إلى الشاعر جبرني الوقت

[الخطاف]

البدع



الصاحب اللي بداء له مده يجلّي

ان كان جا فرح به قلبي وهَلابه

وان راح مابقعد أدوره وارجاله

محبته ماهي بفرض ن ولزّماني

[جبرني الوقت]

الرد :
قبيلتي درعي وفي الضيق فوج لي
بني عمرو لابتي من مثلها لابه
كسارة الترك والباشا مع رجاله
والفخر والعز معنا طول الازماني

[الخطاف]

صح لسانك ياجبرني ولاهنت رد رائع وتشكر عليه



البدع


مزايـن الإبل حلــوات ن وراقتلي

وكـل شكـل وله سعر ن وجَـلابه

تشاهد البدو كلــن يعرض اجمـاله

يجولها من عفيف ومن حلاباني

[جبرني الوقت]

صح بدنك ..
الرد :

حبيّب الروح حبّه من ورا قتلي

غدا عليّه واخذ قلبي وولاّبه

يعجز به الوصف والتعبير باجماله

الزين منه يتزيّن والحلا باني

[الخطاف]

البدع



جبرني الوقت وش بـ الحــاج متولي

من شان حب العذارى يزعـل اقرابه

ولّوا عليه الهوانم ضيّعــوا مـــــالــه

ولابقي عنده إلا اثــنيــن فــــــدّانــي

[جبرني الوقت]

الرد :

اللي تولّع بدرب الحب متولّي

حتى كتابه نسي ما عاد يقرابه

لا عاد تنشد عنه وتقول وش ماله

من شان خله يفدّيكم وفدّاني

[أبو ريان]

قسماً بالله قمة وإبداع بلا حدود ..
الخطاف وجبرني الوقت لله دركما على هذا الذوق الرفيع ..
معاني جميلة شقور مميّزة جداً وتواصل لا يُعلى عليه ..
متابعين لهذه الروعة وعساكم على القوة ..

[يوسف آل عايش]

متابع بكل اعجاب
جبرني الوقت والخطاف
ماشاء الله عليكما

ولازلنا نتابع .....

[الخطاف]

أستاذنا الفاضل وقائد مسيرتنا ابوريان
حياك الله في هذا المتصفح واشكرك على هذا الاحساس
الذي ينبع بالحب والوفاء لجميع أعضاء المنتدى
وتواجدك الدائم وتشجيعك المستمر شرف لي
ومنك نتعلم ونستفيد طال عمرك
ومرورك واشادتك وسام اتباهى به
وان لم يشيد بماقدمته سواك لكفاني ذالك
تحياتي وخالص مودتي
ودمت لمحبيك

[الخطاف]

أخي ابويعقوب حيّاك الله
مرورك مهم ومتابعتك تسعدنا وتزيدنا شرف وأعتزاز
فلاتحرمنا من هذه الطلّه البهيّه
ودمت في خير وعافيه

[غليـــــــص]

والله ابيات جميله ومعاني اجمل

لله دركم يالخطاف وياجبرني الوقت

[الخطاف]

البدع


اهــل الــرباء لـوتـزايد مالهم قـلّي

وســوقهــم مــايبـايع به ويـشــرابه

والتاجر اللي يغش الناس بااعماله

قـلبه عمــاه الجشع ماكــنه أنساني

[جبرني الوقت]

صح لسانك يالخطاف ...

الرد

يا صاح وشب العواذل مالهم قلّي

حبيّبي من وراهم مدري ايش رابه

متغيّر(ن) صار بأسلوبه وبأعماله

الله يـلــطــف بحالي كــانـه انساني

[جبرني الوقت]

ابو ريان

يشهد الله ان شهادتك تاج ع الراس ووسام على الصدر ..

واشكرك على تشجيعك وبإذن الله يجمعنا بك محاورة في القريب العاجل ..

يوسف العمري

أشكرك على متابعتك لنا ومرورك هنا ...

غليـــــــــص

حياك الله والجمال روعتك وحضورك بيننا ... وباقي بنلتوح لك ..



