ابي رايكم . . وسلامتكم !

[أبوالمعتز]

السلام عليكم ورحمة الله وبركــاته ..

وبعــد , , ,

واجهتني مشكلة قبل فترة بسيطة . . قابله للنقاش .

أخـتي بتتزوج ومطلوب شراء ذهــب كمهر لهــا . .

الـمهم رحت السوق وكل ما اخترنا مجموعه من الحلي من المحل يطلع المحاسب آلته ويضرب ويقسم ويختم كلامه حسابك (9280 ريال )
وكالعاده تكفى . . وبالوجيه وتكفى . . وأخونا يقول ما فيه مشكله نبغاك زبون دائم وما نبغى نخسرك خـصــم ( 280 ريــال ) . .
المهم . . قلت عطني فرصـه اشوف اللي جنبك ونفس الكلام . . وفوقهــا يخصــم 190 ريــال . . اللي ما دخل راسي

الخصم هذا اللي بالمـزاج

وبرضو قلت عطني فرصه . .

واحــد منهم يقول الاسعار ترتفع مع زحمة الصيف والمتزوجين ( هذي ما بلعتها لأن فيه شي اسمه بورصة ذهب بس مشيتها )
والثاني يقول المصنع حقها يكلف . . هذي ما فهمتها . .

المهم قررت اعرف اشلون يبيعـون الذهــب وكيف يكسبون ويخصمون . . وابي مساعـدتــكم . .



أخوكم ابــوالـمـعــتــز ’ ’ ’

[بہرسہتہيہج]

مااقدر افيدك لان ماعندي اكسبيرينس كافي ...

تقبل ودي...

[ذات الشان]

الغش في محلات الذهب مثل قولة سلام عليكم
اذا نويت تشتري خذ الا له الحاسبه معك واسأل عن التالي
عيار الذهب 18 والا 21
كمية الذهب يعني هل فيه زركون او احجار كريمه او الماس
الزركون تراه اي كلام وممكن تلقاه حتى في الاكسسوارات اللي تشبه الذهب واحلى منه كمان
الاحجار مالها قيمه ورح تخسف لك سعر القطعه لو جيت تبيعها
الالماس طبعا تقتنيه لاتفكر تبيعه لانه ما يحسب في قيمة القطعه ولا يشترونه ولو بريال

اذن
اطلب قطعة ذهب 21 بدون اي اضافات لا احجار ولا زركون ولا الماس وهذي القطع تكون لها وللزمن تتزين بها فتره لكن تحتفظ بها ككنز لو لاقدر الله احتاجتها لاي سبب تبيعها وا تخسر في قيمتها اي شي

الاله الحاسبه تحتاجها لانهم بيقولون لك سعر الجرام 96 ووزن القطعه 113 جرام مثلا
يقول لك بنحسب لك الجرام ب 90 علشان نكسبك زبون
ويطقطق على الاله ويعطيك سعر 10848 ربال وعلشان خاطرك بيخليها لك 10500 ريال
احسبها تلاقيه حسب لك الجرام ب93 ريال تقريبا
هذا اذا راعاك
انصحك
لاتشتري من المحل اللي يقول بنخصم لك لانه لايمكن يخصم لك شي يخسره
تروح لمحلات معروفه مثل الرميزان وداماس والكوهجي
ابعد عن المحلات الصغيره
وزواج موفق ان شا الله

[أبو ريان]

أبو المعتز ..
بدايةً نقول نسأل الله البركة والتوفيق للعريسين ..
بصراحة مشاكل أسواق الذهب من حيث الأسعار أصبحت واضحة للجميع وكأن الأمر لا يعدوا كما قلت ذهب وبورصة وأشياء منطقية معروفة منذ زمن ويبدو أن حُمى غلاء الأسعار التي مرت أصابت الذهب وأهله فأصبح العذر فيه كما في غيره من السلع ..

يبقى الأهم وهو ان يكون المكان الذي تذهب إليه من الأماكن الموثوق بها قدر الإمكان والتي تتعامل بمنطق ويا خوفي أن تكون كافة الأماكن ذات اتفاقيات موحدة فحينها ستشتري وانت تضحك ويادارما دخلك شر ..
لك التقدير ..

[الزعيم777]

أبو المعتز

نسأل الله لهما التوفيق وأن يرزقهم الذرية الصالحة
أم حكاية الذهب غالي فهو غالي وين ما رحت ولكن لا تعب نفسك بالدوران إلي ماله داعي خذ الحاجة الضرورية التي تحتاجه أختك
بعدين ( إذا كان المهر أربعين عادي خذ ولا تفكر وإذا كان نظام القبيلة حدد شي من المهر خذ الحاجة الضرورية وعذر الله يعذر )
( بعدين خل المحلات تكسب من وراك لا تحرمهم رزقهم )

[عاشق ثرى الديره]

ابو المعتز

اسال الله يبارك لهما ويبارك عليهما وان يجمعهما بخير

وبعدين المفروض السوال موجه لك لانك المستشار وراعي البورصات عودت تسالنا يمال العافيه

تقبل فائق التقدير والاحترام

[أبوالمعتز]

أبو المعتز


( بعدين خل المحلات تكسب من وراك لا تحرمهم رزقهم )


حـــلووووه خل المحلات تكسب وراااااك . . ما فوتوا شي . .

[أبوالمعتز]

ابو المعتز



وبعدين المفروض السوال موجه لك لانك المستشار وراعي البورصات عودت تسالنا يمال العافيه

تقبل فائق التقدير والاحترام


ولا تـزعــــــــــــــــــــــــــل وانا خــوك . .



امـــــا مسـتـشــــاراقـتـصــــــادي . . فإن شــــــــاء الله أكون عــنــد حـســن الظن . . مع انـي ما كـنت راضـي عن هــذا اللــقــب . .

وأمــــــــــا الـراي وأنا أخــوك فـعــندي رأي علمي ان شاء الله يفيدك

والسالفة كلها كنت ابغى استفيد مــن الأخوان اكثر حول الموضوع ثم أطـــرح رأيي من باب وجـهــة الـنــظــر في هــذا المجـال . . لا أكــثر . .

انا اليومين هذي مشغول لكن سأعطيك تقرير كــامل حول هـذا الموضوع . . ان شاء الله . .

ودمتم . . . أبوالـمـعـتــز , , ,

[عاشق ثرى الديره]

ابو المعتز لازعل ولاعتب الله يوفقك هذا من باب الدعابه الله يحفظك