامعه
لكنه كان يشتغل مع الأولين فى الطايف...الين بدأت الدراسه ....طبعاً الطيران و التدريب و السفره
الأولى لأمريكا ...يبغى لها مجلد كامل وليست موضوعنا الراجل ما يختلف عليه اثنين فى مهنيته واخلاقه
العاليه .......
فى سفراته كان يجيب العود الخشب والدهن من سيرلانكا وكان يجيب السوارى حقة الهنود وكان يجيب
الجلود والشنط و الأكسسوارات ...وما خلا شى طيب الا تاجر فيه...طبعاً كمل العماره وسدد ديون الناس
كلهم -وعدهم فى 10 سنين ووفاهم فى 7 - ما عدا عم عزيز اختفى يقولون توفى ...صار معيظ
يسأل و يسأل ووصى يمنه فى الطايف قال لهم ترى انا سلفت عم عزيز 60 الف وما راح اسامحه
الى يوم الدين وكرر الموال هذا فتره.....حتى جاء واحد من اولاد عزيز وقاله وصلنى الخبر
وجمعنا لك 40 ونشتيك تسامحنا فى الباقى وتستغفر (لأبى)
اخذه معيظ و اكرمه ....ورد له ال 40 وزاده فوقها شيك ب800 ألف حقة شغل ابوه ...وعلمه بالقصه
وقال عم عزيز لايمكن انساه ولا انساكم واعتبرونى اخوكم ...طبعاً بعض ابناء عزيز لايزال يعمل مع معيظ
وفتح الله على معيظ واصبح من كبار التجار - كابتن و شهادتين بكلوريوس وحده علم اجتماع من عبدالعزيز
والثانيه ادارة اعمال من هارفرد وقبل فتره بسيطه رفض مناقشة رسالة الماجستير لأن الى بيناقشه...يهودى
بنته الكبيره حافظه 17 جزء من القرآن وابنه يحفظ القرآن كامل .
..آخر مشاريعه الى شغال عليها الأن بناء مستشفى فى الطايف يجمع بين الكفائه الطبيه والأسعار الرمزيه لله وفالله

ابو معيظ يشرف على مزرعه كبيره للخضار و الفاكهه وفى طرفها مالا يقل عن 600 رأس من الغنم -لازم الغنم فى
مواضيعى-
يعيش معيظ فى جده اسبوعياً يدخل بيته مالا يقل عن ثلاث ضيوف تقام لهم كامل الضيافه والواجب سواء كان موجود
او فى رحلة عمل.

...............................
..............................

بعد ما سمعت قصته كامله
.......قلت له وش اخبار ذيك البنت طيب......قال ادعى لها بالتوفيق هى وذريتها.


-انتهت-




............................

القصه لامست بعض جوانبها....
كل كلمه كتبتها هى المناسبه ولا يوجد اى مبالغه او زياده او تأليف بل على العكس

.........

دعواتكم الطيبه
والسلام عليكم

[بہرسہتہيہج]

وعليكم السلام ..

بس تبي تقنعني ان السالفه صدق ؟؟

[ذات الشان]

تابعت القصه من بدايتها ولي رأي لو تسمح لي ابديه بتجرد

اولا
طلعت منت بهين وتكتب قصص
ثانيا
لك اسلوب جيد وتعرف تشد القارئ انه يتابعك
ثالثا
القصه يبدو من سردك لها انها حقيقيه وهذا ليس مستغربا على الجيل السابق كانوا رجال بكل ما تعنيه الكلمه من معنى
ومن خلال قصة معيظ شفنا كيف كان حتى الغريب عن البلد انسان فعلا ( بن عزيز المقاول )
ولو تلاحظ الاان انه حتى الاخ صار يتعب اخوه ولا يمكن ياخذ منه قرش بدون مقابل او لا يمكن يسوي له شغله بدون ماياخذ ثمنها
وكمان ليته يسويها بامانه ويجيبها زي ما اتفقوا عليها
شوف القصه هنا لاعقود ولا محامين ولا صكوك ومع ذلك وفى الدين لاولاد الرجل بكل صدق وامانه
جد والله قصه توجع القلب مو من احداثها لكن من اختلاف واقعنا الان عن ماحدث في هذه القصه الرائعه

رابعا
يا اخ كابيتانو
استمر في كتابة مثل هذه القصه بس بتأني شويه وركز ولا تستعجل لتصل الى النهايه
يبدو ان لديك موهبة كتابه يمنعك من تطويرها انك مستعجل وتبغا توصل للنهايه باي شكل


خامسا
ماقصرت شديتني لقراءة القصه ومتابعتها من البدايه

سادسا

يعطيك العافيه .

[capitano]

القديره ذات شان
الله يعطيك العافيه ..كلامك يبرد القلب
وتوجيهاتك تشكرين عليها

وان شاء الله ان الناس باقى فيهم الطيبين الخيرين مهما دار الزمن

الف شكر.

[ريانة العود]

يانعني عاد شين بحسه
قصتن دوايه غير فكري ينعني انه بيصير حاجات واشياء مدري كيف

[capitano]

الله يحييك والدور عليك بقصة دواين اطردى فيها ورى خيالك
وربنا الشافى المعافى يشفى و يعافى امك..يا رب.

[ليالي جنوبية]

الله يعطيك العافية

سرد القصة جميل جدا ويشد القارئ استمتعت بها

استمر ونحن في انتظار جديدك

[capitano]

الله يعافيك ليالى الجنوبيه
و تسلمين على التلبيه.

[capitano]

حبيت ارفع القصه...لمن يحب ان يقرأها
.......

[نواااااره]

اوووووه عاين البنت تيه وجه خير على معيظ .

بصراحه ابدعت اخوي الروائي القدير كبيتانو .. :)


يستاهل التثبيت و خمس نجووم .

[capitano]

تسلمين نواااره ....ويعلى قدرك
شرفتى.


نواااره اشعر بأنى عبده خال ...الله يسامحك والله ياخذه.

[мℓк]

captiano

معيض ذيه هو اليني المصري اللي بكندا >> http://www.k5ka.com/vb/images/icons/icon10.gif امزح

يـآ لبـآآآآهـ قصه روعهـ ربي يخليلك هالانامل تستاهل التقييم والله,, وسوري توني انتبه انك كاتب قصه استمر والى الامام والله يوفقك واتمنى تكون اطول من
كذآ >> روايه يعني http://www.k5ka.com/vb/images/icons/icon10.gif

عــوآآآفي خيوو ..

[capitano]

خخخخخ
الله يعافيك و يخليك حوسة مشاااعر
شرفتى.

[نواااااره]

ههه حلوه عبدو خال ..

لا لا انت احسن منه ان شاالله اخي الكريم لكن استمر ..

[capitano]

خخخخ لا تذكرينى نسيت
الله يعطيك العافيه نواااره
وتسلمين على التثبيت

[بن ظافر]

الف شكر الله يعطيك العافية

[capitano]

الله يحييك بن ظافر
وسلمت

[تراتيــــل]

قصه رائعه وأكتملت روعتها بطريقة السرد
وفقك الله أخوي كبيتانو وتستاهل اطلق تقييم..

[capitano]

هلا و غلا يمك دروبي
حضورك الروعه تسلمين