الإهداءات |
|
|
|||||||
| التسجيل | التعليمـــات | التقويم | مشاركات اليوم | البحث |
 |
|
|
أدوات الموضوع | انواع عرض الموضوع |
|
الإهداءات |
|
|
|||||||
| التسجيل | التعليمـــات | التقويم | مشاركات اليوم | البحث |
|
|
|
أدوات الموضوع | انواع عرض الموضوع |
03-04-2005, 12:42 PM
|
#31 | |
|
مشاركة: على طول العمر حبك هو الوحيد اللي سكن قلبي
في بيت ابو طارق
ابو فهد وام فهد وعزه ومايد اليوم الصبح رجعوا دبي بعد ما تطمنوا على طارق وقضوا كم يوم في العين .. ثريا : حسيت البيت فضى على ومن ضيقتي طلعت غرفتي ورقدت طارق : انا بعد حاس اني ضايق عشان جي قلت لماية اني بسير عند مازن وفيصل ابو طارق وام طارق لو ييلسون العمر كله قبال بعض ما يملون عشان جي يلسوا مع بعض يسولفون خاصة ان ابو طارق اليوم ما عنده دوام في بيت ابو حسين في غرفة خلود كنت يالسة مع سمية ربيعتي نطالع كتلوج يابته سميه لتساريح والمكياج وبصراحة فيه تسريحة وايد دخلت راسي واقتنعت فيها وقررت اني اسويها في العرس خاصة اني وصفت لسميه الفستان وقررت اني اسويها خلاص ان شاء الله وعقب اتصلنا بالصالون عشان نحجز معاه وخبرتها ان فيه تسريحة معينه انا ابيها وعندي الكتلوج وقالت لي اوكى في الصالة ام حسين : كنت يالسة مع ابو حسين نرمس عن حال ولدنا اللي وصل له وقلت معترفة انا السبب باللي صار لحسين وما راح اسامح نفسي طول عمري.. ابو حسين : استغر الله يا حرمة شو هالرمسة كل شئ يصيب الانسان من رب العالمين ام حسين : ونعم بالله بس بعد لكل شئ سبب .. ابو حسين : عن ها الكلام وقومي نسير نيلس مع حسين بدل ما يالس هو بروحة اكيد انه متملل في غرفة حسين حسين : مثل ما قلت لكم الانترنت ماخذ كل وقتي وبالتحديد المنتدى وبعد رمست سامر وخلاص حدد لي موعد عشان اسافر عند دكتور مشهور في بريطانيا وقالي ان الدكتور اول يشوف حالتي عقب يقرر .. وبصراحة حسيت اني مستانس شوي ابو حسين وام حسين هلا بالغالي هلا بحسين شو يالس تسوي؟ حسين : مثل ما شايفين .. وعقب ما نزل ابويه واماية عني اتصلت على خلود على المبايل وقلت لها تيني الغرفة لاني ابيها ضروري في بيت ابو مازن في صالة الطعام قيس : او اليوم الشيخ ابو مازن عندنا على الغدى لا ما اصدق!!(لوااااات) ابو مازن : اقولك قيسوووه ما لي بارض لك قيس : افا يا ابو مازن إذا ما لك بارض لاخر العنقود لك بارض لمنو (قالها بدلع) فيصل : انا خاطري اعرف ها الولد متي يفصل من اللواته كل وقته لواته في لواته ام مازن : فديته خلوه يتدلع قيس : هيه خلوني اتدلع ادري انكم غيرانين مازن : يلست وتخبرت ابويه عن الشغل عقب يلست اكل وانا من طبعي في حزه الاكل ما احب ارمس ولا احب اللي حوالي يرمسون بعد سبحان الله مزنه : يلست يم قيس وقلت له شفت خطيبتك شو سوت؟ قيس : شو سوت ؟؟ مازن : انتو الاثنين ما تعرفون تاكلون وانتو ساكتين؟ قيس : اصبر بس اعرف خطيبتي شو سوت عقب بسكت مزنه : البارحة دخلت على علي اخوها الميلس بدون شيله وعنده ربعة ههههههه قيس : حلفي؟؟ مزنه : لا الحبيبة ما شردت عقب تمت واقفة مكانها قيس : ها البنت ما ادري على منو طالعة وطالع على امه هههههههه مازن : شو اللي اسمعة؟؟(حسيت الحين اني بموت من القهر وقلت لماية عطيني كوب ماي) قيس : (تعمدت اقول جي خليه يرتفع عليه الضغط شوي عيل يخلى الريم ويخطب ثريا؟) مازن : حسيت عقبها مب قادر اكمل اكلى ونشيت ظهرت سرت غرفتي مسكت مبايلى وتميت ادور الرقم وبدون تردد دقيت على ثريا.. في بيت ابو طارق ثريا : كنت راقده من الضيق اللي فيني ولكني سمعت المبايل يرن طالعت شفت رقم مازن رديت وكنت مستغربة ويمكن للحظة تخيلت اني احلم ثريا : الو (وصوتي كان باين عليه اني ناشة من الرقاد) مازن : راقده؟؟ اسف ردي رقدي ثريا : لا افا عليك انا اصلا ما صدقت انك تسأل غريبة ينا على بالك(من حقي اعاتبة هذا ريلى مب أي حد ومب باقي شئ على زواجنا) مازن : ما ادري شو اقولج وما ادري كلمة اسف تكفي وله فيه شئ ثاني لازم اقوله ثريا : كنت ساكته اسمع رمسته وبعدني مب مصدقة اني ارمس مازن مازن : ادري اني اهملتج وايد بس يا ثريا انتي يمكن ما تعودتي على اسلوبي لكن عقب الزواج بتعرفيني زين وبتعرفي اني مب هاملنج عشان ابي اهلمج لكني ما اعرف كيف اتعامل معاج او يمكن استحي وايد ثريا : كنت اقول في خاطري فديتك وشكلي بثقل عيال الدلع عليه .. مازن : ليش ما ترمسي ليش ساكته ثريا : ما ادري شو اقولك يمكن للحظة حسيت انك ما تباني وانك انغصبت علي او كنت مجرد اختيار امك لك مازن : هنا انا سكت لان اللي تقوله ثريا يمكن هو الصح لكن ما حد جبرني عليها انا اللى في لحظة اخترتها .. ثريا : بلاك ساكت؟ مازن : ما شئ المهم بسألج ناقصج شئ تراه ما باقي شئ على زواجنا ثريا : لا الغالي انا جهزت كل شئ حتى فستان العرس بسير اخر الاسبوع دبي وبختارة مازن : نزين لو نقصج شئ اتصلى فيني وخبريني ثريا : ما تقصر مازن : يالله من رخصتج وكملى رقادج ثريا : يالله في وداعة الرحمن واكيد من قفلت عنه اتصلت على بدرية وخبرتها كل السالفة بدرية : اف شو ها التطورات هههههه قلت لج حياتي شفتي مب بعد الزواج تغير هذا من الحين تغير يالله ربي يوفقج معاه امين يا رب ثريا : امين وانتي بعد ربي يوفقج مع مايد هاه متي قررتوا؟؟ بدرية : عقب شهرين ان شاء الله يعني عقب عرسج ثريا : المهم ترانا ها الاسبوع بنيكم عشان موضوع الفستان بدرية : هلا ومليااار فيكم بتنور دبي الغالية ثريا : منوره باهلها غناتي يالله برايج الحين بنش اصلى العصر بدرية : اوكى في بيت ابو مازن فيصل : توني ظاهر من غرفتي ومتكشخ طبعا قيس : على وين لا تقولي على حمر عين هههههه فيصل : لا ساير الشارجة عشان كروت العرس خلاص جاهزات قيس : الشارجة وبروحك لا الشيخ لازم حد يسير وياك فيصل : قلت له بمكر هيه صج بتصل على واحد من الربع يسير معاي قيس : وليش تزعج ربعك انا حاضر فيصل : لا انت عندك دراسة قيس : يالله عاد ربع ساعة وبكشخ وبنزل لك فيصل : لا تتأخر ونزلت دقيت باب غرفة اماية وابوي وقلت لهم اني ساير الشارجة عشان كروت العرس وقيس بيسير معاي ام مازن : عطيت مازن عشرة الاف لاني قايلة ان مصاريف كروت العرس علي فيصل : ما رديت الوالده وخذت البيزات وسرت الكراج شغلت السيارة وشوي ونزل الاستاذ قيس وسرنا الشارجة طبعا اتصلت قبل بخلود وقلت لها قيس : من الحين وزارة الداخلية لها القرار ههههه فيصل : افا عليك هذا كله دهان سير هههههه لا طبعا لازم اقول لحرمتي عشان تعرف تحركاتي قيس : يا حسرة شو تحركاتك يا الجامعة يا البيت يا المسيد ابعد مكان سرت له الشارجة اليوم ههههههههه فيصل : نزين وانت شو حاشرنك؟ قيس : اقولك شئ احسن لي اسكت لتشحوتني الحين في غرفة مازن بعد ما رمست ثريا ما ياني رقاد مب عارف اصلا شو صار وله شو قلت انا يمكن حاب انتقم من الريم لكن هي شو ذنبها ويمكن انا خلاص لازم اتعود ان ثريا حرمتي وما باقي شئ وتكون في بيتي .. في غرفة مزنه مزنه : كنت اصلى العصر طبعا متأخر لاني رقدت وما حسيت بالوقت ولا حد نششني متعود قيس ينششني لانه دومه متعود اني احل له واجب الانجليزي بعد ما سارت الريم اللي كانت تساعده في حل الواجبات .. رن مبايلى وانا بعدني اصلى وبعد ما خلصت مصلية طالعت منو متصل وحصلت رقم خلود رديت اتصل عليها مزنه : هاه حرمتي اخوي شو عندج ؟ خلود : هلا والله باخت ريلى ههههههه شحالج؟ مزنه : يسرج الحال .. خلود : اقولج ترومين تين عندنا البيت اليوم مزنه : شو عندج شو تبين ؟؟ خلود : لا مب انا ابي مزنه : عيل منو؟ خلود : حسين مزنه : ححححسين؟؟!! خلود : هيه هو طلب مني اتصل عليج يبي يرمسج وجه لوجه مزنه : بشوف لو حصلت حد يبني خلود : قولي لمازن لان فيصل سار الشارجة هو وقيس مزنه : اها اقول انا ما حد نششني اليوم ونشيت متأخرة خلود : المهم شوفي مازن وردي علي مزنه : ان شاء الله وطلعت سرت غرفة مازن دقيت الباب حصلته ما حد نزلت عشان اشوفه يمكن تحت عند اماية ما حصلت حد في البيت كلهم ظاهرين اتصلت على مبايل اماية وقالت لي انها ظاهرة هي وابويه عند واحد من ربع ابويه عازمنهم .. اتصلت على مازن .. مزنه : هاه مازن وينك فيه؟ مازن : في العين ويني بعد مزنه : يعني مشغول؟؟ مازن : عند سعيد ربيعي شو تبين ؟ مزنه : ابي اسير بيت عموه خلود تباني ضروري مازن : نزين تجهزي وثلث ساعة بمر عليج مزنه : اوكى وبعد ما قفلت عنه اتصلت على اماية وستأذنت منها ووافقت وعقب طلعت لبست بس ما حطيت أي مكياج وتحجبت ولبست عباتي وسمعت هرن سيارة مازن نزلت له مزنه : ركبت السيارة وحصلت بنت صغيرة مع مازن مازن : روان سلمي على خالوه روان : يايت ويلست في ثبان مزنه وسلمت عليها مزنه : فديتها منو هاي؟ مازن : روان بنت سعيد ربيعي مزنه : ما شاء الله عليها حبوبة يالله عقبال ما نفرح بعيالك مازن : ان شاء الله قريب مزنه : او في تغير ملموس مازن وايد مستانس على عرسة مب اول من حد يطرى له السالفة تضايق .. رن مبايلى كانت الريم متصلة علي الريم : هاه القاطعة اللي ما تسألي إلا لو انا سألت مزنه : لا فديتج مب قاطعة بس .. وما لحقت اكمل رمستي ومسكت روان التلفون من ايدي ويلست ترمس الريم مازن : ضحك بالقو من حركة روان وحركتي انا في الاستغراب منها روان : الو الريم : الو الريم : منو معاي؟؟ بس ما حد يرد مزنه حاولت اخذ المبايل من ايدها ما فيه فايده الحبيبة ملصقتنه في اذنها وماسكته بايدها عشان جي حولته سبيكر هههههههه الريم : الو مزنه : اسفة بس هاي روان خذت المبايل من ايدي الريم : روان ؟؟ منو روان مزنه : افا ما تعرفين روان ؟؟ هاي بنت مازن مازن : طالعت على مزنه وستغربت بس سكت الريم : جي مازن عنده بنت وانا ما اعرف؟؟ حسيت انه مقلب لكن فضولي بيقتلني ابي اعرف منو ها البنت مزنه : امزح معاج هاي روان بنت ربيع مازن الريم : اها المهم يمكن امر عليج عقب صلاة العشاء اشتقت لكم مزنه : انا مب في البيت ولا حد في البيت اجلى ييتج لين باجر الريم : وينكم؟؟ مزنه : عمتج وريلها معزومين عند ربيع ابويه وفيصل وقيس في الشارجة عشان كروت العرس ومازن مودني بيت عمتي عند خلود الريم : ما كانت تدري ان مزنه مخليه المبايل سبيكر وقالت اها سايرة بيت اهل حبيب القلب ؟؟ مزنه : لا انا سايرة مع خلود الله يخسج يا الريم شو ها السوالف وقفلت المبايل بعد ما حسيت ان قلبي نار وويهي صاير احمر شو هاه احس مازن طالع علي وما صدقت على الله اني وصلت بيت عموه .. مازن : يوم تخلصى اتصلى علي عشان ارجعج مزنه : ان شاء الله حطيت روان على الكرسي اللي كنت يالسة فيه وحبيتها على خدها وايدها وقفلت الباب وسويت لها باي ودخلت حصلت خلود وعمتي في الصالة يلست شوي معاهم عقب طلعنا انا وخلود غرفتها .. ظنكم تصرف مازن اوكى؟؟ وحسين شو يبي حق مزنه؟؟ كل هذا بنعرفة في الجزء الياي |
