مواقف طريفه .... من الديره

[المحترم]

مواقف طريفة

الموقف الاول
زمان وزعت وزارة الصناعة والكهرباء (مولدات) كهربائيه على القرى التي لم تصلها الكهرباء في المنطقة الجنوبية، وقد حضيت قريتنا بأحد هذه المولدات..
وقد تبرع احد أعيان القرية بموقع للمولد وبعد أن قام الفنيين بتجهيزه..وإذا بأحد الشيبان قد وصل إلى الموقع..
فاخذ يحث الحاضرين من الجماعة بأن ينتبهون للمولد وعدم استخدام (الاكواع).
وفي غمرة الحديث التفت إلى الفنيين متسائلا ( كنكم وتخلونه كذيه مكشوف بدون غرفه ) فقال الفني وهو من ألجنسيه السورية. يا والد البناية بدها مصاري ؟؟؟

فانتفر يالشايب موجها حديثا للفني ( يو يو.. ليّه يالمصاريه أيذا الصبيان الله يبارك فيهم !!!


الموقف الثاني
في إحدى السنين وصل إلى قريتنا مجموعه من الجنسية الالمانيه ويعملون في ذلك الوقت في إنشاء مطار الملك عبدا لعزيز في جده.
وقد اتخذوا موقعا بين أشجار العرعر بجوار قريتنا ونصبو خيمتين وكان وقتها عطلة عيد الأضحى..
وفي يوم العيد ذهبت إليهم عجوزه تسكن بالقرب من الموقع ومعها شُقاق لحم (جزء من الذبيحة) وبدأت بالسلام عليهم مع بعض الجمل التي تقال في مثل هذه المناسبة تقول الكهله ( جانا مثل هذا العيد المبروك .. الله يجعلنا وإياكم من المقبولين ( على نيتها) إم ذبحنا عيدنا (الأضحية) إم جيتلكم بهذا القسم تيودوه..
الخواجات لا يعرفون ماذا تقول إنما مستبشرين خير وهم يشاهدون اللحم في يدها.. وتناول احدهم اللحم من يدها والفرحة تغمره..
ايش رأيكم في أهلنا في الديرة.. والله ناس طيبين..
نعود للكهله عندما رجعت البيت وبدأت تحكي قصتها فماذا قالت الكهله بعد ما رجعت..؟؟؟
تقول رحت لعرب في علو الوادي والله ما عرفت من كلامهم شيء إلا يوم يضحكون..ومعهم بنتين ( يهولون) الله يعمر أرضهم..وكأنها عارفه إن ألمانيا تعرضت للخراب بعد الحرب العالمية الثانية.. يالله خلوووووووها تمشي ..
في المقابل أيضا حتى الخواجات ما عرفوا من كلامها كلمه واحده إلا اللحم اللي في يدها..


الموقف الثالث
وهذا موقف طريف مع نفس هؤلاء الألمان فيه واحد من الشباب في القرية أراد إن يعزمهم في بيته عزيمة خفيفة..
ما أدري هل هي لله أو علشان واحدة معهم تأخذ العقل (الله يغفر لنا وله) ؟؟؟

المهم وصلوا المعازيم إلى البيت (ساحة قديمة) ولا أنسى إن احد الألمان عندما هم بالدخول مع باب البيت فانه يصقع رأسه :confused: أححححححححححح..يا راسي الأبواب القديمة قصيرة..
أما أُم الولد فهي كهلة داهية من الدواهي رحبت وسهلت بالضيوف وسوت لهم فطير.. وسمن..
نجي الآن عند الخواجات عندما بدأوا في الأكل!!!
يجي الواحد يقسم الفطيرة نصفين ام تصبغ بنصفها في السمن..وبدأ يلتهمها ..
فتقول الكهله.. صلل صلل وأنا ومك..والله يجعل معه العافية وما درى الخواجة مذاهو صلل.. أفلحنا عسى الله يقبلها..


