نداء لـ سعيد بن عوض

[ابن عياش]

أسعد الله أوقاتكم بكل خير
ودّنا بطارووق مع الشاعر سعيد بن عوض


ياسعيد الله اعلم بالغلا بيننا بين
.................................. المشاعر شواهد والمواقف عديده

لكن الشعر خلّا له علينا قوانين
............................. وانت شاعر وتنظْم بحرَك اللي تجيده

[أبو ريان]

صح لسان بن عياش ..
وأشكرك على هذا النداء الرائع ..
فمن جهة ستحيون المكان بمثل هذا الطاروق ..
ومن جهة أخرى فكلاكما أستاذ مستقل بمدرسته وهنا منتهى الجمال والمتعة ..
أتمنى أن يحضر أبو فارس بأسرع وقت لنستمتع بروائعكم ..
تقديري ..

[ابوفهد العمري]

احسنت الدعوة للكفو وانت كفو مثله ننتظر بكل شوق .
قواكم الله .

[سعيد عوض العمري]

السلام عليكم ورحمة اللّه وبركاته

والله يسعد مساك يا شاعرنا ومسى الجميع

وهذا حسن ظن منك و من ذكرني من الإخوة بخير وأنا تحت أمركم في اللي تبون و لو أعدنا بعض ذكريات الماضي الجميل أيام المحاورات الله يسقيه فلا بأس

استلم /

مرحبا و مسهلا بك يا سليل الشياهين
مرحبا عدّ سيلٍ دقلدته في هديده

الشعر مثل وردٍ تقطفه من بساتين
شيّ ماله اريج و شي بريحه فريده

[ابن عياش]

ابوريان
ابوفهد
الف شكر على كرم الحضور وشرف المتابعه وماعليكم زوود

ابوفارس ارحب




البقى ياحصانٍ بارعٍ في الميادين
................... يصهل ولايهمّه كل نفسٍ عنيده

الشعر حدّ علمي مانجيبه بتلقين
.................. ولايروح ابقرارٍ مثل ذيك الجديده

[سعيد عوض العمري]

ما على مثلك و شرواك زودٍ وذا الحين
البطل من بيثبت في الظروف الشديده

خلنا مالشعر شف لي السياسه على وين
و يش بلى الشعب كلٍ واقفٍ عالحديدة

[الصيـــ ( ضــــاري ) ــاد]

متصفح زاخر بأسمين كبيرين في عالم الشعر
متابع

[ابن عياش]

الصيّاد
حضورك يشرفنا ومتابعتك تسعدنا


السياسه تروّح مثل من راح وادرين
..................... تظهِر اخلاف واقعها على كل جريده

يالله استر علينا من twenty ثلاثين
.................. ويالله ان تحفظ اهل الموصْل من النكيده

[سعيد عوض العمري]

حضينا بشرف المتابعة لا هنتوا على كل حال

اسمع /

السياسة على ما قيل مستنقع الطين
ترفع اشخاص واللي بسّ تسمع هبيده

يا الله اني طلبتك تحفظ العقل و الدين
و انصر الحق والباطل عسى ما تعيده

[ابن عياش]

يرزق الله مهابيلٍ على يد مجانين
............... لايغرّك مظاهرهم لو انْها حميده

شي عادي نشوف وشي تدمع له العين
............. وشي عنّي وعنّك ابمسافه بعيده

[أبو ريان]

متابعين لأهل التألق والإبداع ..
واصلوا وفقكم الله ..
تقديري ..

[سعيد عوض العمري]

المواري بدت فكّر بعشرين عشرين
ويش تسوي عسى افكارك تسرّ ورشيدة

اصبح السين ماله جيم و الجيم هو سين
حيرتنا البلاوي والمشاعر بليدة

[ابن عياش]

ههههه خلوووها


شرق ارض الجزيره اهل فتنه وتفتين
............ الطوايف عديده وبين حرب ومكيده

والشمال بري حالي قد لهم سته اسنين
................... الهوايل عليهم مثل نار ووقيده

[الصيـــ ( ضــــاري ) ــاد]

لا زلنا معكم مستمعين وبإنتظار الشاعر سعيد عوض

[سعيد عوض العمري]

عقب ما ماتوا الشيبان جونا الوراعين
رحمة الله عليهم واشهد انْهم فقيدة

ورحمة الله على صدام سيد السلاطين
من توطّى الروافض ما لقينا حفيده

[ابن عياش]

يابوفارس ابنشدْك الحقيقه متى اتبين
.............. عند رجلٍ يمدّ بخُمسْ ماله وبيِدَه

هو وأهله وربعه واللي معهم مساكين
............ مالهم راح لكن ويش وضع العقيده

[سعيد عوض العمري]

من يرقّع وانا عمّك بفكر المعاقين
شي ما هو يصدّق من عقولٍ سديدة

والله لا دين لا دنيا حطب نار مقفين
والعمايم هي اللي وحدها مستفيدة

[ابن عياش]

ناس تحذف بحذفه وناس تحذف بثنتين
............ واللي يحضْر ويلْقِف واللي يشحن رصيده

صدّق او لا تصدّق والدلايل براهيين
................... راحت اعلومهم كنْها سواة العصيده




ابوفارس كل الشكر والتقدير على اجابة النداء
تشرفت باللعب مع شاعر مميز وكفو مثلك
وهذا آخر بيتين في طاروقنا

أشكر كل من شارك وعلّق وحضر
تقديري

[سعيد عوض العمري]

يالله ان تحفظ ارض الحرمين الشريفين
من قلوبٍ حسدها ما يونّي صديده

ثم نصلي على محمد ميات وملايين
كل ما ناح قمري و ارتفع في نشيده

العفو يا شاعرنا الكريم

بل نحن من يتشرف ويسعد بذلك

والشكر موصول لك من تابعنا و شاركنا هذا اللقاء

والعذر كل العذر عن القصور

[الصيـــ ( ضــــاري ) ــاد]

بيض الله وجيهكم ياشباب اثريتوا المكان والشعر صاحبناكم في صفحتين ممتعه
كنت أتمنى فقط توضيح الطاروق بصراحه انا أول مره أسمع فيه

[ابوفهد العمري]

بيض الله وجيهكم وصحت السنتكم .
محاورة رائعة ذات اهداف رائعة بارك الله فيكم .

[المهندســ]

قواكم الله .. ممتعين !