في صباح السبت

[صقربن خبقان]

في اول يوم دراسي الموافق 26/8/1428 هـ ذهبت الى مدرسة احد اولادي وفكرت في الامر قلت دائم اني طالع طالع خلني امر اجدد التامين حق السيارة واروح المستشفى اخذ بعض الادوية اللي انتهت عليه وانا في الديرة وبعد ما خرجت من المدرسة ماسك خط خريص متجه الى المستشفى صدمتني شاحنة وحرفتني عن مساري وصدمتني ست سيارات ...............؟

ما ابغى اطول عليكم بتعرفون القصة كاملة في القصيدة .

وابغى اطمئن الجميع الحمد لله كل شي انتهى والحمد لله على كل حال.

طبعا كما تعرفون مثل هالموقف ما يعدي بدون ما نغازله بقصيده فقلت :

في صباح السبت رحت المدرسة وانشد عن الاولاد
ثم قلت اروح للمستشفى اخذ موعدي وعلاجـــي
صدمتني شاحنة في وسط خط خريص يا لطيــــف
ست سيارات تصدمني وكل الناس يشهـــــــــدون
ثم جاني عسكري يقول لي يا عم ترك المخطــي
والخطا كله عليك ونسبته مئتين في المئــــــــــة
قلت سو اللي عليك وود تقريرك وودنـــــــــــــي
قال حاضر وابشر ان تلقى رجال تخدمك وتعينك
رحت للقائد وفهمته وقال الحق عــــــــــالسواق
التريلا من الكويت وشفت سواقه من البنغـــــــال
والله يا من شاف هول الموقف إنه ما يصدق وقعه
وإنه يحلف ما ظهر من بطن ذا السيارة آ دمـــــــي

حمانا الله وإياكم من حوادث الزمان وسلامتكـــــــــم.

[بن ظافر]

صقربن خبقان:ك الحمدلله على السلامه الله يقومك با العافيه ويحفظك لكل عين ترجيك

صح لسانك على هذه القصيده واعجبتني هذه الأبيات



والله يا من شاف هول الموقف إنه ما يصدق وقعه
وإنه يحلف ما ظهر من بطن ذا السيارة آ دمـــــــي

[ابوفواز]

اولاً : الحمدلله على السلامه


اما مدام من دولة ثانية الى صدمك اكيد ميلون في المئة بيكون الخطاء عليك او على اي سعودي ثاني لان حكومتنا عزه ربي في صف الاجانب على السعوديين هذا شي معروف مايختلف عليه اثنين

[سيد الموقف]

سلاماات والله يا صقر وما تشوف شر

والله يا الغالي ان الحال يشكى لمن يشكى له الحال

الله يحمينا وياك

تحياتي وألف سلامة
.....

[أبو ريان]

الله الله ..
عوافي عوافي ..
صقر بن خبقان صح لسانك تعبير وافي وصافي ..
الحمد لله على السلامة ..
لك التقدير ..

[المسكت]

الحمد لله على سلامتك
ابو محمد
ودك إنها من دبي يمكن يعوضونك
ولا يحطون الخطاء على غيرك!!

صح لسانك وعلا شانك والله


إبنك المسكت

[أبو عابد]

الحمد لله على السلامة


وما تشوف شر يالصقر

وصح لسانك ملايين على هذه القصيدة الرائعة

[فصل الخطاب]

البدع =
صقر بن خبقان=
في صباح السبت رحت المدرسة وانشد عن الاولاد=
ثم قلت اروح للمستشفى اخذ موعدي وعلاجـــي=
صدمتني شاحنة في وسط خط خريص يا لطيــــف=
ست سيارات تصدمني وكل الناس يشهـــــــــدون=
ثم جاني عسكري يقول لي يا عم ترك المخطــي=
والخطا كله عليك ونسبته مئتين في المئــــــــــة=
قلت سو اللي عليك وود تقريرك وودنـــــــــــــي=
قال حاضر وابشر ان تلقى رجال تخدمك وتعينك=
رحت للقائد وفهمته وقال الحق عــــــــــالسواق=
التريلا من الكويت وشفت سواقه من البنغـــــــال=
والله يا من شاف هول الموقف إنه ما يصدق وقعه=
وإنه يحلف ما ظهر من بطن ذا السيارة آ دمـــــــي=
الرد =فصل الخطاب
قالوا في المثال ناسٍ قبلنا ما راح ما ينعاد =
وأيضا قالوا فيه بين الدّر فص ٍ فالصوا والعاجي=
وأيضا يا ما قد سمعنا كثرة اللوان بلون الطيف=
غير ما لم نسمعه ناس ٍ بمالا شيف يشهدون=
في زمان العلولمة تعجز تفرق فالخطاء والمخطي=
عدنا مابين البشر (قصة) ويوميات فلم (يه) =
وأستوى الونعم بخوه وقابل العالي مع الدني=
وأن ظاهرت الريع كفو آلف تباري طيحتك وتعينك=
والله كم رجل غدى مثل البهايم ساقها السواق=
أنتهى عصر الشكاله والكرم والهيل والبن قال=
شفت صقر وبو محمد نحترم فكره ونعرف وقعه=
والدّمي متشابهه لو كان سأل الحقد فالدّمي =

أعلم بأنك رجل تستحق التقدير
فأنت هول على المرجف مضنة للمنصف
الحمد لله على السلامة .. وتقبل ردي المتواضع
وآآآآآآآآآآآآآآلف لا بأس يا أبا محمد

أخوك : فصل الخطاب

[عذب السجايا]

الاخ صقر بن خبقان
الحمد لله على السلامة وهو الاهم
وياليت انك صورت الحادث ولكن
الان الذبيحة لابد منها تراها ست
سيارات ولا بنقول ست ذبايح بس وحده

[صقربن خبقان]

نشكر للجميع على المرور وما تشوفون شر إن شاء الله

[عود الليل]

الحمد لله عالسلامه
واتمنى يكون موجود عندي صوتك بالقصيدة في مخيم بني عمر عالمهجور
واذا لقيته برسله

[الاماكن]

صقربن خبقان:ك الحمدلله على السلامه الله يقومك با العافيه ويحفظك لكل عين ترجيك

صح لسانك على هذه القصيده واعجبتني هذه الأبيات