الجميل

يابن عمي صار مافيه شيء مستحيل
والجميله سوقها فيه بيع ومشترى

وانت مثلك يشتريها وحظك بالجميل
قلتها واللي بصدري به الخالق درى

عارف الرجل السنافي وله عندي دليل
دام عيني في سما المعرفة باقي ترى

والمعاني بينه وانت تدري يا الزميل
بالظروف اللي هبتني مع العالم ورى

اتصبر واتحاشا وانا قلبي عليل
له ثلاث سنين والجرح ينزف ما برى

مير راسي ثابت في مكانه ما يميل
ماتغيرني ظروف الزمن مهما جرى

والنصوب اللي لها العين في المنشا تخيل
ينسمع رعادها يوم بارقها سرى

والحقيقة واضحة مالها عندي بديل
ينشرح مضمونها لمن سمعها ومن قرا

والله اني مانويت امسك الخط الطويل
مير به شي في القلب في بالي طرى

قمت اعبر وانتقي من الحكم شي جزيل
ماتنقيت الهزايل ولا انقا المفترى

وانت ونعم يابن عمي وحظك بالجميل
قلتها واللي بصدري به الخالق درى

بصراحه تقبل أعجابي
على قصيدتك وبجاريك في كم بيت والمعذره


يامبارك الزمن صار عكس وصار ميل
صار راس القوم تالي قيس حسك وش ترى


مابقى غير النميمه والكلام اللي عليل
قالها الواقع وشوف اللي بصدرك ماجرى


فزعةٍ ماهي بقدر وجاه وأخوانن تشيل
فزعة الرجال موقف بابن عمي تقهرى


أن نصيته في المواقف ما نصيت الا البخيل
وأن عطاك أيمن وقته بالعطيه على الورى


فزعة لضاق حملك جاك بالشئ الهزيل
أن زعل والا يضّييق باللحد تحت الثرى


الجمايل في زمنا عند شيخ وعند أصيل
وما يصح الأ الصحيح اللي صحيح وينقرى


لا يضيق الوزر دام الراس وعقالي يشيل
والله ان لا أعتزي للحمل وأشري مشترى


دام للقالة حميا ساسها عندي دليل
في وضوح الشمس والا في غموض المشترى


أخر المشوار قلبي لا طرى الدرب الطويل
خبريني ياحروف الشعر باللي قد سرى

من مديل العام ذكرى والسنه هذي موديل
والله أن اللي نشوفه صار لعب وميسرى

صار هرج وصار عذل واللي قيل قيل
بعثرة لاصارو العذال تحكي ماطرى

شوف حالك يامبارك لا خلطت البن هيل
وشوف نفس اللي يشوفك من بعيد ومن ورى

الرادار


صح لسانك وبيض الله وجهكـ

لا هنت ياغالي

كل الود,,