قصائد سعد علوش

من ابداعات الشاعر سعد علوش

قصيدة تعال خذني

ياوي النعاس لعين من يرغب بإيواء النعاس
وأنا مجلوي كل نعسة عين مع إني.. سدْر
العقل نعمه لكن احياناً يسبب انتكاس
يشوّقك إن العقول الحين.. ما قلّ و ندر
أنا أفكر كيف ازيل المنحدر من الاساس
والأغبيا لاهين في لذة صعود المنحدر
تعبت لاني من هل الطولات صعبين المراس
اللي يحبون الوفا ولا يحبون الغدر
تعال.. يابن آخي الغلا.. ياهوه.. يا عالم.. يا ناس
يافكر(ابن جدلان)يا تركيبتين من (البدر)
يا معضلة تمشي على رجلين ياالعشر الحواس
يا شاطبٍ من ذاكرة تاريخي الوجه الودر
يا مطلع أهداف أجمل الغيد إلى (رمية تماس)
يا مهدّف بقلبي ثمان اهداف من حب وقدر
تعال اخذني من يدين الهم ووجيه العماس
شوف العرب ضيقة صدر ومشاهدك وسعة صدر

قصيدة جت في وقتها

تنوخذي في بحر فكري واسبحي
وباعطيك جوهرتي.. وقولي:بقتها!!
تفلسفي يا فيلسوفه، واشرحي:
كيف انتي بقتيها.. وكيف اشتقتها
سبحان من نزّل على محمد وحي
وسبحان من مدّ الدروب وسقتها
نفسٍ ليا من سقتها ماتنتحي
حتى لو اني ف البحور اغرقتها
بس اذكري يوم ارتجافات اللّحي
اصخيتي بيدّيك.. وانا اعتقتها
اخاف لا تقولين: ذا مايستحي
واخاف أطفيها وانا ما احرقتها
مغمى على قلبي.. ولكنه صحي
وغربتي العبره.. واناشرّقتها
يا كثر بوحة واحدٍ بك منبحي
وابشرك للحين مافرقتها
الزلة اللي خسّرتني مربحي
عزالله انها منك جت في وقتها
خلتني ادري ان حبك اسطر تنمحي
كذبه كذبتيها وانا صدّقتها

قصيدة احيانا غبي

ان كنت أنا اخطي شيء طبيعي لأن أنا ماني نبي
محدٍ عصمه الله من الاخطاء كون الانبيا
صحيح أنا اخطي بس ضوي ماتشب ألا حطبي
أطمح ولولا الليل محد شاف فايدة الضيا
امشي ولو أموت وأناامشي ولكن ماحبي
ولا أعشق الصورة ولا الكربون ولا أعشق غيا
كل مااتعثر قلت في نفسي وأنا أمس شنبي
ياكم على الدنيا فقير ويحسدونه أثريا
ابغى أتوحد وأنت اخذ مزهبك واترك مزهي
كنا إخويا ومن بعد مازليت ماحن بخويا
أبعصم ارجيلي عن دروب السخافه يا صبي
لاني حياوي والدروب السود مافيها حيا
تعال وادعني وداع الأرض للحر الأبي
أنا بعلي وان دعيتك فالعفو للأنقيا
ماني بنادي باسمك اللي ماتسمواه أجنبي
إن قلت لك يا.. اعرف اني حاشمك لاقلت يا
يا.. والله وبالله وبعد الله وبي وبسببي
صارت شياطين الحروف المستهيمه اتقيا
فإن شفتني متعب هجوسي في رسم راس الظبي
ماهو علشان اكسب اعجابات ريمانه هيا
لا.. لا أنا مخلوق مبدع ما يحب ومايبي
ألا يقول إن الاذكيا سبة سقوط الأغبيا
من الذكاء انك تسوي نفسك أحياناً غبي
بس الغباء انك تذيكا لك على ناس أذكيا