الموقف الرابع
بعد ان الغيت حفيظة النفوس وتم اعتماد دفتر العائله ومايحتويه من معلومات عن المواطن .. وعند مراجعة الاحوال المدنيه يتفاجأ البعض عندما يطلب منه موظف الاحوال المدنيه اسم ..ام ..الزوجه..
ومن ضمن المتفاجئين واحد طلب منه الموظف اسم ام زوجته !!!
قال ليه .. مذا وتعبا بها !!
قال باسجلها في بياناتك !!
قال الا تراني في ويه الله انك ماتحطها معي في البطاقه ولالي حيل اقعد اتشللها معي مدى الحياة اني ولا ضيعتها أيها عندي ليل الله ونهاره !!!
فكنا الله يرحم والديك !!!


هيّا الله يفتح لكم بابه :o

[سعيد العمري]

اخي المحترم

حقيقة احاديثك وسوالف ما احد يملّها

واشكرك على طرح هذا الموضوع

ولي ان شاء الله عودة اخرى

تقبل تحياتي

[المسكت]

.. صلل صلل وأنا ومك..

الله يعمر أرضهم..وكأنها عارفه إن ألمانيا تعرضت للخراب بعد الحرب العالمية الثانية

ولا ضيعتها أيها عندي ليل الله ونهاره !!!
فكنا الله يرحم والديك !!!



هلا وغلا والله
ههههههههههه
الله يرج ابليسك قل نعم

ازيدك من الشعر بيت واحد من الشباب اللتزم ألاتزام على غير السنع
واول ما مسك ومه قال اقلك اللي فات مات عجوز يالله تشوف لكن من اليوم ورايح لا عاد تطلعين الا متغطيه((متحشمه)) قالت ابشر ناومك الله يصلحك ويهدك ما مر يوم ولا يومين وينزل الولد الوادي ويلقى ومه تسولف مع شائب قال يمه انا ما قلت تحشمي ولا عاد تسولفين مع الرجال قالت ليش نا ومك هو ظافر رجال (( هيا رقعها يالمحترم)) (( براءه صح)) يعني انه شايب

[المحترم]

الاخ سعيد

شكرا لمرورك .. اما صقعة الرأس فانها في العابر الاعلى ولاهي مثل ذيه هذا ينطح الجدر :confused:
اعتقد ان اقرب شيء لها ابواشاكوش :rolleyes:
تحياتي ،،،

[المحترم]

الاخ المسكت

شكرا لمرورك ....
والله حلوه اما سالفة الكهله مع ظافر ( اللي كنه ريّال )
اضحك الله سنك .. تحياتي ،،،

[دلع]

هلا وحياك الله اخي المحترم

قصص تجنن والاحالى القصة الثانية من جد روعة

والاحسن انك ساكن في علو المنزل (وش يعني في الدور الثاني)

حتى احنا ساكنين في الدور الثاني وبعدين نزلنا الدور الاول

تحياتي لك اخي المحترم ونتمنى منك المزيد من هالقصص

تقبل تحياتي اختك

دلع

[عذاب السنين]

ههههههههههه
سلمت على السواليف والمواقف الحلوووووووووه ذي

[صالح آل سلمان]

قصص حلوه ومحترمه مثل راعيها والله ان هذه السوالف تشدني اكثر من اي موضوع اخر لاني اجد فيها طيبة وتواضع وبساطه اجدادنا واهالين السابقين رحم الله ميتهم وحفظ لنا الاحياء منهم ليغرسوا فينا هذه الطيبه والتواضع وغيرها من الامور الي ترفع الراس 0
اما القصص والطرائف فالله انها واجد وياليت الشايب يكتب لان اكيد عنده الكثير منها بس اشوفه اليومين هذي مختفي 0كم اتمنى انني معكم اخواني في جلسه عن قرب ونتجاذب اطراف الحديث ونتذكر الماضي وسوالف الشيبان 0
مشور اخي المحترم على القصص الرائعه ومشكور يا مسكت انت وظافر الريال

[ريانة العود]

تسلم والله
القصه الثانيه روعه

[المحترم]

اهلين اختي دلع

مشكوره على المرور ..
بالنسبه للسكن في ( علوالمنزل ) فليس سوى رغبة مني في مراقبة حركة الجماعه .. الرايح والجاي .. ومذا عند آل فلان .. وآل فلان جاهم ضيوف اخاف ان عندهم عشاء الليله ..
يعني عيني حاره هه ههههههههههه

[المحترم]

عذاب السنين

الله يسلمك وشكرا على مرورك والقادم احلى باذن الله ..