|
|
|
03-04-2005, 12:43 PM
|
#32 | |
|
مشاركة: على طول العمر حبك هو الوحيد اللي سكن قلبي
في بيت ام علي
الريم : دخلت غرفتي ويلست قبال مراية كبيرة في غرفتي وقدامها طاوله متوسطه كنت حاطه عليها ادوات مكياجي وعطوراتي فتحت شعري طالعت علي ويهي منو انا؟؟ شو بلاني؟؟ ليش عايشة؟؟ ابي اموت ومنو انا عشان اقرر اني اموت دام رب العالمين عطاني عمر ؟؟ نزين ليش ابي اموت؟؟ ما اعرف لا تعرفي شو؟؟ ايه تعرفي انتي تحبين وحبيبج تخسرية يوم عن يوم لا ما احبه لا تحبينه ما اعرف ما اعرف مسكت احمر الشفايف وكتبت على المراية مازن أحبك ومسحته عقب ما طالعت عليه وبجيت لاني عارفة ان ها الحب مصيره الموت وانه جرح كبير بيكون في قلبي ما ادري متي بيندمل ظهرت من غرفتي وسرت المطبخ وصرخت في الخدامة ما ادري بلاني ابي اتهاوش مع احد ابي اصرخ ابي ابجي ابي امووووووت هذا كله لاني عرفت ان مازن رمس ثريا اليوم وان ما باقي على عرسهم غير اسبوعين !! يا ترى بكون على قيد الحياة لين هذاك اليوم وله بكون مت من القهر؟؟ مب انا اللي خطيت الخطوه الاولي مب انا اللى شجعت عموه ومازن؟؟ استاهل عيل اللي يجرالى لكن انا ما كنت اعرف اني احبه اف كل مره اوصل لنفس الكلمة ما اعرف ما اعرف في ها اللحظة ما عندي خيار ثاني حضن امي اللي محتاجة له الحين عشان اقدر ارقد يا رليت اقدر افقد الوعي عن العالم لحد ما يخلص عرس مازن وتمضى شهور على زواجه واتعود على فكره انه خلاص عرس .. ام علي : كنت اخبر الخدامات عشان يسون شويه تعديلات في ترتيب الصالة لاني اموت في التغيرات ما احب كل يوم نفس الشكل وشوي ويات ريم وهي تبجي ولوت على بقوه علي : كنت توني داخل البيت وبعدني ما رمست الريم عن الموقف اللي صار وما كنت مقرر اني ارمسها لاني متأكد انها ما كانت متعمده بس كنت حاب اقولها تكون اكثر حذر في المرات الياية بس شفتها لاوية على اماية الريم : بجيت لحد ما فقدت الوعي علي : سمعت بس اماية تزجر على الريم وهي تقول لي الحق علي اختك فاقده الوعي وبدون شعور ركضت صوب اماية وشليت الريم وركبتها السيارة واماية ركبت يمها بدون عباية ولا شئ وسرنا بها المستشفي .. في بيت ابو مازن في الصالة ام مازن وابو مازن توهم راجعين البيت ومن التعب دخلوا بعد صلاة العشاء الغرفة يرتاحون في غرفة مازن بعد ما وصلت مزنه بيت عموه وديت روان عند ابوها وعقب ترخصت منه وسرت البيت ما ادري ليش حاس بضيق ما ادري احس اني مخنوق ومب عارف بلاني فتحت الكمبيوتر وعلى مجلد كنت مسمية ((إليكِ)) في الصفحة رقم 136 كتبت ((هل هي نهاية كل قصص الغرام هكذا ؟؟!! ام اننا من نصنع نهاية قصصنا ؟؟!! أحبك كلمة لم استطيع ان اقولها لها طوال حياتي ليس لشئ ولكن كنت ارغب ان احافظ عليها لا ارغب ان اخدش حيائها ولا ان انطق بكلمة متأكد لو انني قلتها ستجر خلفها مليار كلمة اخرى .. ولكني اليوم اخسرها إلى الابد .. اليوم فقط اشعر انني خنتها عندما تحدثت مع غيرها حتى لو كانت الاخرى خطيبتي .. أحبك كلمة اقولها لك انتي فقط يا من تسكنين قلبي ولا اعتقد انك في يوم ستغادرينه ... أحبك اكتبها بآهات قلب محطم لانه بيديه قرر ان يقتل نفسه بنفسة عندما ابعدك عن حياته وقرب غيرك .. اعلم انني لا استحق حبك ولكني تستحقي كل حبي... هذه الورقة ليست اعتذار لك انتي بل هي اعتذار لذلك القلب المحطم..))) في بيت ابو حسين خلود : وصلت مزنه غرفة حسين وعقب صمت كبير صار في الغرفة كسرته انا لمه استأذنت اني اخرج عشان اخلى لهم الحرية عشان يرمسون مع بعض في اشياء خاصة فيهم هم الاثنين مزنه : غمضني منظر حسين ولد عمتي حبيبي وروحي وهو راقد على السرير على ظهره مب قادر يتحرك حسيت بقهر كبير عشان جي قررت ان عيوني ما تي في عيونه وله بموت ما اقدر اتحمل منظره جي رغم اني حاولت اتماسك وخليت نظري كله تحت حسين : ادري صعب ان حبيبتي ونور عيني تشوفني بها الشكل لكن يا مزنه انا بخطوا خطوه واخيره عشان اقدر استردج عشان اقدر اسعدج بس ابي موافقتج عليها بعد ما اقول لج كل شئ في خاطري مزنه : اسمعك ... حسين : يمكن ما فيه داعي نرمس عن الماضى بس فيه شئ واحد حاب اكده لج انج بالنسبة لي حب الطفوله مثل ما انتي كتبتي في رسالتج لي وانج ولا يوم سرتي عن بالي حتى في الايام اللي حكمت علي اماية اني اتركج وان كل واحد يسير في حال سبيلة مزنوه هذا الاسم اللي تحبيني ازجرج فيه تذكرين؟؟ (حاولت اتماسك وامنع أي دموع عشان ما اقدر اطالع دموع مزنه اللي كان ظاهر عليها انها تحاول تتماسك رغم ان صوت بكائها واصل لاذني وحاولت اتناساه) مزنوه حياتي انا بعد عرس مازن وفيصل بسافر للعلاج لو رجعت بعدها ان شاء الله ما راح اخليج طول عمري هذا لو انج تبيني ولو الله كتب غير جي ابيج تعيشى حياتج وطال الصمت بعد ها الكلام لان اكيد كل منا كان يمسح دموعة لان الكلام اللي قلته صعب علي وصعب على مزنه انها تسمعة لاني اعرف ومتأكد انا شو بالنسبة لها مزنه : الحين بس قربت منه وقلت له حسين غناتي خلينا نعرس الحين حسين : الحين؟؟ مزنه : هيه نعم انا مستعده اعيش معاك الحين ما ابيك تسافر اعرف انك يمكن ما لجأت للعلاج إلا عشان خاطري حسين : بعد ها الكلام شو مفروض اقول؟؟ اكيد السعادة اللي في قلبي كبيرة لكن انا عاقل ولازم افكر بمنطق كيف ارتبط فيها الحين وقلت لها انا وعدتج اني اكون لج في حالة اني تعالجت ولو ما فيه امل من علاجي يوم ارجع بنشوف كيف ممكن نرتبط وانا بها الحالة تكوني انتي فكرتي زين.. مزنه : ابيك بكل حالاتك حسين : أحبج مزنه : ظهرت من الغرفة خلاص مب قادرة اتحمل اكثر من جي ودخلت على غرفة خلود وبجيت من خاطري خلود : بلاج ؟؟ مزنه : احبه احبه والله احبه خلود : عسى ربي يوفقكم وانتي ادعى له انه يتعالج مزنه : آمين خلود : بعد حالة مزنه جي لازم ايب لها شئ بارد عشان ترتاح ويلست معاها لحد الساعة 10 عقب اتصل عليها مازن بروحة وقال لها انه ياي ياخذها .. في سيارة مازن مزنه : مسكت مبايلى ورسلت لحسين مسج تدري ليه الليل يتليه النهار؟؟ لجل تفرج بعض ضيق الصابرين وتدري ليه الحظ ما فيه اختيار؟؟ لجل نبلا ثم نعين ونستعين وتدري ليه الله خلق قلبي يسار؟؟ لجل قدرك دايم بقلبي يمين مازن : شو فيج بلاها عيونج ؟؟ مزنه : حسين بيسافر بعد عرسكم .. مازن : اعرف مزنه : طالعت عليه مستغربة قلت له كلكم تعرفون وانا اخر من يعلم؟؟!! مازن : ليش مفروض انتي تعرفين قبلنا؟؟ (ادري سؤال غبي بس ما اعرف حسيت بجرح اختي حسيت كم صعب انك تحب شخص وتحس انك راح تخسره او انه بعيد عنك ما كنت حاب أي انسان في الكون يتعرض لها الموقف وخاصة اختي) مازن : اسف بس ما ادري بلاني مزنه : اكتفيت اني طالعت عليه عقب طالعت على مبايلى اللي كنت انتظر رد على مسجى لكن الانتظار طال ووصلنا البيت وطلعت غرفتي اللي صرت اكرها من كثر ما احس فيها بضيق واتذكر فيها كل احزاني .. لكن اليوم انا محتاجة لها محتاجة مكان ما فيه غيري عشان ابجي من خاطري ولكن صدى كلمة احبج اللى قالها حسين اليوم احس انها زلزلتني من الداخل احس انها غسلت كل الجروح اللي سببها لي حسين واللى طبعا ما كان يقصدها .. وصارت مثل الجبل العالي اللي ما اقدر اصعد عليه بس يسعدني انه موجود في قلبي .. واخر امنية تمنيتها قبل لا ارقد ان حسين يرجع لي بالسلامة ... في المستشفي .. ام علي : كنت يالسة يم سرير الريم اللي كانت مرقده عليه علي : انا بعد كنت واقف قريب من الريم وبس انتظر منها تتحرك او تنطق بكلمة وانتظارنا طال لين صباح اليوم الثاني .. الحمد لله الريم الحين احسن والدكتور حتى قال عادي نظهرها .. رجعنا البيت ورغم التعب اللي فيني ما قدرت اخلى الريم ولا اماية ويلسنا حواليها.. ام علي : خلاص يا علي يا ولدي روح ارتاح انت وخلى اختك ترتاح .. الريم : لا علي لا تروح خليك يمي اماية خليج يمي ابيكم لا تخلوني مره ثانية بروحي محتاجة لكم علي : كنت اطالع اختي وهي تقول ها الرمسة وقلبي يتقطع اكيد فيه سبب لكل اللي تقوله اكيد انها تخاف ان نتركها مره ثانية مثل في الماضى عشان جي قربت منها ولويت عليها وقلت لها ما راح نخليج الغالية ارتاحي الحين الريم : علي انا اسعد بنت في الكون لانه عندي اخ شراتك علي : اقولج انتي خاطرج تبجيني وله شو؟؟ يالله عاد تراه ما احب الافلام التراجيديه خلج ريم اللي اعرفها قوية وعن الدلع ام علي : يلست يم الريم ويلست اللعب بشعرها .. الريم : يالله اشكثر احس بالدفء والاطمأنان بس ليش قلبي نار حاسة اني في أي لحظة بتتوقف نبضاته .. علي : خلاص مب قادر اتحمل الوضع احس اني لو يلست اكثر ببجي وانا ما ابي اكون ضعيف قدام اختي وقلت لها يالله بسير ارتاح انا ما يسد انج متعبتنا طول الليل الريم : انزين بشرط انك يوم تنش تيا تيلس معي علي : ان شاء الله عمتي وحبيت الريم على خدها وظهرت ام علي : لويت على الريم وقلت لها بلاج حياتي شو مزعلنج ؟؟ الريم : ما شئ اماية بس تعبانه من الجامعة يمكن ام علي : عيونج تقول اللي متعبج ها القلب ... الريم : اه يا يمه يتي على الجرح بس ما اقدر اقول أي كلمة وحاولت انكر وغمضت عيوني عشان اماية ما تشوف الدمعة اللي تلمع فيها وقلت لها برقد.. ام علي : خليتها على راحتها لكني يلست يمها وتميت اللعب بشعرها .. في بيت ابو طارق ثريا خبرت اماية وابوي اني بسير دبي عشان فستان العرس .. ابو طارق : منو بيوديج انا مشغول ثريا : بقول لطارق وسرت غرفة طارق وقلت له طروق حياتي بتوديني دبي ها الاسبوع طارق : لا ما اقدر ثريا : افا يعني انا منو يوديني ابويه مشغول وانت ما تقدر اتصل يعني بعيال اليران طارق : لا قولى لمازن يوديج عادي اماية بتسير معاج ثريا : مازن؟؟ لا ما اعرف استحي طارق : عادي ما فيها شئ هذا خطيبج وعقب سبوعين بيكون ريلج .. ثريا : (هي فكره بس طبعا انا مستحيل اقول لماية وله لابوي) طارق :بلاج؟؟ ثريا : ما شئ ونزلت تحت وخبرت ابويه ان طارق ما يقدر ابو طارق : خلاص انا بوديج بترخص من الشغل في غرفة طارق طارق : مب قادر اسير دبي لو اني مشتاق لحور وايد لكن ما اقدر اطالع في ويها عقب اللي سويته صج انا مب عارف كيف تجرأت ورمستها هذاك اليوم انا لازم ابعد عنها واخليها تعيش مع ذكري ريلها المتوفي .. عشان جي مب ساير دبي .. في بيت ام مازن مزنه : ما سرت اليوم الدوام واتصلت عليهم على اساس اني تعبانه ومديري حليله قالي اوكى مازن : انا نزلت عشان اسير الدوام وسمعت اماية ترمس في التلفون من صباح الله خير استغربت منو ترمس الحين وحاولت القط من الرمسة منو ترمس ام مازن : هيه فديتها نزين ليش ما قلتوا لنا تراه الريم بنتي بعد خلاص الحين بي اشوفها مازن : الريم؟؟ منو ترمسين ا ماية؟ ام مازن : خالتك ام علي تقول ان الريم البارحة اغمى عليها وودوها المستشفي .. مازن : يعني هي الحين في المستشفي؟ ام مازن : لا في البيت ظهروها اليوم .. مازن : اها سلامتها ما تشوف شر يالله المهم بسير الدوام انا تامرين علي شئ ؟؟ ام مازن : لا الغالي سلامتك مازن : ظهرت من البيت ومب عارف كيف قدرت اسوق السيارة لين الدوام ما اقول لكم كيف احاتي الريم لو كانت الحين في بيتنا ما كنت سرت الدوام كنت تحججت باي شئ وتميت في البيت لكن الحين هي بيت امها كيف بقدر اتطمن عليها اكيد انها اهملت في اكلها وصحتها ادري فيها تهمل وايد في صحتها .. في حجرة مزنه ام مازن : دقيت الباب على مزنه وقلت لها دامج مب سايرة الدوام اليوم قومي بنسير نزور الريم وخبرتها عاد السالفة مزنه : رغم اني طول الليل ما رقدت ورغم التعب اللي انا فيه بس من سمعت من اماية ان الريم تعبانه نشيت وسبحت بسرعة وجهزت ونزلت لها كانت هي خبرت ابويه وسرنا نزور الريم.. فيصل : انا الوحيد اللي محتشر عشان سالفة العرس انسق كل شئ اما الاستاذ مازن مخلى كل شئ على انا لكن معليه هذا اخوي الكبير ولازم اتحمله وبعدين انا عارف انه مب وايد خاطره في الزواجه هاي.. بعد ما خلصت مع الشركة اللي استأجرنا منها الخيام وخبرتهم المكان ونسقت كل شئ وكم طاوله ينزلون في كل خيمة وبعد نسقت مع العيالة وكل الامور سرت البيت وانا هلكان من التعب يعني من اظهر من البيت الصبح ارجع بالليل وخطيبتي خلود ما صرت وايد اتصل فيها ولا اهتم فيها لكنها فديتها مقدرة كل الامور خاصة انها عارفة ان كل شئ علي .. .. مازن : اليوم اخر يوم لي دوام عقبها بتبتدى اجازتي السنوية اللي مفروض اكون ماخذها عشان اعرس وارتاح لكن التعب مب راضى يخليني في حالي مب تعب جسدي بكثر ما هو تعب نفسي مب باقي شئ على عرسي وانا بعدني مب عارف شو اللي يصير داخلى احس ان لين يوم العرس بيصير فيني شئ احس اني امشى لقبري بايدي .. مب عشان ثريا مب حبوبة وله شئ لا لكني عارف قلبي اللي مب قادر ينسى الغالية الريم اللي تعبانه ومب قادر حتى اني اسير اشوفها .. من ظهرت من الدوام اتصلت على اماية وخبرتها اني ساير بوظبي بصراحة ابي ابتعد ابي اريح وقلت لها بسير عند سعيد ربيعي عشان انسق كم سالفة واماية فرحانه تحسبني انسق معه عشان عرسي ما تدري اني شارد عن سالفة التفكير في عرسي.. في بيت ابو حسين حسين : احس ان الايام تمضى بطيئة يمكن لاني ابيها تمضى بسرعة ويعرس مازن وفيصل وسافر عشان اعرف مصيري ما ادري احيانا احس اني متفائل وايد وان رب العالمين بيكرمني لكني يوم اتذكر اللي سويته في اليوم اللي سويت فيه الحادث اقول يمكن لا لكن ما فيه حد يعلم شو رب العالمين كاتب له هاي مجرد مخاوف طبيعية يحس فيها كل انسان يخاف من رب العالمين .. خلود : خلاص مب باقي شئ واصير في بيت فيصل واكون ملك له وحده رغم اني في البداية انتظر ها اليوم بفارغ الصبر عشان اظهر من ها البيت لكني الحين احس بخوف وبصراحة علاقتي بامي اللي تغيرت خلتني احس اني ما ابي اظهر من البيت لكن ظهرتي بتكون ظرورية في كل الحالات خاصة ان اماية وابوي بيسافرون مع حسين اخويه عقب عرسي بثلاث ايام وانا وفيصل بعد بنسافر ماليزيا عقب بنلحقهم بنيلس معاهم كم يوم عقب نرجع الامارات.. في دبي بدرية ومايد كل يوم ظهرات مع بعض وتجهيزات للعرس وحجز الفندق وغيره من ها الامور ولكن اليوم بدرية ترخصت من مايد عشان ثريا اللي بتيها عشان تسير معها تختار فستان العرس وتشتري كم شغله ناقصتها يعني بتكون مشغوله مع ثريا اليومين اللي بتكون هنا فيهم يعني مايد بتعطيه اجازه هههههه مايد : يعني انا ما لي اهمية في ها الايام اللي بتكون فيها ثريا هنا انا زعلون بدرية : فديت الدلوعين .. مايد : لو ما اتدلع على عيوني بدور اتدلع على منو يعني ؟؟ بدرية : فديت روحك لا تسوى ها الحركات لانك تخليني اموت فيك اكثر (ويلى على الويه اللي صار احمر ) مايد : لا بقول دامج بتحبيي وايد رن مبايل بدرية في ها الحزه وطالعت بدرية الرقم وستغربت .. هاه شو رايكم زواجه مازن وثريا بتكتمل وله بتتكنسل؟؟ حسين بيسافر وله بيصير شئ يأخر سفره او يكنسله نهائي؟ ظنكم منو متصل ببدرية وشو بتكون رده مايد يوم يعرف؟؟ |
|
|
|
|
03-05-2005, 01:31 AM
|
#33 | |
|
عين على بني عمرو
|
مشاركة: على طول العمر حبك هو الوحيد اللي سكن قلبي
الوفااااااااء
الله يرج ابليسك خلاص شكلهم بتتزوجو وينتهون وانتي ماخلصتي القصه هههههههههه انتي كملي القصه بعدين ندعي لهم! بتحديد مصيرهم لك تحياتي وعاش من شافك والله |
|
|
|
03-20-2005, 08:20 PM
|
#34 | |
|
مشاركة: على طول العمر حبك هو الوحيد اللي سكن قلبي
هلا وغلا مسكتوووه والله
اقول انا القصة مب راضية تفتح عندي اثاريك انت هنا هههههههه (قوية هاي) معليه انت تتحمل الصعب مب صح؟؟ |
|
|
|
|
03-20-2005, 08:26 PM
|
#35 | |
|
مشاركة: على طول العمر حبك هو الوحيد اللي سكن قلبي
على شاطئ الجميرا
كانت بدرية يالسة مع مايد تقوله ان ثريا وامها ياين عندهم اليوم ولكن رنين مبايلها والاسم اللي ظاهر في تلفونها خلانها تطالع المبايل وتطالع مايد .. مايد : منو داق ردي بدرية : هذا طارق اخو ثريا مايد : طارق شو يبى بعد هذا وليش داق على مبايلج؟ بدرية : ما ادري لحظة وردت عليه وطبعا مايد كانت معصب بالقو حتى انه تشاور كم مره ينش بس ما يقدر يخلى بدرية بروحها وما يقدر يزعلها طارق : ما ادري شو اقولج اسف يمكن خوفتج وله سببت لج ازعاج بس فيه موضوع ابي ارمسج فيه وما ادري الوقت مناسب وله بدرية : تفضل خوفتني تراك طارق : حور بدرية : حور حرمة اخوي بلاها؟؟؟ مايد : كنت اطالع بدرية وهي ترمس طارق وكنت ميت من القهر وكان خاطري يكون هذا اللي اسمه طارق قدامي واصفعة طارق : هيه نعم انا ما ادري ليش لمه شفتها ارتحت لها واحس اني ابي اكمل معاها مشوار حياتي حاولت اني ابعدها عن حياتي حاولت اني اترك التفكير فيها بس ما قدرت بدرية : كنت مصدومة بالرمسة اللي يقولها طارق وحسيت بقهر كبير وعشان انهي ها المكالمة اللي مالها دعوه قلت لطارق انا الحين برع البيت مع مايد عقب اشوف ها الموضوع يالله باي وما عطيته فرصة يقول كلمة زيادة. مايد : بلاه استاذ طارق شو عنده ؟؟ بدرية : حسيت اني بموت لمجرد اني اتخيل حور مع طارق وانها تعرس غير اخوي ونشيت وقلت لمايد ممكن توصلني البيت؟ مايد : بلاج بدور شو فيج؟؟ بدرية : بليز مايد ما ابي ارمس الحين ابيك توصلني البيت ممكن وله اسير بروحي؟ مايد : لا لا بوصلج وصلتها البيت وكانت طول الطريق ساكته ولا ترمس على عكس عوايدها دومها تسوي حشره وتسولف وتنكت وتضحك وما حبيت اضايقها وخليتها على راحتها لو اني من داخلى خاطري اعرف شو الموضوع اللي رمسها فيه ها الطارق خلاها تتضايق منه بدرية: وصلت البيت وحمدت ربي ان ثريا وامها بعدهم مب واصلين لاني مب خاطري اشوف حد منهم الحين ودخلت البيت حتى ما قلت لمايد ادخل وطلعت غرفتي بدون ما ارمس حد خاصة اني شفت حور وعزه في الصالة يالسات يطالعن التلفزيون وما قلت لهن حتى السلام وطلعت غرفتي .. عزه : عن بوه السلام ببلاش وله صار بفلوس ونحن ما نعرف بدرية : طالعتها وكملت طريقي لغرفتي عزه : وين سايرة ثريا واهلها في الطريق يعني قرب ما يوصلون بدرية : ما رديت عليها وكملت طريقي في العين في بيت ام علي مزنه : بما اني اليوم مب مداومة يلست مع الريم حتى بعد ما رجعت اماية البيت وقلت بتم عندها لين بالليل .. الريم : كنت وايد مستانسة بيلسة مزنه معاي ويلسنا وسولفنا اول مره مزنه تفتح لي قلبها وقالت لي عن كل علاقتها مع حسين وعن اخر التطورات اللي صارت وطلبت مني ادعي لحسين انه يرجع بالسلامه وطبعا بدون ما تطلب مني انا داعية له من قلبي لاني اعرف شو يعني حسين بالنسبة لمزنه وهي غالية على وما تهون فديتها ام علي : بعد ما خليتهن يسولفن مع بعض وانا ظهرت سرت السوق اشتري الاشياء الناقصة رجعت وطلعت غرفة الريم عشان اتطمن عليها وقلت لهن بتنزلن تتغدن معي وله اخلي الخدامات يطلعن الغدى هنا لكن؟؟ الريم : لا اماية بننزل لاني ملانه من يلسة الغرفة ام علي : يمكن مزنه تستحي وله شئ؟ الريم : لا من منو تستحي بعدين علي تراه ولد خالها واصلا علي مب هنا ساير الشارجة مزنه : نزين ياللة نزلنا ام علي : انا بسبقن تحت وانت تعالن وراي يالله لا تتأخرن تراني ميته يوع مزنه : ان شاء الله خالتي وبعد ما ساعدت الريم ونسلت لها كشتها مثل ما كانت الريم تسميها نزلنا ويلسنا نتغدى وبعد صلاة المغرب طلعنا غرفة الريم وفتحنا موضوع زواج مازن وفيصل وشو بنلبس؟ الريم : حسيت قهر الكون كله فيني احس الحين اني بموت يالله كيف بحضر زواج مازن؟؟ كيف بشوفه ييلس يم ثريا ويرمسها ويضحك معاها ويسولفون كيف بتقبل هاي الفكرة واني لازم اشيله من تفكيري شو اللي خلاني اخطو خطوه عشان مازن يخطب ثريا؟؟ يا رب ساعدني وتنهدت تنهيدة مكشوفة انها تنهيده ضايق مزنه : فديتج شو فيج جي ضايقة ؟؟ الريم : ما شئ الغالية بس ما كنت ابي عرس مازن وفيصل وانا جي مريضة مزنه : انتي ما فيج شئ هذا بس دلع المهم شو ما قلتي لي شو بتلبسين تراني انا فصلت وكنت بفصل لج بعدين قلت يمكن ما يكون اللي بفصلة من مقامج الحين الريم : ابتسمت لمزنه وقلت لها هيه ما دريتي صرت من الشيوخ الحين وقلت لها الغالية ما فيه شئ تغير تراه وبعده ذوقج يعيبني عشان جي انا بشلج واي السوق وبشتري فستان جاهز مزنه : هيه انتي ممكن تحصلين على رشاقتج لكن انا الدبه اللي لازم افصل الريم : يلسنا نسولف يمكن وما حسينا بالوقت وعقب اتصل فيصل في مزنه انه هو بياخذها لان مازن في ابوظبي ما بيقدر يمر عليها وبعد ما سارت مزنه يلست في غرفتي ضايقة خلاص ما باقي شئ على زواج مازن خلاص لازم يعني اشيله من تفكيري لازم اتخلص من ها الحب اللي ما اكتشفته غير متأخر او حتى يمكن ما ادري ان كان هذا حب وله انانية ؟؟!!(طبعا هذا الكلام اللي قلته لنفسي عشان اشتت الضيق اللي فيني) في دبي وصلوا قوم ثريا وابوها وامها وسلموا على الكل وعقب ثريا : عيل وين الدبه بدور ؟؟ عزه : دخلت ترقد ثريا : عيل بطلع لها وسرت غرفة بدرية ونصدمت يوم شفتها تبجي وهي ماسكة شئ في ايدها قربت منها وسلمت عليها وما حسيت انها مرحبة فيني مثل ما كنت اعتقد عشان جي لفترة حسيت بضيق بدرية : مسحت دموعي ونشيت سلمت على ثريا وسكت وهي كانت بعد ساكته لاني اكيد قتلت كل شئ في داخلها تبي تقولي اياه يوم شافتني ابجي وعشان جي ما هانت علي وقلت لها اسفة بس ما ادري ليش تذكرت اخوي فهد اليوم ثريا : تصدقين يوم شفتج جي تبجين قلت اكيد متهاوشة هي ومايد وتوقعت الصورة اللي في ايدج صورة مايد بدرية : لا لا ما متزاعلين انا ومايد بعدين ما يقدر يزعلني الحين خلاص ما باقي شئ على زواجنا (حاولت اغير المود عشان خاطر ثريا حرام هي ما ذنبها اللي قاله اخوها طارق) وحاولت انسى الموضوع لانه اصلا عمره ما راح يصير وطارق انا بتصرف معاه . في بيت ابو حسين خلود : خلاص خلصت كل ترتيبات العرس لكنها حليلها تعاني من الحين خوف يوم العرس وعقب العرس كيف بتكون مع فيصل كيف تسعده كيف تهنية وكيف تحافظ على بيتها مع فيصل بدون أي مشاكل هي يمكن صغيرة في السن بس ما شاء الله عليها عاقلة وايد وبعد فيصل شخصيته حلوه ويمكن هذا اللي طمنها . حسين : انا احاتي سفري وما ادري شو بتكون النتائج يا تري برجع لمزنه وله بخسرها طول العمر؟؟ ما ادري بس عندي امل وربي ما يخيب لي ها الامل وحاولت افرح لاختي بزواجها خاصة اني اعرف فيصل ما شاء الله عليه خير الشباب وها الايام وايد ايلس معاها واسولف لها ويمكن ها الشئ احسة مريحنها لاني اكيد حاس في اختي انها قلقة ام حسين : احس الحين وضع البيت اوكى احس اني ام وعيالي حوالي احس ان عيالي يحبوني مب شرات قبل كنت اشوف في عيونهم الحقد والغيض من تسلطي عليهم بس عسى ربي يقدرني واسعدهم وينسون معاملتي السابقة لهم . بو حسين : صارت شوي فيه كلمه لي في البيت واحس اني اب وزوجتي وعيالي حوالي ويمكن اول مره احس بفرحة لزواجة وحده من بناتي اول مره ازوجهم واحد وانا موافق عليه واول مره احس وحده من بناتي تتزوج وهي راضية مب مجبورة على ها الزواج.. في بيت ابو مازن قيس : احس اني ميت قهر الانسة مزنه بيت اهل الريم وانا هني وسط ها الكتب قهر صراحة لازم ادور حد يوديني عندهم بس شو الحجة؟؟ هيه حصلتها ونزلت بسرعة وانا ماسك كتابي الانجليزي وقلت لماية بصراحة انا عندي امتحان باجر وابي الريم تدرسني ام مازن : بنت خالك مريضة ما تسمع انت؟ قيس : نزين بسير اطمن عليها وعقب لو شفتها بخير بخليها تدرسني الله يخليج اماية وافقي ام مازن : منو بيوديك ابوك مب هني وفيصل حليلة مشغول ومازن في بوظبي قيس : بسير بتكسى الله يخليج اماية وافقي وحبيتها على راسها اسميني لوات هههههه ام مازن : ابوي سير ادري فيك لو ما خليتك بتحشرني وتراه لا تحسب اني مصدقة سالفة امتحان الانجليزي .. وسرت غرفتي ويبت له بيزات وما شاء الله عليه اقل من ربع ساعة كان عاد قيس قدامي متكشخ والعطر من بعيد ينشم وانا من سار اتزهبت وسرت بيت اليران اطمن على ولدهم اللي طايح فضيحة بيقولون ما حد وصلنا وهايلا يراني ما يهونون علي . في بوظبي مازن : ترددت اني اسير بيت سعيد ربيعي ولكن اعرفة انه بيزعل لكن هو يوم اقوله اني ضايق ما بيقول شئ عشان جي نزلت في الفندق لاني قررت اتم هنا كم يوم وفي الليل بتصل عليه وفعلا بعد صلاة العشاء اتصلت عليه وقلت له انا موجود في المارينا تمشينا شوي وعقب يلسنا في كوفي شوب سعيد: هاه المعرس يالله ما باقي شئ على عرسك والله وبتصير معرس يا مازن مازن : سعيد لو قلت لك ما ابي سعيد : اعتقد كل اللوان اللى موجودة في الكون صار لون ويهي وقلت له شو تقول انت شو اللي صاير عسى ما شر مازن : بنت خالي مب قادر انساها احبها وحسيت اني خاطري اصرخ واسمع العالم فديتها مريضة وما قدرت اوصلها واشوفها خايف اضعف لاني اعرف نفسي ما اقدر اتحمل اشوفها مريضة سعيد : استهدى بالله يا ريال تراك مب يالس تلعب انت خطبت البنت وملجت عليها والحين تقولي بنت خالي ما يصير يا مازن مازن : حاس مخنوق سعيد حاس نفسي بموت لين يوصل يوم عرسي ما اقدر اتزوج أي بنت غير الريم ما اقدر ودموع عيني نزلت بدون احساس مني على كثر ما كنت منحرج من سعيد ربيعي على كثر ما حسيت على الاقل بشويه راحة بعد ما نزلت ها الدموع اللي كانت كاتمه على صدري .. سعيد : الموقف اللي فيه ربيعي واخوي مازن صعب وانا مب عارف كيف اساعده ولا بشو انصحة خايف اقوله يكنسل ها الزواجه ويظلم خطيبته وخايف اقوله يكمل ويظلم نفسة وانا عارف مازن من النوع اللي يخبي في قلبه بس يتعب وخايف عليه فعلا يصير فيه شئ مازن : يمكن ساعة انا كنت يالس ومخبي ويهي من سعيد ومن الكون كله ما ابي حد يشوفني بها الضعف واخر شئ ما قدرت ا تحمل ونشيت وقلت لسعيد بسير سعيد : على وين يا ريال؟؟ مازن : مب قادر اتحمل ونشيت وشليت سويج سيارتي ومشيت بسرعة سعيد : لحقته ورغم ان خطواته سريعة لحقته وركبت السيارة يمه مازن : حطيت راسي على الستيرنج وبجيت من خاطر سعيد : الشيمة مازن ما اقدر اشوفك بها الحالة الشيمة لا تحسسني بالذنب انا اللي نصحتك ترتبط باللي امك اختارتها لك ما كنت مقدر شو يعني تحب بنت خالك مازن : الكلام اللي يقوله سعيد عورني لاني ما ابي ربيعي يحس بالذنب لكن فعلا يمكن انا سمعت كلام سعيد وما كان مفروض اني اسمعة يالله يا رب وصرخت احبها والله احبهااااااااااااااا وتميت اصارخ سعيد : كنت اشوف ربيعي يصارخ قدام عيني ومب قادر اسوي له شئ والاتصال اللى يا حج مازن فاجأنا احنا الاثنين .. مازن : هذا البيت ما لي خلق ارد عليهم الشيمة سعيد رد انت وقول لماية اني معاك واني في الحمام ادري فيها تحاتيني سعيد : شليت مبايل مازن ورديت على خالتي ومب على عوايدها كانت تصيح وحالتها حاله وقالت لي عطيني مازن بسرعة يا ولدي سعيد : يا ربي مازن مب مزداد حد يضايقة بس ما ادري بلاها خالتي قلت لها خير خالتي فيه شئ؟ ام مازن : هيه خلي مازن يرجع الحينه وهي كانت تبجي ....... سعيد : ان شاء الله خالتي وقفلت عنها ومسكت مبايلى واتصلت على حرمتي وقلت لها انا بسير العين وطلبت من مازن ينتقل من مكانه انا بسوق عنه مازن : بلاك سعيد شو صاير؟؟ بلاها اماية شو قالت لك ؟؟ سعيد : ما شئ ومسكت مبايل مازن ومبايلى وقفلتهم وحطيتهم في مخباي مازن : شو صاير قولي لا تخليني اخاف سعيد : ما شئ ما فيه شئ بس انت ضايق وما ابي حد يضايقك زيادة وبعدين خالتي كانت تحاتيك وقلت انا بوديك لاني انا اصلا ابي اسير العين لانه عندي كم شغله هناك مازن : لا والله شايفني ياهل قدامك تقص علي اقولك قول شو صاير عسى ما شر ؟؟ تراه شكلي تعودت على الصدمات قول سعيد : شو اقوله هذا الحين وسكت عنه وانتبهت لطريق وشكلة اقتنع اني ما بقوله شئ ورتحت يوم شفته نزل الكرسى اللي يالس وغمض عيونه وحط ايده على ويهه . في بيت ابو طارق طارق : البيت فاضى ما فيه حد موجود بصراحة حاس بحيرة كبر ها الكون شو سويت انا وليش رمست بدرية وقلت لها الموضوع مب انا كنت مقرر اني انسى السالفة؟؟ صج انا احس اني مب طبيعي معقوله ان حور سحرتني لها الدرجة نزين اللي خلقها خلق غيرها ليش هي بالذات احس اني يوم افكر افكر فيها وليش هي اللي احس اني ابي اكمل حياتي معاها ما اعرف شو اللي انا فيه صج تعبت خلاص حاولت اني اشيلها من تفكيري بس ما قدرت . عقب اتصلت على اهلى وطمنت انهم وصلوا دبي وعقب قفلت مبايلى ودخلت غرفتي وشغلت البلاي ستيشن ويلست اللعب اعرف اني يالس اضيع وقت بس ما وراي شئ اسويه .. في دبي ... مايد : كنت احاتي بدرية لاني بعد ما وصلتها البيت حاولت اتصل عليها بس ما ردت علي وبدرية مب عوايدها انها تطنشني وبصراحة بعد فضولي بيذبحني ابي اعرف شو قال لها ها الطارق خلاها تتضايق جي فديتها رسلت لها مسج يوم تهدين طمنيني عليج الغالية .. عقب سرت ايلس مع اماية وخواتي بصراحة تولهت عليهم واحس ان كل وقتي اقضية مع بدرية (مب متضايق من ها الشئ) بس اهلى بعد فديتهم لهم حق علي .. ولكن عوض يخلى حد في حالة .. عوض : او ميود هنا في البيت مب عند خطيبته ؟؟ قم قم بتسير وياي اليوم ملجة يعقوب قم بنسير نغير جو وبنيول .. مايد : عاد انا ابي سبب اظهر من البيت ومن قالي ما وايد تحايل علي سيده نشيت وقلت لماية اسف بس ولدج ما يخلى حد في حاله خخخخخخخخ(اونه ) ام مايد :هيه صج الحين عوض السبب قول انت ما تداني تيلس مع امك وخواتك إلا تبي تظهر طول الوقت ما اعرف عقب الزواج كيف بتيلس في البيت عوض : فديتج اماية تراه اليلسة مع حرمته غير مايد : فديتها والله حرمتي يالله متي بي يوم عرسي عوض : ما شئ الريال مستعيل وهو ما باقي شئ على عرسة اقل من شهرين عيل شو اقول انا ؟؟ مايد : المهم يالله بسير اتكشخ وبنزل وطبعا اتصلت على بدرية وما ردت علي ورسلت لها مسج ثاني اني بسير ملجة يعقوب ربيع عوض وطبعا قلت لها عقبالنا ههههههههههه في بيت ابو فهد بدرية : كنت يالسة مع خالتي ام طارق وبوطارق واهلى نسولف ونضحك طبعا بس سبحان الله ما كنت ابي اطالع على ويه حور حرمة اخوي حتى اني حسيت انها حاسة اني ما ابي اطالعها وشفتها ضاقت فديتها لكن غصبا عني ومبايلى حطيته فوق يعني ما شفت ولا مسج من اللي وصلوني من مايد .. ثريا : قلت لبدرية يالله نشينا ما فيه وقت وسرنا السوق عشان نخلص كل شئ وطبعا المكان اللي فيه فساتين الاعراس ما ودتني الليلة عندهم بس باجر اتصلت عليهم وبنسير الصباح بدرية : نشيت وقلت لماية ان بنسير وقلت لعزه تسيرين ويانا؟؟ وما قلت لحور ولكن عزه اعتذرت وحور طالعت علي ونزلت راسها المهم طلعت غرفتي وشفت مسجات مايد واتصلت عليه وما رد علي حسيت اني مقهوره هو مستانس وانا ضايقة معليك يا ميود بس ترجع البيت بنتفاهم ثريا : بلاج تتحرطمين شو عندج كنه عيوز ماكلين عشاها بدرية : الاستاذ مايد ساير ملجة ربيع اخوه ثريا : نزين شو فيها خلي الريال يستانس قبل ما تصكين عليه بدرية : لا والله يستانس معليه بيشوف بس يرجع بالليل ثريا : لا انتي اليوم مب على عوايدج ليكون وجودنا ضايقج؟؟ بدرية : يوم قالت ثريا ها الكلمة حسيت كأن حد صفعني كف على ويهي صج انا بلاني جي وحور حرمة اخوي بلاني عليها هي ما قالت شئ طارق هو اللي يحبها وهي ما تدري عن شئ هي رفضت وايدين من مات اخوي ليش انا ها المره خايفة وما ابي حرمة اخوي تعرس نزين انا انانية؟؟ ثريا : صرخت على بدرية انتبهي الاشارة حمراء كسرتيها؟؟ ظنكم ليش ام مازن تبجي؟؟ بدرية وثريا بيصير فيهم شئ وله؟؟ كل هذا بنعرفة في الجزء الياي تحياتي للجميع |
