وشفيك ضايق .. منهو اللي كدّر الوجه الصبوح .. لو انها الدنيا وهي الدنيا لأنزل راسها

[نّبضْ]

أقراء ملامح ضيقتك في عينك اللي ماتبوح
.....................أحسها .. لوماتبيني أنتبه لأحساسها
أشوف همك بالعيون اللي مدامعها تلوح
.....................لكنها ماترخص الدمع .. وتحدت ياسها
ما أنت بعلى بعضك .. وكلماتك من الضيقه تفوح
.....................حرام تحرق ورد خدك من لهيب أنفاسها
وشفيك ضايق .. منهو اللي كدّر الوجه الصبوح ؟؟
.....................لو انها الدنيا وهي الدنيا .. لأنزل راسها
قلي علامك لا يطول الصمت وتزيد الجروح
.....................شف شمس موعدنا هفت .. والليل دق أجراسها
باقي دقايق من وعدنا .. لاتخليني وتروح
.....................وأن رحت قلي وش يفك النفس من وسواسها !!
أضحك ووسع خاطرك .. ياصاحبي خلك مزوح
.....................الريح تنطر ضحكتك .. وموقفه نسناسها
قد قلت لي .. لاصرت ضايق عاند وخلك جموح
.....................والنفس ماتركع لضيقتها وترخي باسها
وقد قلت لي خلك كتاب أبيض ويملاك الوضوح
.....................ومن ينحني للعاصفه .. أعقل من اللي داسها
وين المبادئ .. وإبتساماتك .. وهذاك الطموح
.....................سوالفك القديمه ماتت بقرطاسها !!
مهما تصد بنظرتك عني .. أنا لي فيك روح
.....................تشاركك في ضحكة أيامك .. وفي هوجاسها
وعيونك اللي ماتبيها تعترف لي .. أو تبوح
..................... شف دمعتك هذي تراها ترجمت لي إحساسها


وسسلامتكم . .
للشاعر / سعيد الهاجري . .

[انامين]

انتقاء رائع لكلمات رائعه ومو غريبه عليك

[أبو ريان]

يا سلام على شموخ ورونق ومعاني ودفء هذه القصيدة ..
لك التقدير ..

[جبرني الوقت]

أشكرك على القصيدة والإنتقاء الجميل من شخصك ....

تحــــــــيـــــــــاتـــــــــي

[نّبضْ]

لاهنتوا على مروركم ..

وماانحرم من طلتكم العطره ..

[دمعة حائره]

مهما تصد بنظرتك عني .. أنا لي فيك روح
.....................تشاركك في ضحكة أيامك .. وفي هوجاسها

تسلم ذائقتك الراقيه عزيزتي

[Oscar]

وين المبادئ .. وإبتساماتك .. وهذاك الطموح
.....................سوالفك القديمه ماتت بقرطاسها !!

بنوته الله يعطيك الف عافية
على التواجد العذب والإختيار الرائع.

[توليب]

مشكوره حبيبتي علىآ القصيـد الذوق ..

لآهنتي يالغلآ ..

[البرنس الجنوبي]

.....................الريح تنطر ضحكتك .. وموقفه نسناسها
قد قلت لي .. لاصرت ضايق عاند وخلك جموح


الأخت/ بنوته ناعمه..

الله يعطيكـ العافية على هذهـ القصيدة الرائعة..

تسلمي على هذا النقل المتميز..

دمت بود،،

البرنس الجنوبي

[غليـــــــص]

انتقاء جميييييييييل

[نّبضْ]

الأجمل مروركم وتواجدكم ..

لاهنتوا ..