بين لندن والرياض ؟؟؟

[اليتيم]

بين لندن والرياض

يا عزيزه شفتها صدفه وشفت إعيونها..
صدفة بالطائره بين لندن والرياض ..
المحتني وأفهمتني .. قالت أش بك ؟
ليه لونك مختلف ؟
أنت خايف ؟ قلت مثلي ما يخاف ..
عايش ٍ بالطائره .. كل يوم ٍ في سفر ..
من بلاد إلى بلاد ..
ودي أنسى .. كيف بنسى .. كل ما أنسى ..
شفت عين ٍ ذكرتني عينها ..
وأسمحي لي يوم وضحت الكلام ..
جاويتني ببتسامه . ما خلي منها الحنان ..
قالت أسف .. قلت وش ينفع الأسف ..
بعد ما نقضتي إجروح ٍ كبار ..
أتركيني .. في همومي .. لين نوصل للمطار ..
عادتي لا ركبت الطائره أتململ ..
وأحسب أن الوقت بي لازم يطول ..
مير ها المره تغير واختلف ؟
مدري أش به يوم غير عادته ؟
ما دريت إلا وهي جتني تقول ..
أربط إحزامك .. توهب للوصول ..
وأنا عايش في ذهول ..
ونستل دوني ستار .. وأنتهت كل الفصول ..
مسرحيه عشتها .. يا عزيزه شفتها ..
بين لندن والرياض ..

[عذب السجايا]

يسلم ذوقك وصح لسانك اخوي اليتيم

رائعة جدا جدا لاعدمناك

[(*بسمـــــه*)]

ما دريت إلا وهي جتني تقول ..
أربط إحزامك .. توهب للوصول ..
وأنا عايش في ذهول ..
ونستل دوني ستار .. وأنتهت كل الفصول ..
مسرحيه عشتها .. يا عزيزه شفتها ..
بين لندن والرياض ..

وبين الشعر والخواطر

نرى اليتيم

يشدو بأعذب الحروف

وارقى الجمل ...

ابداع يفوق كل كلمات

المدح والثناء التي يمكن ان تقال

يعطيك العافية وبإنتظار جديدك دوما

[اليتيم]

الأخ / عذذذذذذذب الله يرجك لي سبوع وانا أنتظر واحد يقول زينه شينه ما فيه فايده اشوى انك مريت ولا كان قطعت عنك المصروف.

الأخت / بسمه الله يجبر بخاطرك ويوفقك دنيا وآخره كلامك رجع لي إعتباري بعد ما فقدت الآمل في شاعريتي وقررت أكتب قصائدي واعلقها على جدار غرفتي واجلس قدامها أبكي الحمد لله باقي الدنيا بخير وباقي فيه ناس طيبين يالطيبه أشكر لك أهتمامك وصدق مشاعرك وعبير كلماتك .

اليتيم

[عذب السجايا]

الاخ اليتيم افا والله بني ما يتاخرون عنك

لكن تعرف الاجازة وظروفها وانت واضح انك تملك

موهبه خارقة وتاكد باني متابع لك دوما..تحياتي

[ولد ومه]

ما اقول الا صح الله لسانك وماشالله بدينا نلاحظ التطور في الاخراج واطارات وحركات خنفشاريه ,في انتظار جديدك لاعـــــــــــــــدمناك ............ وشكرا

[عذب السجايا]

ما اقول الا صح الله لسانك وماشالله بدينا نلاحظ التطور في الاخراج واطارات وحركات خنفشاريه ,في انتظار جديدك لاعـــــــــــــــدمناك ............ وشكرا

صدقت اول ماكان يدري كيف ينسق خخخخخخخ

[اليتيم]

الأخ ؟؟/ عذذذذذب شكلك ما بتجي بها لبر الله يستر من توالي هانت وأهاته؟؟؟؟

الأخ ؟؟ / ولد أمه والله لو بويه دفع عليً مثل ما دفعه عليك بوك لأصنع كمبيوتر ولا دبابة ولا طائره وشف جزاه يا تعبان حتى أسمك ولد أمك؟؟؟؟؟

وبعدين صدقوني أني لا زلت غبي انزل القصيده وتجلس ضايعه يومين ولا ثلاثة وبعدين يخرجها غرمان بن عزيز ولا الساري يعني لو يروحون الأثنين من المنتدى ما راح تشوفون إلا عنوان القصيده واسم اليتيم .

أشكر لكما مروركما الكريم .

اليتيم

[ولد ومه]

يا اخ اليتيم انصحك بما انك شاعر مبتدئ انك ما تكثر اعدائك علشان تنجح ومالك منى الا الدعاء بمستقبل زاهر والى الامام بلا ولد امه ولا ابووووه ..... وشكرا

[عذب السجايا]

الاخ اليتيم اتاسف الدعوى مزح

وبعدين ماله داعي تكسب عداوات

زي ما قال الاخ ولد امه وانت غير

معروف حتى الان ...انا بصراحة ارشحك

للاشراف مع الاخوان على الشعر وعطر الكلمات

ولكن بشرط ان تكون ذا صدر وسيع اوسع من عيسانه