[المحترم]

دباس الجارح

الله يسلمك ويرفع مقدارك ، والحقيقه ان منتدياتنا يجب ان تكون مواضيعها ان لم تكون كلها فعلى الاقل البعض منها يجب ان تكون ذات نكهه مرتبطه بديرتنا واهلنا لكي نشعر بطعم وحلاوة المنتدى .. لان موضة التقليد والقص والزق اصبحت تصيبنا بالغثيان من كثرها ..
لكن اطمئنك بان المنتدى الان اصبح يزخر بمجموعة من الاعضاء المميزين .. والقادم احلى باذن الله ..

[المحترم]

ريانة العود

هلا وغلا فيك .. وشكرا على مرورك ..

[المحترم]

الموقف الخامس

كان في قريتنا كهله ( متقاعدة ) ولها مركاز معروف في طرف اليرين .. ويجتمعون عندها النساوين اللي ما عندهم شغله ولا مشغله ( منداة ) و ( بطاله)..
فإذا شافتنا جينا ومعنا حلاوة قالت يا بثور تعالوا كل واحد يهبلي حبة حلاوة ودي ابعد بها عبص على طرف لساني !!!

[المحترم]

الموقف السادس
واحد من شباب القريه زمان كان شديد الفتك بالمحاصيل الزراعيه خصوصا الفواكه والحبحب والشمام ، بالاضافه الى مقدرته العجيبه على التنبؤ بالاوقات التي تبيض فيها الدجاج ..
(مايمدي الدجاجه تبيض ) إلا وهوحاضر عندها تقول انه ( دايه) الله اكبر عليه..

وعندما كثرت الغارات على المحاصيل والدواجن في القرية ( الفلوجه) واشتدت ضربات المقاومه ..
اجتمع أعضاء مجلس الشعب في القريه لتدارس الامر والبحث عن الحلول فمنهم من قال : هذي ثعالب متوحشه وجائعه وآخر يقول هذي فلول يعاري ظهرت من تهامه وأخر يقول والله فيه ناس واجد يشتكون واظنهم اللتريين الخساس اللي ساكنين في الجبل ( يقصد الاريتيريين )..
وأخر قال يا جماعة اللتريين ماظنتي يجي منهم علم شين كلهم ضعوف ومساكين ( لانهم يشتغلون عنده في بناء ثمايل في بلاد معه ) خايف يشتكونهم الجماعه فيسفرونهم لان ماعندهم إقامات وما قد خلصوا الشغل عنده ..
أخيرا قرروا الاستعانه ببعض الخبراء وبالاشقاء لتأمين مناظير للرؤيه الليليه وبعض من قذائف الار بي جي وبتّلوا بتلة من اللي عليهم الكلام ..
وفي إحدى الليالي المظلمة وبينما كانت القوات الخاصه التابعه للقريه تقوم بتمشيط المزارع واذا بهذا الشخص اللذي يخرج من تحت احدى شجر العنب في الوادي وفي يده ( قرط) عنب فظن احدهم انه الشخص المطلوب فاشتل هراوة معه ام اظرب بها بين عيونه..
ويوم ولعوا الكشاف ويشوفون الرجال .. الله ييركم طلع واحد من الفرقه الخاصه .. اخيرا انسحبوا من الوادي وشالوا خويهم وفيه نظرة شينه بعد ان تعرض لـ ( نيران صديقه) ..

وفي الحلقات القادمة بإذن الله سنروي لكم بقية القصة وكيف تم التعرف على الجاني من خلال المعلومات ( الاستخباراتيه ) ..

[صدريد]

الأخ المحترم: قصص ممتعة مكتوبة بأسلوب لا يجيده إلا القليلون.. أبارك لك في الموهبة..

