ما تسوين قصيدة في نظر عيني..

[اسماعيل الكويتي]

كتبت الشعر مو لجلك.... ولكن فااااض بي بركان

واما إنتي فلا تسوين قصيده في نظر عيني...

حلفتي لي تصونيني إذا صار الزمن خوان

وأول ماعثر حظي على دربك خذلتيني...

كسر رمح الزمن صدري وجيتك أشتكي حيران...

نزعتي الرمح من صدري وفي ظهري طعنتيني !!

خساره كيف حبيتك؟نعم والله أنا ندمان...

غبي أدري! نعم أدري !مادام إنك سكنتيني...

ثلاث سنين من عمري وأنا في لعبتك غرقان..

أشيل الشوك من دربك وجرحي كان يدميني

وكنت أبكي إذا تبكين وأكون لبسمتك فرحان

وكنت أقرب من رموشك لعينك يوم تبغيني

عرفتك للأسف صحراااا...وحولّتك إلى بستان

وشلتيني غصن أخضر وفي صخرك زرعتيني

حفرتك داخلي ,ظني تصوني عشرتي أزمان

وكنت أحفر قبر موتي على ساحل شراييني

على كف الشقا نامت جروحي والألم سهران

يحطمني ...يبعثرني..وفي صحراك يرميني

ولكن عزتي ترفض أكون بدنيتي سلطان

وإن ظنك أجي أركع لرجلك ماعرفتيني

أنا ماعادتي أشحت من أمثالك رضا وإحسان

أموت بعزتي أرحم ولا ذلك يغطيني

ومادام الوفا عندك يدوّرله على عنوان

بدوّر لي على قلب يصون الحب وسنيني

ولو قلبي ذكر حبك بولّع فيه بالنيران

وأبكسرها أنا رجلي إذا صوبك تودّيني

و لودار الزمن ضدك وجيتي تطلبي الغفران

وجبتي الشمس في كفك لعندي مابتلقيني

تقول الناس في وصفك: جميله ...مثل عود البان

وإنك أجمل وأحلى بشرمخلوق من طيني

وإنك غاليه وأثمن من الياقوت والمرجان

يقوم الكون من شانك وتقعد لك بلاديني

حسافه غرّهم شكلك وياما تخدع الألوان

عموما ...قد بقت كلمه أخيره لك وسمعيني:

*إذا كنتي بنظر غيري ملاك في شكل إنسان

قسم بالله ما تسوين قصيده في نظر عيني....

......... انشاء الله تعجبكم ولا احد يزعل ...

[المسكت]

كسر رمح الزمن صدري وجيتك أشتكي حيران...

0000 نزعتي الرمح من صدري وفي ظهري طعنتيني !!
قمة الألم

إسماعيل
شكراً لك ويعطيك الف عايه
اخووك

[اسماعيل الكويتي]

المسكت ..
يعطيك العافية على المرور وثقتك فيني
لك مني اكبر تحية وتقدير يا الغالي

[سعيد-العمري]

الله يعطيك العافيه

القصيدة في قمة الروعة لا عدمناك

[اسماعيل الكويتي]

اخوي سعيد انت الي مرورك كان شرف لي ورقي من شاني ..
يعطيك العافية على المرور يا الغالي ..
لا تحرمنا من طلاتك الي كأنها قطرات من مطر

[عينك سماي]

حسافه غرّهم شكلك وياما تخدع الألوان

عموما ...قد بقت كلمه أخيره لك وسمعيني:

*إذا كنتي بنظر غيري ملاك في شكل إنسان

قسم بالله ما تسوين قصيده في نظر عيني....

كلمات راااائعه بالرغم من قساوتها
شكرالك وتقبل مروري

[اسماعيل الكويتي]

عينك سماي ..مرورك كان رائع
واعذريني على قساوة القصيدة
وانا حاب اقول ذا البيتين بس على لسانك لو تسمحين لي ::


قالوا علامك رافعه الراس

و نشوفك قويه

قلت العفو كلنا بشر بس انا

** عمرية **

تمتلك كل المشاعر

و من عرفها ما نساها

لا شفت ضيم الناس في كل البريه

اسجد لربي اللي خلقني