بالله وش رايكم

[نواااااره]

في البدايه اسأل ان يبعد عنا و عنكم كل مكروه و ان يغفر لامواتنا و امواتكم و ان يتقبلهم عنده بواسع رحمته
انتم طبعا تعرفون وضع العزا كيف يكون ونفسية اهل العزا مهما كان الميت طفل او شاب او شايب
لكن للاسف في ناس ماعندهم احساس و لا بقلوبهم رحمه

كل مادخل واحد يعزي .. يسأل اهل الميت
كيف مات؟؟
وليش مات؟؟
وصى والا لا؟؟

و بعضهم توصل عنده الوقاحه لدرجة انه يسأل

كم ترك لكم في حساب البنك؟؟!!!!!!!

طيب وش الفايده وليش الاسئله هذي والا تقليب مواجع

والا تعالوا شوفوا العزا عند الحريم كيف..

تجيك وحده تعزي وتقابل جارة لها ماقد شافتها من زمان..
واسمعوا السوالف والضحك

بشريني عنك
وشخبار فلانه وعلانه
استعديتوا للعرس
طيب لاتنسونا من بطايق الدعوه
ووين بتقضي العروس شهر العسل؟؟عاااد هاااذاا اهم شي؟؟


والله وقاحه ما كنهم في عزا
طيب وام الميت وزوجته واهله مالهم قدر عندك
تبغين تسولفين لجارتك رحيلها في بيتها
هنا مكان عزا
وكله كوم والبنات اللي يجونكم بعبايات مزركشه ومكياج كووم ثاني
جايه تعرضين نفسك والا تعزين؟؟



صار العزا استعراض ومكابره

وبعضهم تاخذه العزة بالاثم مايطلع لين يتعشى

والله اني جربت يوم عزا ابوي الله يرحمه

حنا زياده على الحزن اللي فينا كنا نحاول نهدي امي

وتجيك حرمه تسأل امي
ليش مات ابو فلان الله يرحمه؟؟
تشهد والا لا ؟؟؟؟؟؟؟؟؟؟؟!!!!!!!!!
كيف كيف مات قوليلي؟؟؟

واذاااااا

انهاااارت امي

قالت الحرمه

يوف الويح لي عنكم

بالله وش رايكم؟؟

[دمعة حائره]

نوااااااااره

كلامك عين العقل ...وكله كوم والذبائح اللي يسوونها ويجلسون اللي يعزون كنهم بعرس ...سوالف وتنكيت والله المستعان ...في واحد من جماعتنا أستقبل المعزين عند المسجد خوفاً من هذه العادة الغريبه ,,كل واحد يجيب ذبيحته كنه يهنئ مو يعزي ...

والنساء عندنا أحسن من أول صاروا يجيبون داعيه ثلاثة أيام وماشاء الله مجلس ذكر وتذكير بالموت وعظم أجر الصابرين والمحتسبين ,,وبذلك تقطع المجال على من أتت للسوالف والحكي الذي يزيد أهل الميت حزناً على حزنهم ...

نسأل الله لوالدك الرحمه وأن يجعلكم من الصابرين المبشرين بجناته ..

[عاشق ثرى الديره]

صدقت والله يانواره وساحكي لكم سالفه وقسم بالله انني حاضرها كنا في المقبره ندفن احد اقاربي رحمة الله عليه واثناء انشغال الناس والتفافهم حول القبر سمعت اثنين من الحاضرين واحد يسال الثاني يقول المخطط اللي في تهامه كم صاربه المتر والثاني برد عليه بكذا وكذا وكان حينا بجواري شخص ملتزم سمع هذا الكلام بينهم التفت اليهم وقال لهم خافو من الله هذا وانتم امام ميت وقبر وعبره وعضه بدل ما يحاسب الواحد نفسه في هذا الموقف تزدادون من طمع الدنيا وترابها ثم انصرف والدموع تملا عينيه من هول الموقف وا هو عليه حال الانسان الضعيف .

وفقك الباري واحسن الله خواتيمنا