|
|
|
|
03-20-2005, 08:28 PM
|
#36 | |
|
مشاركة: على طول العمر حبك هو الوحيد اللي سكن قلبي
في بيت ابو مازن
وصل سعيد ومازن البيت وطبعا مازن قرب سعيد الميلس ودخل البيت .. سعيد : كنت ميت خوف حدي مب عارف بلاها خالوه تبجي الله يستر بس اللي في مازن يكفيه مب ناقص أي مشكلة في الصالة ام مازن تبجي وسار مازن صوبها قالها خير اماية شو مستوي ؟؟ ام مازن : خالك يا ولدي اتصل علي واحد من شوي وقالي ان خالك مريض حده وموصى ان نسير نيبة يبي يرجع الامارات يالله يا رب استر علينا اتصلت على ابوك ما يرد علي مازن : لا حول ولا قوة إلا بالله اوكى اماية بشوف الموضوع اتصلت على ابويه وخبرته السالفة وقالي انه ياي الحين وعقب سرت عند ربيعي سعيد وقلت له بعد السالفة المهم اني خذيت رقم التلفون من اماية اللي عطاها الريال اياه وستفسرت عن عنوان خالي وعقب اتصلت على سفريات الامارات وحجزت تذكرتين لي ولابوي وسعيد قال انه بيسير معانا لكن انا قلت له ما فيه داعي الغالي ... بو مازن : وصلت البيت وحصلت ام مازن محتشرة حاولت اهديها وعقب رمست مازن وخبرني انه خذ عنوان خاله وحجز تذكرتين وانا قلت له اتصل بعلي ولده يمكن يبي يسير معانا هذا مهما كان ولده .. ام مازن : هيه اتصل بعلي يسير وياكم تراه ولده ويمكن يوم يشوفه يرتاح شوي مازن : سمعت كلامهم واتصلت بعلي وخبرته السالفة علي : خلاص بسافر معاك لانه مهما كان هذا ابوي وما فيه داعي عيل عمي يسافر معانا بنسير انا وياك .. مازن : لا لا علي انا اقول احسن ابوي يسافر معانا مهما كان نحن صغار وما نعرف شئ خلي ابوي يسافر معانا علي : شورك؟؟ مازن : هيه علي : خلاص بخبر الاهل بس انت متي حجزت؟؟ مازن : الساعة 5 الفجر من مطار بوظبي علي : خلاص الغالي بسير البيت انا الحين اخبر الاهل وايك ان شاء الله مازن : خلاص نترياك في بيت ام علي علي : دخلت البيت وحصلت اماية والريم ومزنه يالسات في الصالة يلست عندهم وقلت لهم السالفة كاملة واني بسافر مع مازن وعمي بومازن ..وله شو قلتي اماية؟؟ ام علي : افا عليك يا ولدي هذا مهما كان ابوك وانا عمري ما بمنعك عنه الريم : لا والله اصلا انتو مكبرين السالفة هذا ما يستاهل هو بروحة سوا في عمره جي خلاص خلوه مثل ما قرر انه يتركنا ويسافر مثل ما قرر انه يضيعنا خلوه يموت هناك مزنه : شو تقولين انتي هذا ابوج الريم : انا شو شفت منه غير كل شر علي : مب وقت ها الكلام الحين ريم وطلعت غرفتي واماية لحقتني وزهبت لي شنطة صغيرة فيها كم غيار وزهبت لي جوازي وكل شئ يخصني .. وقلت لها يالله اماية اتزهبوا بوديكم بيت عمتي عشان تيلسون عندهم لين ما ارجع ما اقدر اخليكم بروحكم في البيت ام علي : ما بينا غير كل خير سافر انت ونحن بخير علي : يمة لا تخلوني احاتيكم يالله قمي نشي زهبي لج شنطة صغيرة وخبري الريم تتزهب يالله اماية لازم نطلع على بوظبي .. ام علي : خبرت الريم وغصبا عنها نشت وتزهبت وانا بعد زهبت شنطة صغيرة وطلعنا كلنا على بيت ابومازن في بيت ابومازن مازن : كنت توني ظاهر من البيت داخل ساير صوب الميلس فشله سعيد بروحة بس كنت اقول لماية تزهب لنا كل شئ وعقب قلت للخدامة تحط فوالة وتوني ظاهر وشفت سيارة علي تدخل البيت نزلت خالتي ام علي وسلمت علي عقب نزلت مزنه والريم اكيد رغم انهم كانوا متغشين بس عرفت مزنه من الريم .. الريم : مريت بدون ما اسلم ولا اقول أي كلمة كنت ضايقة حدي . مزنه : انا وقفت ارمس اخوي وقالي دخلي اماية متضايقة داخل خلج يمها وتم يوصيني على اماية في الميلس قررنا خلاص نطلع الحين وقال سعيد هو بيوصلنا حليله والله سعيد وايد تعبناه ويانا ودخلنا سلمنا على الاهل كلهم وظهرنا على بوظبي .. في دبي بدرية : كسرت الاشارة لاني كنت افكر في رمسة طارق وكنت معصبة على مايد رغم انه ما له ذنب بس انا من النوع اللى اذا تضايقت اخلط الامور في بعض المهم كانت سيارة طالعة من الصوب الثاني يعني ضربت السيارات في بعض الحين انا ما احاتي نفسي انا الحمد لله ما فيني شئ بس يت اطالع على اللي يمي ثريا ازجر عليها ما ترد علي الغريب انه ما فيه أي اثر لدم ولا أي شئ بس ازجر عليها ما ترد حسيت بحالة هستيريا ياتني تميت اصارخ ومسكت مبايلى واتصلت على مايد وما صدقت على الله رد علي وصرخت فيه الحق علي مايد : بدرية بلاج شوي شوي بدرية : انا سويت حادث وثريا ماتت ما ترد علي الحق علي مايد مايد : حادث ؟؟ وبسرعة ظهرت من العرس وانا ما اعرف مكان بدرية وين بالضبط وظهر عوض اخوي وياي بعد ما شافني ظاهر مستعيل لحقني وقالي بلاك قلت له بدرية سوت حادث وما اعرف حالتها كيف عوض : لا حول ولا قوة إلا بالله نزين يالله بسير معاك مايد : اتصلت على بدرية بس ما ترد علي حسيت بموت لان حالتها كانت مب طبيعية وهي ترمسني خفت يكون فيها شئ اتصل على مبايلها مره وفي المره الثالثة ردت علي سألتها وينج فيه؟؟ بدرية : انا في سيارة الاسعاف مع ثريا الحقني المستشفي انا ما خبرت اهلى ما ابي ازعجهم لا تطري لهم مايد مايد : نزين الغالية .. عوض : وينها؟؟ مايد: في المستشفي عوض : بلاها متعورة؟؟ مايد : لا بنت خالتها متعورة .. عوض: سقت السيارة وصلنا المستشفي ونزل مايد مثل المينون وسرنا قسم الطوارئ حصلنا بدرية يالسة على كرسى هناك ومن شافتنا ركضت صوبنا ورتمت في حضن مايد بدرية : مايد ما ادري ثريا شو حالتها ما راح اسامح نفسي لو ياها شئ انا شو خلاني اكسر الاشارة وتمت تبجي مايد : نزين خلاص هدى اعصابج حياتي لحظة بسير اتخبر عن بنت خالتج . عوض خلك انت عند بدرية انا بسير اطالع الدكتور سرت ورمست الدكتور وقالي ان البنت ما فيها شئ بس يمكن صدمة عطوها ابره منومه وان شاء الله بعد كم ساعة بتنش .. ظهرت وخبرتهم اللي قالي الدكتور . بدرية : اكيد تجذب علي عوض قولي الصج ثريا بلاها عوض : والله العظيم اللى اقوله الصج بنت خالتج ما فيها شئ كاهي هناك في هايج الغرفة وهي بس انصدمت يمكن من الحادث والدكتور عطاها ابره منومه عشان ترتاح وعقب ما تنش تقدر تسير البيت بدرية : دخلت الغرفة اللي فيها ثريا ومسكت ايدها وحطيت ايدي الثانية على قلبها ايه قلبها يدق بعده حمدت رب العالمين لانه لو صار فيها شئ ما كنت بسامح نفسي مايد : فديتج الغالية ارتاحي عقب زجرت على الممرضة عشان تطهر لبدرية الجرح اللي كان في يبهتها واللي الانسة ما كانت منتبه له من خوفها على ثريا وطلبت من عوض يسير الشرطة عشان يخلص الاجراءات هناك ويطمن على الريال اللي كان في السيارة الثانية . عوض : ان شاء الله الغالي وطمني لو صار شئ مايد : ان شاء الله في بيت ابو فهد حور : زهبت العشى وطلعت غرفتي احس اني تعبانه ومتضايقة من اسلوب بدرية وياي اليوم ما ادري بلاها انا عمري ما زعلتها وخاصة انها قبل لا تظهر مع مايد كانت تسولف لي وعادي ما ادري شو صار خلاها تقلب معاملتها معاي اكيد فيه شئ وانا قررت اني اسألها اول ما ترجع البيت . رن مبايلى طالعت اطالع رقم بدرية قلت الحمد لله انها اتصلت رديت عليها وانا ضايقة بدرية : حور بقولج شئ بس لا تحاتي وما ابيج تقولين لهم اوكى؟ حور : شو فيج بدرية شو صاير؟ بدرية : انا سويت حادث .. حور : شو حادث ويل حالي وتميت ابجي بدرية : بلاج انا بخير وثريا بعد بخير بس هي في المستشفي كم ساعة وبنرجع البيت مايد عندي لا تحاتي بس قولي لهم في البيت ان بنتأخر في السوق ما فيني اماية تحاتي حور: نزين انا بيج الحين بدرية : اقولج ما فيه داعي مايد هنا وبعدين شو بتقولي لهم يوم بتيني؟ حور: مالج دعوه انتي يالله بنزل اطمنهم تحت وبيج سمعتي؟ بدرية : اوكى ادري فيج عنيده وبتسوي اللي في راسج. حور : نزلت وقلت لخالتي ام فهد ان بدرية اتصلت وانهن في السوق بيتأخرن عند المصمم وقالت لي اقولكم عشان ما تحاتون ام فهد: صج تأخرن هايلا حور : تدرين في بدرية يوم تسير السوق خالوه عادي ام فهد : يالله ربي يوفقها إلا انتي لابسة عباتج على وين؟ حور : هيه انا بسير اشوف اماية بس خالوه مايد في الغرفة راقد طالعية بين فترة وفترة اخاف ينش ام فهد : نزين بنتي وسلمي على هلج حور : يوصل خالوه وظهرت وسرت المستشفي انا قلبي ما بيطمن لين ما اشوف بدرية وثريا عزه : انا مسوية معسكر عند خالتي ام طارق وماية اما ابويه وعمي بوطارق ظهروا يتمشون في المستشفي حور : سألت عن البنات اللي مسويات حادث الحين من شوي وخبروني الغرفة ودخلت لويت على بدرية وتميت ابجي اه ما ابي يتكرر عندي موقف موت فهد بدرية : خلاص الغالية ما فيني شئ كاني قدامج وهاي ثريا ان شاء الله بعد شوي بتنش حور : بعد ما تطمنت على بدرية قربت صوب ثريا وتطمنت عليها الحمد لله بخير وعافية مايد: خيبة كل هذا خوف ؟؟ حور : هلا مايد شحالك سمحلى من روعتي ما شفتك مايد : افا عليج مقدر موقفج في مركز الشرطة عوض : حاولت اخلص الموضوع والحمد لله السيارة الثانية اللي كان فيها الريال ما فيه شئ وتفاهمت معاه هو بعد وتنازل عن المحضر وتفاهمنا وتصليح سيارته طبعا على شركة التأمين وتفقنا باجر الصبح أي عشان اكمل الاجراءات .. لانه لازم اراجع شركة التأمين والتأمين الحين مقفلين المهم عقب اتصلت على مايد وخبرته السالفة كاملة وعقب قلت له ايك المستشفي الحين لان مايد ما عنده سيارة ينا انا وياه في سيارة وحده مايد : هيه مر على الحمد لله ثريا نشت عوض : ان شاء الله الغالي مريت على مايد المستشفي ودخلت عندهم عشان اتحمد بسلامة لثريا وعقب قلت لمايد يالله سرينا قالي لا عطيني سيارتك انا بودي بدرية وثريا وحور البيت عوض : هيه وانا الغالي منو بيوديني البيت مايد : تصرف هههههههههههههه حور : لا انا بشل بدرية وحور تراني ياية بسيارتي مايد : لا الشيخة من اليوم انا ما اثق بسواقة الحريم حرمتي بوديها بروحي وهي بذبحها لو مسكت سويج سيارة مره ثانية .. حور : نزين شل حرمتك وانا وثريا بنسير في سيارتي ثريا : لا الشيخة انا مع مايد اريد عمري نسيتوا ان ما باقي شئ على عرسي عوض : طالعت عليها يعني هاي مالجة؟؟ نزلت راسي وقلت عيل انا بسير وانتو تفاهموا على راحتكم حور : لحظة عوض اسمع نزين نحن بنسير عند مايد في سيارتك وانت خذ سيارتي لين البيت لانه ما يصير اوقفها هنا بدرية : صج انكم مكبرين السالفة . مايد : جب انتي بدرية : طالعت عليه (نظره دلع) مايد : قربت صوبها قلت لها عن ها النظرات قدامهم تراني ما اقدر عليها هههههههه بدرية : كنت بسوى حركة ثانية دومه يهاوشني يوم اسويها بس الموقف ما يساعد ههههه مايد : خذيت انا سيارة عوض وشليت بدرية وثريا وحور وعوض خذ سيارة حور لين البيت وعقب رجعنا انا وياه البيت بعد طبعا ما دخلنا وثريا قالت لهلها السالفة . في ابوظبي سعيد : وصلنا بوظبي قلت لين موعد الطيارة بنسير بيتنا ترتاحون عقب نسير المطار . بومازن : فكره زينه يا ولدي علي : قربت صوب مازن وقلت له كيف ابويه بيرجع الامارات وهو بعده حكمه ما سقط؟؟ مازن : السالفة هاي انا ما فكرت فيها الحين بس انتبهت لها وقلت له ما اعرف بس بعيوني علي : رديت له النظره نفسها وعقب نزلت راسي ما كنت حاب انحط في ها الموقف ويمكن كنت طول الوقت افكر كيف بشوف ابويه بعد ها السنوات يا تري كيف شكله يا تري تغير وله بعده بنفس الطبايع وفكرت شو بيسوي لو رجع فعلا حياتنا من يديد؟؟ بومازن : حطيت راسي لين الساعة 3 موعد نسير المطار باقي ساعتين يمكن مازن : اتصلت بماية اطنها ان في بيت سعيد ادري في اماية تحاتي . في المطار مازن : ودعنا سعيد ..وقلت له بطمنك اول ما اوصل ادري فيك مثل اماية تحاتي سعيد : كنت توني بقولك مازن : نزين اعرفك تراه من دون ما تقول مب ربيعي . في دبي ثريا : طلعت ترتاح فوق بعدها تأثير الابرة في جسمها بدرية : كنت ارمس مايد في التلفون وشوي ودخلت حور حور : ما رقدتي؟؟ بدرية : ليش اللي ريلها مايد يخليها ترقد عيل بالذمة تعبانه وتوني مسوية حادث ويالس يرمسني (قلت ها الكلام وانا امزح) مايد : اسف نزين لو ازعجتج(حسيت شوي باحراج) بدرية : ويلى على الحساسين اقولك استخدم سنسوداين امزح بلاك بوزت ؟؟ مايد : تقولين ها الرمسة قدام حرمة اخوج ؟؟ بدرية : نزين امممممممممموح هاي بوسة على راسك سامحنا غلطنا في حقك مايد : هيه الحين اوكى ههههههه المهم بخليج يالله ارتاحي واول ما تنشى الصبح طمنيني عليج بدرية : ان شاء الله يالله حياتي تصبح على خير حور : كنت يالسة يم ثريا وبدرية تراه بخير نشيت بظهر لكن زجره بدرية رجعتني بدرية : حور حور : لبية بدرية : اسفة على معاملتي لج اليوم ما ادري بلاني حور : ما فيه داعي ترمسين الحين لكن تأكدي اني خاطري اعرف بلاج اليوم كنتي جافة معاي رغم انج قبل لا تظهرين عند مايد كنتي اوكى بدرية : ما شئ انسى السالفة حور : لا ما راح انساها ابي ارمس فيها ممكن؟ بدرية : ان شاء الله بس خليها في يوم اكون فاضية حور : خلاص الغالية يالله رقدي بعد تقولين ان اللى عنده حرمة اخ مثل حور ما يرقد بدرية : لا بقول اللي عنده حرمة اخ شراتج يا حظه وسعده حور : ابتسمت لها وظهرت . في بيت ابو حسين خلود : طبعا عرفت ان خال فيصل مريض وايد وان عمي ومازن وعلي سايرين يرجعوه الامارات وصج من خاطري تميت ادعي له حليله حرام اللى يصير فيه حسين : انا بعد ادعي ما يصير شئ ويأخر زواج مازن وفيصل لاني ابي اسافر بعد زواجهم ما ابي اتأخر اكثر من جي .. ام حسين : اول مره احس اني متعاطفة مع بوعلي اللي يمكن كان مره سبب اني خليت ولدي ينسى خطبته من مزنه لكن ها المره احس اني ظلمته واتمني يرجع واتسامح منه لاني وايد ظهرت عليه رمسة .. صح انه هو غلط لكن انا بعد زيدت في الرمسة .. في بيت ابو مازن ام مازن : أطمنت يوم اتصل فيني ابومازن وقالي انهم وصلوا كندا وحاولت اطمن على اخوية لكن قالي بعدنا ما نعرف كيف وضعة لانهم بعدهم ما كانوا ساروا له .. ام علي : لا تستغربون انا كنت ادعي من خاطري ان بوعلي يرجع بالسلامة بس كنت خايفة كيف يرجع والحكم بعده ما سقط عليه .. ما كنت حابة انه يتبهدل وهو في ها السن ومريض لكن وكلت امري لرب العالمين شوي ورن تلفون البيت مره ثانية جان ترد مزنه على التلفون أم مازن : جان ابوج عطيني اياه مزنه : هلا خالوه بخير يسرج حالنا لا الحمد لله بخير لا ما فيه شئ لا والله متي؟؟ ما درينا سلامتها ما تشوف شر .. ام مازن : منو داق شو السالفة؟ مزنه : حطيت ايدي على سماعة التلفون وقلت لماية هاي خالتي ام طارق ام مازن : منو مريض ليش تقولين سلامات؟؟ (صاير قلبي ما يتحمل أي شئ) مزنه : ما شئ اماية(با حبيت انقل لها الخبر هي بروحها تحاتي ما فينا تتعب مره ثانية) ام مازن : قربت صوبها وخذت السماعة من ايدها ورمستها وعرفت ان ثريا تعرضت لحادث بس الحمد لله هي بخير الحين لكن طبعا قلبي عورني لين ما رمستها وتطمنت عليها هاي فديتها خطيبة ولدي وما باقي شئ وبتصير حرمة ولدي ..عقب خبرتها عن اخوية المريض وان مازن وبومازن وعلي ولد اخوي سايرين يشوفونه .(طبعا ام طارق ما تعرف سالفة اخوي وشفت ما فيه داعي انها تعرف شئ) ضنكم بو علي بيرجع الامارات؟ زواجه مازن وثريا بتكتمل؟؟ حسين بيسافر وله فيه شئ بيصير يعطل سفرة؟ وعوض شو رايكم ممكن يصير له دور في القصة؟ حور بتتواجه مع بدرية عن سبب تغير بدرية عليها وشو بتكون رده فعلها يوم بتعرف السبب؟؟ |
|
|
|
|
03-20-2005, 08:30 PM
|
#37 | |
|
مشاركة: على طول العمر حبك هو الوحيد اللي سكن قلبي
في بيت ابو مايد
عوض : كنت يالس مع اماية واسولف معاها يالله عاد ما اموت اطفر فيها هههههههههه فديتها امايه دوم تقولي يا ولدي ايلس عني تراني حرمة كبيرة وانا اقول فديتج انتي بعدج شباب حتى ندور لج معرس ههههه بدل ابويه طلقية وما عليج منه ... وندفعة المؤخر ام مايد : مسود الويه شو ها الرمسة؟؟ عوض :يالله ما يهون عليها ابوية ... معليج لو ما فضحتج يا ام مايد ما اكون عوضين ههههههههه رغد : مرحبا ملايييييييين قم نتوايه عوض (دوم احب ارمس مع اخوية عوض لانه حبوب وايد) عوض : هلا هلا بالشيخة رغد مرحبا قربي قربي يا ولد هات القهوة رغد : السموحة منكم بس قهوتكم مب مشروبة عوض : افا يا بنت العرب ليش؟؟ رغد : انا عندي طلب وابيك تنفذه لي ولو ما نفذتوه قهوتكم مب مشروبة عوض : فالج طيب يا اخت الريايل شو هو طلبك ام مايد : طالع والله صج انكم مخبل يا ربي ما حد من عيالي طلع عاقل مايد : كنت توني داخل البيت طبعا لا تتعبون انفسكم وتسألون وين كنت لاني مليار في المائة كنت عند خطيبتي بدرية بس سمعت اماية وهي تقول ما حد من عيالي عاقل قلت لها طبعا انا عاقل بس خخخخخخخ عوض : لا يحوشك اقول العقل اصلا ما خطف بك رغد : وانا اشهد يا شيخ بس لا تنساني الموضوع اللي كنت ارمسك فيه عوض : هيه صح نرجع لمحور حديثنا رغد : انا ابي اسير عند ربيعتي في الشارجة وابيك توصلني عوض : بس هذا طلبج؟؟ رغد : هيه فديتني بس هذا عوض : عيل لا تشربي قهوتج لاني ما بوصلج ههههههههههههههه رغد : مسكت كوب الماي وصبيته كله على عوض (رده فعل طبيعية) مايد : وتقول اني انا مب عاقل؟؟ رغد : كنت توني بنش اشرد عن عوض إلا ومسكني من شعري اللي كنت مخلتنه مفتوح (اخج فيه) عوض : انا يا رغيده تصبين الماي علي ؟؟ معليج وتميت اكفخها رغد : اماية مايد لحقوا علي ام مايد : تشتاهلين حد قالج تجبين الماي على اخوج؟؟ مايد : فديتها اختي اضربها اكثر يا عوض (تحسبيني بدافع عنج؟؟) رغد : اكتشفت للمره الاولي في حياتي اني عايشة مع عائلة شريرة عوض : فديتج الحين خلاص ريحت ضميري يالله بسير حجرتي باي مايد : جي الشيخ ما بتظهرخلينا نسير نسهر مع الربع قبل لا نعرس ههههههههه؟؟ عوض : مالي شغل فيك ولا في ربعك هايلا يودون في داهية رغد : نزين داهيه يمدحوها ليش ما تسير اصلا قالوا لي الجو هناك يهبل للي مثلك عوض : يا ربي ما كان خاطري اضحك يا جماعة وقفوني اختي رغد تنكت وقربت صوبها وقلت لها بصوت عالي (وخري) بس طبعا اسلوب مزح ههههههههه مايد : اماية بطلع اسبح انا وابيج تسوين لي فحم ابي اتدخن بهاياك العود اللي شميته هايج المره وانتي تدخنين ابوية منه عوض : ايه انت هذاك بس لريلها وولدها عوض بس وله انت خلاص بتعرس وحرمتك بتهتم فيك مايد : وانت ليش ما تعرس شو ماسكنك تراك كبرت وله تحسب عمرك صغير؟؟ عوض : شو عندك عروس لي؟؟ مايد : هيه نعم ام مايد : منو؟؟