هذي إحدى جداتي القريبات تحب ولدها حبّا جمّا وتعامله معاملة الصغار من حبّها له وصار عمره في الخمسينات (بي عن ويهك.. لويس لي عنك.. كنّه برد عليك !! ) وتقوم بحرب ضروس على من يكلّف عليه والا يطلبه شيء.. المهم زمان أول ما طلعت الغسالات (طبعا المكوى وصل مبكرا) طلبته الزوجة أن يشتري لهم غسالة وسردت المبررات.. فصيحي يا الكهلة صيحة: كيف يشتري لكم غسّالة وأحيـّـذ المكوى..!! (حق الفيتو)....

صدريد

[المحترم]

كيف يشتري لكم غسّالة وأحيـّـذ المكوى..!!

صدريد
اما احيذ المكوى فلحالها ..
عسى الله يوفقك والله انك جبتها في وقتها .. ولوتشوف ناس حولي هنيه.. يقولون شوف القصص القصيره اللي بقلبها..ماهي بقصصك يالمحترم اللي اطول من يوم مافيه ماء ..
والله اني ضحكت على هذه الكهله ( تعجبني البراءه ) الله يرحمها حية كانت أوميته .. ويطول في عمرك ولايحرمنا منك ياصدريد.

[صدريد]

الجدّة توفيت رحة الله عليها وتقبل دعوتك لها..

يوم صارت مشاكل إيران وحرسهم الثوري في الحج، وسمعت المشكلة فتعالي فارسلي على إيران دعوات تحيّر السحاب: الله بحق من هو الحق وحده دعوة ٍ أرسلها وعلى الله إلتقافها إن الله يفعل بهم ويحدر بهم.. ام اقطعي الدعاء و التفتي لي بسرعة سائلة: ولدي هم إيران من السعودية ؟!

قلت لها: لا.. لا غير واصلي..:o


صدريــــد

[المحترم]

الموقف السابع

أرجو أن ينال رضاكم . وهي قصة الشرطي ولكهله في المحكمة في الديره.

كان فيه كهلة تروح كل يوم للمحكمة ..( تداعي ) ومالها خصم لكن الظاهر انها تعاني من حاله نفسيه (الله يغفر لنا ولها) وفي أحد الأيام راحت للقاضي الدغريري كالعادة .. وزعل منها القاضي (قفلت) معه ، وأمر يايداعها السجن ..
قالت للقاضي ان كان عزمت وانا ومك تهبني في السجن فخلني أروح إلى البيت وأخذ لحف (ملابس) .. وافق القاضي على طلبها وكان عنده عسكري ( حمش ) ولا يتحالى المزح ..
قال : يا عسكري روح معها إلى البيت خلها تأخذ ملابسها .. وكان المشوار على رجولهم لان المسافة بين المحكمة وقريتها يمكن 2 كيلومتر..
راحت مع العسكري وفي أثناء الطريق قالت ونا ومك إزم القبا واعدي أريق الماء.
فانه يمسك القبا وانزلي في عبّاره سيل على الخط العام وادخلي معها واخرجي من الجهة الثانية وراحت بيتها ..
جلس العسكري ينتظرها .. وبعد ما شاف إنها طولت .. حط القبا فوق راسه يظلله من الشمس ورجع للشيخ ..
قال الشيخ وين الكهله ؟؟
قال إما أنت ياشيخ فأعطتني القبا وقالت وتروح لحايـة لها ، انتظرتها .. انتظرتها الا هي قد أبطت فاني أعـّود أصدر.. والله إن تقول إن الأرض بلعتها.. ما ادري وين راحت !!
قال الشيخ أهااااااااا .. يعني لعبت عليك الكهله هيـّا لبسّوه القبا وحطوه بدلها في السجن !!
القاضي كان يريد ان يشوف ردة فعله لكنه لم يسجنه لانه ضامن ان الكهله جايه بكره كالمعتاد.

والله يغفر لنا ولهم ولكم ..

تعريف القبا
هو فروه كانوا يلبسونها الكهيل زمان .