إحترامي

[الخطاف]

هلا وغلا
حياك الله ياغليص
والابدااااع مرورك العذب والراااائع
تقبل خالص التحايا ياغالي

[الخطاف]

البدع


هنّيه الطــير ذا في الجــو متعـلّي
ما بين غُر السحاب تحلّق اسرابه
في كـل لقـطـار تتنـقـل وجــوالــه
وانا ذبحني شقا روحي وعنواني

[جبرني الوقت]

الله واكبر عليك يالخطاف ..

وانا ذبحني شقى روحي وعنواني ....


الـــــرد

يا أهل الهوا صرت ذا اليومين متعلّي
من بعد ما سار قلبي مع من اسرابه
قولوا له يرد لا من دقّ جـــوالـــــــه
وإني بمشفى عسير إسمي وعنواني

[الخطاف]

سلامات سلامات ياجبرني ومخارج من الشر والويح لي عنك
وانا علمتك من زمان ان الحاج متولي وراه مشاكل غير ماطعتني
لكن ما اقول الا الله يهب على الدنيا معونه
ههههههههههههههههههههههههههه

وهذي القصيده أعتبرها مواساه لك وتقوم بالسلامة


البدع

م الحب ومتاعبه مااني على جلّي

ياما مشينا في أدروبه وتُهنابه

والحب بحر عميق طحت بأهواله

حسبي على من رماني به وخلاني

[جبرني الوقت]

الله يسلمك يالخطاف ...
والحاج متولي الله ربنا وربه


الرد :

وين الدواء وين انا بلقى علاج لّي
ياجعل من دلني الأفراح تهنــابـــه
سبة وليف(ن) جرحني واعشقه وآله
ومن اجله إنسيت صدقاني وخلاّني

[الخطاف]

البدع




سيوفنا يالعـــرب يا ليتها إتســلّي

ومجلـس القمة يمنعنا من اشجابه

عــدونا وصل مقصوده ومانــواله

وربعنا بعد في شجب ن ولوماني

[جبرني الوقت]

الرد :

ياروحي تونسي ذا اليوم واتســــــــلّي
وان جاك وقت العنا لاتقولي ايش جابه
لك صاحب(ن) ماعرفتي كيف منوالـــه
ولـسـان حــالـك يقول الله...... لوماني


لوماني : بمعنى يمون

[الخطاف]

جبرني الوقت
صح لسااااااااانك على هذي الردود المجمّله
ردود ولا احلى و ابداع بمعنى الكلمه
ولاغراااااااااابه
وهذه القصيدة سوف تكون ختام المسك للمحاورة
وبعدها في قصيدة لعب عشان عيون اللي يحبون اللعب

جبـــرني الوقـــت مــن خـــاواه ماذلّي

ياصقـــــر شيهـــان يتغـــذا بمخـــلابه

لـو يطلب الــروح ترخص له وتفداله

لانه ماهو طيرعادي صقر شيهاني

[الخطاف]

البدع

ياسلامي على الاعضاء جميع ومنتدانا

منتدى ن فرق عن كل المواقع في رقيّه


الرد

وشبنا بعد ذاك الحب سرنا منتدانا

يوم طعنا هل النمكات سرنا فيرقيّه


تحياتي وإلى اللقاء إن شاء الله

[جبرني الوقت]

الخطاف
اشكرك في البداية على قصيدة اللي مدحتني بها وانشالله اني استاهل ..

ولي الشرف بأن تكون لي محاورة مع شاعر متمكن مثلك ..

وصح الله لسانك وبيّض الله وجهك ...


وانشاء لله المحاورة نالت استحسان الجميع ..


إحترامي

[الخطاف]

الأخ العزيز والغالي جبرني الوقت
أكرر شكري لك على الردود وعلى المحاورة الجميلة
وانا في الحقيقة تشرفت بها كثيراً وتبقى من أحلا وأجمل الذكريات
وأعذرني ختمت الموضوع بدون إضافة رد لك لكني احببت ان يكون ختامها قصيدة إهداء لك بدون رد
والتواصل بينا إن شاء الله مستمر
وأنا تحت أمرك في هذي وفي غيرها
تحياتي
اخوك الخطاف

[جبرني الوقت]

ما يآمر عليك ... عدو ... ووافي وابيض وجه يالخطاف

وختامها مسك دامه جاء منك ...

إحترامي