(يالله عاد ما فرحت بها الخبر انا خاطري افرح فيه ها الولد عسنه يعقل بعد ما يعرس) مايد : عزه اخت بدرية ام مايد : هيه والله رغد : لا والله كله ولا عزه ما نباها حرمة ها الشيخ اخوي الحبوب ياخذ هايج المبوزه اربعة وعشرين ساعة وكل همها في الدراسة .. عوض : قالتها اختي حبيبتي وطرشت لها بوسة في الهوى وسرت عنهم غرفتي مايد : يالله وانا بعد بسير غرفتي اسبح ويوم انزل احصل الدخون جاهز رغد : انا يلست في الصالة واتصلت على ربيعتي وقلت لها ما بيج ما حد من اخواني فاضى لو اني تولهت عليها لكن حكم القوى علي الضعيف.. في بيت ام مازن أم مازن :زيارة ام حسين وخلود شوي رحتنا وصج اثرت فيني وايد ام حسين وين ام حسين الاولية الحين غير سبحان الله يغير ولا يتغير مزنه : يلست يم خلود وتخبرتها عن حسين خلود : الحمد لله يالله عسى ربي يشافيه ادعي له انتي يا مزنوه مزنه : والله داعية له من قلبي في حجرة ريم.. يالله كم اشتقت لها الغرفة اللي يمكن بالمقارنة مع غرفتي في بيت اماية هي ولا تي شئ لكن انا احب ها الغرفة اللي عشت فيها ايام كثيره من عمري ما ادري بعيش كثرها في الغرفة اللي بيت اماية وله ؟؟ موضوع ابوية وايد مأثر فيني كل ما احاول انساه يصير شئ يذكرني فيه انا ما اعرف كيف شكل ابوية واعتقد ان الاحساس اللي احسه تجاهه طبيعي لاني ما شفت منه غير الشر .. كيف بستقبله كيف بشوفه وهل بيرجع وله اجله بيوصل قبل لا يرجع (على ما سمعت ان حالته وايد خطيره ) في المليس قيس : كنت يالس هناك مع واحد من ربعي في المدرسة كان ياي ييلس معاي على اساس ان ندرس عشان باجر عندي امتحان لكن طبعا ما يخلى الموضوع من ان نلعب اول شئ (الاحداث اللى تصير في بيتنا على رغم توتر الكل إلا اني احس انها ما تعنيني واول مره ما افكر فيها وتي من الله مثل ما تي) في دبي في بيت ابو فهد حور : خذيت كوبين نسكفيه حجي وحج بدرية اللي كانت يالسة في الحديقة كانت يالسة تطالع مايد ولدي وهو يلعب بدرية : هلا بالحامل والمحمول ونشيت اشل الاكواب عن حور حور : نزين يا بدور فاضية وله وراج شئ؟؟ بدرية : لا فاضية ما وراء شئ غير الكرسي ههههههه شو عندج غردي حور : بسألك عن الموضوع اللي خلاج تتغيري علي هايج المره شو السالفة؟؟ بدرية : يعني ما فيه مجال اني ما اقول؟؟ حور : لا بدرية : طارق حور : انخطف لوني وتغير كله وحسيت مرتبكة معقولة اللي اسمعه؟؟ وسألت وما ادري كيف ظهرت الكلمة بلاه؟؟ بدرية : اتصل فيني في اليوم اللى كنت ظاهره فيه مع مايد وقالي انه معجب فيج وقال شو يباني اساعدة اني اوصلج ها الرمسة حور : شو؟؟ هذا وبعدين معاه؟؟ بدرية : بعدين معاه؟؟ ليش هو رمسج قبل؟؟ حور : بصراحة هيه رمسني لمه كان مسافر مصر بدرية : اها وانتي شو رايج؟؟ حور : عندج رقمة؟؟؟ بدرية : هيه حور : طلبت من بدرية تظهر لي رقمة من مبايلها وهي تقولي فهميني لكني مب عارفة شو بيصير اتصلت بس ما حد يرد .. بدرية : ممكن تفهميني شو بتسوين؟؟ حور : ما شئ شليت كوب القهوة وطلعت غرفتي .. مسكت صور فهد وحضنتهم بقوة احس إني مشتاقة له موت اول مرة احس انه بعيد عني ومب قادر يحميني اول مرة احس انه هو في خطر وانا اللي لازم احمية شريط طويل من الذكريات بدأ يشتغل مع كل صورة اقلبها في الالبوم اللي كنت يالسه اطالعة ومع كل صورة كانت مب اقل عن عشر دمعات تنزل ان الشخص اللي كان واقف معاي في كل صورة مب موجود الحين بعيد عني وبعيد وايد .. رن مبايلى ما كان لي بارض ارد على التلفون رنينه المتواصل ظهرني من عالمي اللي كنت فيه وشليت المبايل ورديت وكنت توني امسح دموعي طارق : السلام عليكم حور : وعليكم السلام طارق : خير حور اتصلى فيني؟ حور : على كل الغضب اللي كنت احس فيه من يوم قالت لي بدرية الموضوع بس احس الحين ها الغضب خمد وصرت هادية وقلت له بكل هدوء هيه نعم طارق : خير؟؟!!(مثل اللي ما مصدق اني يالس الحين ارمس مع حور ولا هي اللي كانت متصلة) حور : طارق انت رمستني في موضوع من فترة طويلة وانا نسيته واحسبك نسيته انت بعد لكن رجوعك انك ترمس بدرية فيه هذا اللي ما راح اسمح لك فيه طارق : ليش ما تسمحين حور انا احبج حور : وانا هاي الكلمة ما راح اسمح لنفسي اني اسمعها غير من شخص واحد بس وانت عارفة اعتقد طارق : اللى تسويه في نفسج وفيني حرام حور : واللي انت تسويه فيني مب حرام؟ ليش مستكثرين علي الحياة مع شخص يمكن في نظركم مب موجود على الارض وياي بس هو موجود في روحي وعقلي وقلبي يعني مستحيل ان حد يحل بدل عنه طارق : رمستها وايد قوية بس على رغم جي قسوة كلامها ما خلتني افكر بالانسحاب على كثر ما خلتني افكر في ان اختياري في محلة ومع كل كلمة وفاء تقولها في حق فهد كنت احس اني احبها اكثر من قبل .(يمكن راح تقولوا عديم احساس بس يمكن انا حبيت فيها اول شئ وفائها لريلها وابو ولدها) حور : طارق فهمت كلامي انا اقدر لك مشاعرك بس انا مستحيل اكون لغير فهد وان كان هو اختارة ربه انا موجودة على الارض عشان اربي ولده وان شاء الله بكون معاه في الجنه طارق : قلت لها كلمة فهمت وقفلت المبايل عنها بعدها في بيت ابو مازن مزنه : صج مب منك وخر عني قيس : هيه مب منج من كمبيوترج المنجع هههههههههه مزنه : قيس وخر عني الحين قيس : والاوراق اللي ابي اسويهم كيف اسويهم؟ والاستاذ يبيهم باجر مزنه : مالي دعوة ام مازن : بلاكم انتو محتشرين شو عندكم ؟؟ قيس : اماية الاستاذ عطاني اوراق يباني اطبعهم له وهي ما خلتني استخدم كمبيوترها مزنه : يمه خرب لي الكمبيوتر وانا احتاج له في شغلي ام مازن : نزين سير استخدم كمبيوتر فيصل وفكونا من ها الحشرة قيس : فيصل كمبيوتره مسفرنه مزنه : الله يخسك قيس : والله ما ادري وينه ما حصلته في غرفته وله لو لاقنه ما بحتاج حج بنتج الزطية مزنه : الحين انا زطية؟ ام مازن : نزين ابوي سير استخدم كمبيوتر مازن مزنه : مازن ما يحب حد يفتح كمبيوترة ام مازن : نزين هو ما بيسوي شئ يا ويلك يا قيس لو خربته ما فينا على حشرة مازن يوم يرجع قيس : فديتج اماية وبست اماية على خدها وطلعت(لوات) في السوق فيصل : انا اول مرة اسير اشتري اغراض البيت صج مب عارف محتاس واماية الله يهداها ما رضت تي معاي شو اخبص الحين انا اعرف اني يوم بشل الاغراض هاي لماية بتقولي ناقصة ومب جي يالله اللى علي بسوية خلود : اتصلت على فيصل اطمن عليه اعرف انه حايص الحين في السوق وقلت له عيل كيف يوم بنسكن بروحنا بيت فيصل : حزتها اخذج وياي نشتري الاغراض . بس اماية منو يفتك من لسانها ههههههههه خلود : خلاص غناتي انقل لي الحدث بعد ما عموه تطالع الاغراض ههههه فيصل : نزين ولا يهمج تامرين امر الشيخة خلود : احم جان استحي في بيت ابو طارق طارق : انا مب عارف اللى صار اليوم صج ؟؟ الحين انا رمست حور يا ويل حالي انا نزين كيف قلت لها فهمت وانا مب فاهم ولا شئ او يمكن استغبي اه يا حب تمكن في قلبي لج يا حور ثريا : خلاص جهزت كل اغراض عرسي وما باقي علي شئ ابدا حتى الصالون اتفقت مع حرمة تيني من الشارجة وبتعدلني وبدرية بتي قبل العرس بيومين .. خلاص ما باقي شئ على العرس بس مازن اللي مسافر هو وابوه عشان خالة (طبعا ثريا واهلها ما يعرفون سالفة خال مازن انه كان تاجر مخدرات وانه محكوم عليه وانه شارد من تنفيذ الحكم) في بيت ابو مازن ام علي : يالسة انا والريم ومزنه نسولف وام مازن في الحجرة راقدة رن التلفون وشلته مزنه مازن : هلا مزنوه شحالج وشحال الاهل كلهم المهم خبري اماية ان باجر بنرجع يالله سلمي على الكل في امان الله ام علي : مازن وله ابوج؟ مزنه : مازن يقول انهم بيرجعون باجر ام علي : اها زين الريم : لويت بوزي وطلعت الغرفة وانا طالعة شفت باب غرفة مازن مفتوح ودخلت انصدمت يوم شفت قيس موجود قيس : الريم ؟؟ شو يايبنج؟ الريم : هاه؟ شفت الباب مفتوح وقلت بقفلة قيس : هيه تقفلين الباب زين (حليلها تحسبني مب فاهم) الريم : يالله من رخصتك قيس : كملت شغلي على الكمبيوتر اللي يسمعني يقول خبير مب كأني يالس اطبع كم ورقة وعطيت امر لطابعة انها تطبع الورق بس ما عطتني الاوراق يا ربي شو فيه قلت اتفيتر بروحي المهم خزنت اللى سويته وقفلت الكمبيوتر وقلت بفتحة مره ثانية وبرد اشغلة يمكن عقب تطبع بس ما رضت والكمبيوتر علق وتم جي .. (لا حول ولا قوة إلا بالله يعني شكلي بتصفع من مازن يوم بيرجع) شو اسوي الحين؟؟ ولو خبرت مزنوه اكيد بتخبر اماية بسير اشوف الريم يمكن تعرف تصلحة في غرفة الريم : قيس : دقيت الباب الريم : ما فتحت الباب ما لي خلق اشوف حد وتعمدت اني ما ارد ولا افتح الباب قيس : حاولت بس ما فيه فايدة عشان جي قلت بسير اصلى الحين وعقب يوم ارجع اشوف يمكن يكون انهدى الكمبيرتر خخخخخخخخ في المسيد قيس : صليت وتوني ظاهر تلاقيت مع طارق اخو ثريا سلمت عليه وتميت اسولف معاه عقب قلت له طارق انت تفهم في الكمبيوترات؟ طارق : هيه شو عندك ؟؟ قيس : استخدمت كمبيوتر مازن وما ادري ليش الطابعة ما رضت تطبع طارق : اها نزين خلاص بشوفة انا هاته لي قيس : وليش ايبه لك انت يالله قم سير وياي البيت تراك مب غريب نسيبنا طارق : اوكى يالله وسرنا بيتهم قيس : حصلت خالتي ام علي ومزنه في الصالة قلت لهم طارق معاي ابي اطلع معاه الغرفة وقلت لهم يوخرون عقب زجرت طارق وصعدنا غرفة مازن وتم طارق يحاول يصلح كمبيوتر مازن وانا نزلت ايب عصير على الاقل فشلة وعقب ثلث ساعة بالضبط رجعت طارق : عندك فلوبي فاضي قيس : هيه عندي ليش؟؟ ما رضت تشتغل الطابعة؟؟ طارق : لا شغلتها بس ما فيها اللوان بس اسود هاه شوف وطبعت له ورقة وانت الاوراق اللي تباهم ملونات قيس : يعني اشتغلت الطابعة اف الحمد لله بفتك من هزبة مازن وغلاسة مزنه طارق : نزين يب لي فلوبي عشان اخزن عليه شغلك عشان الحق اسير البيت اسوي لك برنت ويبه لك قيس : نزين وسرت غرفتي ايب الفلوبي لطارق ويت وعطيته اياه خزن شغلي وظهرنا مع بعض عشان اوصله تحت الريم : كنت توني ظاهرة من غرفتي بعد ما هديت شوي واف مره ثانية انصدمت بالريال اللي كان مع قيس شو ها الحالة انا ليش دوم تصير لي ها المواقف مع الريايل؟؟ قيس : ما اقول لكم اني تفشلت اكثر شوي بس شو اسوي بنت خالي دومها عليها مواقف بس هي ما متعمدة ولا تعرف ان طارق معاي طارق : طالعت عليها وحاولت اركز في ملامحها ما ادري شو صار فيني وعقب تخبرت قيس عنها وطبعا بطريقة ذكية وقلت له منو هاي اختك؟؟ قيس : لا هاي بنت خالي الريم طارق : هاي الريم ؟؟ قيس : اسلوب طارق في السؤال كأنه فيه شئ عشان جي حسيت اني عصبت وشكل عصبيتي ظهرت على ويهي عشان جي قالي طارق : نزين يالله المهم ما بتأخر ثلث ساعة بسوي لك البرنت للاوراق وبيبهم لك .. قيس : بسير وياك بدل ما اعني بك طارق : على راحتك وركبنا سيارتي وسرنا بيتنا طلعت غرفتي طلبت برنت للاوراق وما فيه حد في البيت غير ثريا وهي في غرفتها . قيس : يلست في ملسهم بروحي ..وأفكر في الريم اللي ظهرت قدام الريال جي ها البنت ليش دوم جي معليه حصل خير .. في بيت ابو مازن في غرفة الريم الريم : شو سويت انا دوم اتجفط قدام الريايل؟؟ بس الغلطة مب مني ها المرة عيل منو هذا اللي مطلعنه قيس فوق بدون ما يقولي وعقب تذكرت هيه هذا اخو ثريا .. انا شفته قبل جي يوم اهله مسوين له حفلة بمناسبة رجوعة البلد في المطبخ ام علي : حاسة بملل عشان جي دخلت المطبخ وقلت اسوى العشى بروحي .. مزنه : من يوم خبرت اماية وهي ما خلتني عافصة البيت فوق وتحت تنظف عشان خالي اللي راجع .. ورتبت له غرفة ودخنتها .. وما صدقت على الله اماية صارت راضية ام مازن : كنت افكر كيف بشوف اخوية عقب ها السنوات ؟؟ فديته والله تولهت عليه عقبها بشوي وصل فيصل يايب أغراض البيت اللي امه وصته عليهم وطبعا مثل ما توقع لازم شوي تنجد الاغراض وان ابوه كان يب شئ وهو يايب شئ ثاني فيصل : تراني قايل لج اماية بيب اللي اعرفة ام مازن : فديتك المعرس لا تعصب .. فيصل : بعدكم تذكرون اني معرس ؟؟ ام مازن : وليش ما نتذكر فديتك؟؟ وهو ما باقي شئ على عرسك وخالك بيحضر عرسك بعد فيصل : يالله المهم بسير انا الخياط مثل ما قلتي تراني معرس ام فيصل : فديتك سير ودير بالك على نفسك فيصل : ان شاء الله الغالية في بيت ابو طارق طارق : بعد ما عطيت قيس أوراقة ووصلته البيت رجعت ودخلت غرفتي ويلست يمكن فوق ساعتين وانا محتار شو اسوي ؟؟؟ لكن في مثل ها المواقف لازم اقرر وفعلا قررت اتصلت ببدرية جم مره بس هي ما ردت وعقب رسلت لها مسج بدرية اباج ضروري ضروري المسألة خطيرة ومن عقب ها المسج اتصلت بدرية انا كنت حاس انها ما تبي ترد عشان موضوع حور لكنها عقب ما قرت مسجي ردت تتصل ... في اليوم الثاني سعيد : طبعا انا سرت استقبل مازن واهله من المطار عشان هو متصل فيني وخبرني موعد الطيارة مازن : اكيد كلكم مستغرب كيف خالي قدر يدخل البلد وهو عليه حكم وبعده ما سقط لانه ما كمل عشرين سنه ؟؟ الجواب عندي لان خالي مزور جواز له بغير اسم وطبعا المرض مغير شكل خالي نهائي لانه مريض بالسرطان(الله يبعده عن الكل) .. في بيت ابو مازن الكل كان موجود اهل حسين واهل مازن واهل الريم مزنه : طبعا ما اوصف لكم حالة اماية اول ما شافت خالي ركضت صوبه ولوت عليه ويمكن هي لاوية عليه اكثر من ربع ساعة وتبجي فيصل : سلمت على ابويه واخوي وعلي وعلى خالي سلام عادي لاني بعدني مب متعود على وجودة عندنا ولاني بصراحة مستنكر كل اللي سواه لكن يوم شفت حالته جي كسر خاطري شكل المرض هادنه هد علي : ساعدت ابوية عشان يدخل الميلس وعقب يات اماية وسلمت على ابوية ابو علي : طالعت وطالت نظرتي للحرمة اللي ياية تسلم علي مب ام علي لاني ما مستغرب طيبتها وانا اللي ظلمتها معاي لكن ام حسين اللي يات وسلمت علي وستسمحت مني . قيس : انا سلمت على خالي وعرفته بنفسي ورغم ان الموقف ما فيه مجال ان حد يبتسم يمكن إلا اني يوم عرفته على نفسي الكل ابتسم .. مازن : كنت اراقب بين الموجودين المح أغلي البشر بينهم ريموه لكن ما كانت معاهم وسيده تخبرت عنها قيس لانه هو اقرب واحد كان واقف يمي ام علي : سمعت مازن وهو يتخبر عن الريم وقربت صوبه وقلت له مب راضية تنزل تسلم على ابوها بخلى الحين علي يشوفها مازن : وليش حضرتها ما تنزل؟؟ (ما ادري عصبيتي كان عشان ما نزلت تسلم على ابوها وله لاني متوله عليها وخاطري اشوفها وليش بعد علي هو اللي يطلع يشوفها ليش ما اطلع انا؟) مزنه : كان خاطري ايلس يم خالي بس ما قدرت لان اماية ما عطت حد مجال وطبعا من الصوب الثاني ابويه كان يالس . علي : قربت صوب اماية وقلت لها هاه أماية وين الريم؟؟ ام علي : اختك فوق ما طايعة تنزل تشوف ابوها علي : شو بلاها هاي ما تشوف حالته انا ما اقدر اطلع الحين ارمسها نحن في بيت عموه وفشله اطلع لها الغرفة والعرب كلهم يالسين هنا ام علي : يلست معاهم لانه فشله بعد انش الحين ومب عارفة كيف اقنع البنت تنزل تسلم على ابوها وهي رافضة بشكل نهائي تشوفه مازن : نشيت بدون شعور وطلعت فوق وسيده سرت غرفة الريم ودقيت الباب الريم : ما توقعت ان اللى يدق الباب مازن وفتحت الباب وانصدمت يوم شفت مازن مازن : ريم ممكن ارمس وياج ؟ الريم : كنت عارفة اللي بيقوله وقبل كل شئ قلت له الف حمدا لله على سلامتك مازن : ابتسمت لها وقلت لها الله يسلمج المهم خلينا نيلس في الصالة برمسج الريم : قفلت باب الغرفة وطلعت وطبعا مازن سبقني ويلسنا في الصالة اللى فوق مازن : شوفي انا اعرف شو اللي تفكرين فيه اعرف انج ضايقة من تصرفات خالي واللي كلنا يمكن تضايقنا منها لكن يا الريم لو تشوفين خالي الحين والله يكسر خاطرج تخيلى ان ها الشخص ريال ما تعرفينه ومريض في اخر ايامة معقوله انج بتمنعينه من حنانج وهتمامج به مب شرط تحبينه بعدين لا تنسين ان رب العالمين وصانا على والدينا مهما غلطوا لان غلطاتهم ربهم يحاسبهم عليها مب نحن البشر وانتي مهما رحتى ويتي انتي تظلين بنته وهو ابوج الريم : كنت اتخيل وضعي طول ايام عمري عشت مثل اليتيمة والسبب ابوية ما سده حرمني منه حرمني من اماية واخوي وفرني عند عمتي وانحرمت من اني اقول اماية وامي عايشة .. شو اقسى من جي يا مازن يمكن انتو تقولون جي عشان ما عشتوا اللي انا عشته .. مازن : لا حاسين وانا اقولج تخيلى ان ها الشخص شخص مر بحياتج ما تعرفينه محتاج اهتمامج ورعايتج له بغض النظر ان ها الشخص ابوج بعدين اللى ما تعرفية ان ابوج حالته خطيرة ويمكن ربج ياخذ امانته في أي وقت لا تكوني انتي والزمن قاسين عليه فأنا اطلب منج لو امكن تنزلين الحين وتسلمين عليه الريم : احس ريولي متجمدة مب قادرة انزل مب قادرة اتخيل اني بشوف ابويه احس ان الكرة اللي في قلبي له بيعذبه عشان جي خليني مازن مب قادرة مازن : عشان خاطري لو جان لي خاطر عندج الريم :" اخ يا مازن انت ما لك خاطر عندي" مازن : هاه شو قلتي؟؟ الريم : بنزل مازن : يالله بسبقج انا وتعالي وراي الريم : لا مازن : طالعت عليها شو غيرتي رايج؟ الريم : ما اقدر اروح بروحي ابيك تكون يمي مازن : "فديتها ما تعرف اني يمها لو خطوات تبعدنا قلبي ملك لها" وابتسمت وقلت لها يالله نزين نزلنا الريم : لا مازن : شو بعد؟؟ الريم : بغير الشيلة مازن : نزين يالله اترياج الريم : غيرت الشيلة اللي لابستها وتعطرت وظهرت مازن : يالله نزلنا الريم : اعتقد خوف الدنيا فيني مب عارفة كيف بشوفه وانا نازله ما كنت افكر اني بشوف ابوية كنت افكر اني بشوف شخص غريب عني ما اعرفة ريال كبير ومحتاج لعطف واهتمام وهو في ايامة الاخيرة يعني وجودة مجرد ايام وبيختفي .. مازن : " احساس عجيب اللي احس فيه انا والريم نمشى يم بعض تمنيت ان خطواتي للمجلس تطول لكن امنيتي ما تحققت ووصلنا الميلس فتحت الباب " الكل يطالع على الباب اللي انفتح وكانوا بينزلون عيونهم وبيغيرون وجه نظرهم لكن الشئ اللي كان واقف وراي خلا عيونهم مكانها الريم : مب قادرة ارفع راسي واحس ايدي مثلج مازن : كنت توني بوخر عشان اخلى الشاشة واضحة لشخص اللي واقف وراي لكن ريم مسكت في كندورتي . الريم : همست له بصوت واطي خلك يمي مازن احس نفسي بطيح مازن : لا تخافي انا يمج وفعلا تميت واقف بس وخرت شوي عشان هي تقدر تطالع الشخص اللي يايبنها تسلم عليه الريم : طالعت كل الوجوه كلها بالنسبة لي مألوفة عمتي اماية اخوي مزنه فيصل قيس واخر شئ طالعت على الوجه الجديد في المكان واللي مفروض انا ياية اسلم عليه بس اللي صار ان احساسي اللى كنت حاسته وانا ياية اللى الحين احسه غير وبدل الكره اللي كنت حاسته حسيت ان المكان دافئ وقربت بخطواتي اكثر لشخص اللي يالس وسط عمتي وريلها ووطيت وحبيته على راسه وايدة بعد الكل استغرب اللي انا يالسة اسويه لكن انا بروحي مستغربة من اللي يالس يصير بروحي مب عارفة شو صار فيني احس اني مثل مسحورة الريم : اول مرة في حياتي اقول يييييييييييييييييييبـــــة يالله حلاة ها اللمسة وهاي الايد اللي مسكت ايدي فديتها ابو مازن : هاي الريم بنتك ابو علي : بدون ما تقول قلبي عرفها من اول ما شفتها وكنت ادورها وسطكم وما شفتها وخفت انه يكون صار فيها شئ لاني خذتها من امها وهي صغيرة (كان يقول ها الكلام ودموع تجري على خدة) يمكن كان متماسك قدامهم كلهم لكن قدام الريم صار مثل الطفل الصغير الريم : ما كنت قادرة اقول ولا كلمة كنت ابيه يبجي عشان يغسل الحزن اللي في خاطره رغم ان كل دمعة تنزل من عيونه كانت تعور قلبي وعقب ما سلمت على ابويه سلمت على اخوي علي اللي افتقدته وايد بعد ويلست يمه ابو حسين : يالله نخليك ترتاح يا بوعلي وان شاء الله بنزورك ابو علي : مشكورين ما تقصرون وسلموا على العيال وبعد ما ظهر بو حسين وامه قال بومازن وانا بعد بسير ارتاح شوي احس بارهاق وقال لام مازن يالله تعالي معاي ام مازن : لا انا بيلس مع اخويه ابو مازن : هاي الحرمة ما تفهم خلي الريال يرتاح وييلس مع عيالة ام مازن : هيه نزين مازن ومزنه وفيصل وقيس انسحبوا بعد واحد وراء واحد وفضى المكان على بو علي وامه والريم وعلي وكاهوا احساس أسري يعيشونه هم الاربعة كل واحد ظهر اللي في خاطره وطبعا بو علي تسامح من ام علي وعيالة . ظنكم رغد بيكون لها دور في القصة؟؟ ظنكم طارق في شو يبي بدرية ضروري؟؟ يالله تريوا الجزء القادم طرفووووه |
|
|
|
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| اللي يوصل 3 لقب ,6 العمر ,9 لون | سد الوادي | الألعاب والتسليه | 67 | 02-10-2013 10:24 PM |
| تراك انت الوحيد اللي مااتخيل وداعه | ابوصاهودالعمري | عطر الكلمات | 8 | 06-26-2011 03:29 AM |
| تل قلبي على اللي ذاب قلبي فيه | ابوصاهودالعمري | عطر الكلمات | 8 | 10-21-2010 01:21 AM |
| تــرآك { انت } الوحيد اللي { عجــزت } اتخيل { ودآعه } | نواااااره | عطر الكلمات | 12 | 06-17-2010 09:26 PM |
| غـــلاك اللي نهب قلبي | JUMANA | عطر الكلمات | 12 | 08-20-2009 04:09 AM |
العرض العادي