قصيدة صوت بن سبيل

لا تقيس الدين بالعقل يا عقلي.. ونام
فيه غيبيات أأمن بها.. بلا مقوت
لأن ايمانك بها.. يعني انك في سلام
من غضب ربي وسخطه وتخريب البيوت
لا تفكر في مسائل نتايجها اثام
يكفي ان الوقت ملبسني من الاثم.. كوت
آثم بس اعرف ويش تالية الغرام
بين شيخان العقيدة وشيخان البشوت
تالية حب الطرفين ضيعه وانقسام
تنعكس على من يدور لمضناه قوت
السكوت يزين لا صار من حولك كلام
بس ما هو زين لا صار من حولك سكوت
ويش اقول؟ اقول يالله جعلهم للعدام؟
لا.. بقول انا اتمنى قبل عمري يفوت
وذي اني ما تعداك يالبيت الحرام
وودي ان اعيش فيك العمر كله واموت
الله اكبر لا اذن المذن وكبر الامام
واصبحوا زاكين الانفاس من خلفه صنوت
وابتدأ يرتل ونظم بترتيله زحام
وانتهى من ركعته وابتدأ يدعو.. قنوت
الله الله الله الله على شعور الوئام
جعل صوت ابن سبيل بعد مليون صوت
يجعل بيوت الشياطين في عقلي حطام
كن صوته ينتشلني معه من بطن حوت
لا سمعته.. يصغر الكون فعيوني.. وأنام
وأمن اني مؤمن ابما يقول.. بلا مقوت

قصيدة لا اخلا و لا اعدم

ردني لك.. موتتي في غيابك موتتين
يا محول ضيقتي من وجود إليا عدم
لا تخليني ما بين الثلاثة و الثنين
البكا و السخط فيك ، وشعوري بالندم
ضقت ذرعاً، يالله انك تزينها .. تزين
من عيون اللامبالاة و يدين الردم
والله ان جرحك بقلبي كبير وله حنين
كبر ملك الامبراطور ف عيون الخدم
الله أكبر يا وليفي بعد ما كنت وين..
صار مالي في حياتك ولا موطئ قدم
ردني لك.. لا خلاص انت رح ، والله يعين:
من على شانك يفض الجموع ويحتدم
خلني لي.. وأعدك في مقابيل السنينن
ماأتمنى صعب.. ولاأعشق.. ولا أنصدم
أنت ما قصرت يالغالي وعذرك سمين
وطول الله عمرك.. لا اخلا ولا اعدم

قصيدة كرت زيارة

قال : أبا اشوفك ؟ سكت شوي , قلت : اشزينه
موعدٍ معك أنت لايمكن عليّ إنكاره
بس لاحظ إن قلبي لو جفو غالينه
ما جعلهم عرضة النقاده الثرثاره!!
قال : أنا أدري .. و الله يوقْف معه و يعينه
قلبك إلى حط أعداءه على أنصاره!
قال:باكر.. قلت بكره(غد).. يا تانينه
كلها ساعات ويبوح النهار أسراره
المهم.. أصبحت صبحٍ ما عرف تكوينه
صبح من ندرة عصافيره تصيد احراره
وآتقهوى.. قهوة اللي مضحكتْه سنينه
وآخذ اغراضي معي.. واشغّل السيارة
واسرح في بالي انه في حدا دربينه
يا قبل بيته ابيّتين.. أو على دوّاره
وليه ذا.. واقف معنّز جسمه بيدّنيه
وقفة اللي ربعه تحبّه ولا تختاره
قلت: ليه انت اتّشاءم انت اتّشاءم والبنادم طينه
ينتصر.. لاحط ذكر الله على إصراره
قال: أنا.. مانيب متشائم.. لكن يشينه
لابتدا عمرك بصدماته وموت أزهاره
كنت احسب ان الحياة لساره أو ل(لينه)
لين ماتت (لينه).. وفي يوم ماتت (ساره)
ظل يبكي.. وانتهز صدري .. وجا من بينه
لين حسيت ان كثر الدمع فك ازراره
اعملت في عيني انفاسه ودمعة عينه
مثل ما يعمل بخار الشاي في النظاره
قمت اضمه وآحضن راسه ولا ادري وينه
لاني اعشقه بمفاجأته وفي تكراره
كان يوم.. يعلّم الواحد يوفّي دينه
الفرح به قاطعٍ للحزن كرت زياره
يالله انك تقطع الوقت الردي وتهينه
كانه يبكّي كباره من غياب صغاره

قصيدة أنت غير

حي مني لا ذكرته دريت أني بخير
صاحبن لا شافني ضقت منه ضمني
يشتعل بي لين يطفى على العرق الاخير
و أنتثرله شوق و اليا أنتثرت يلمني
يا تنداي الخليه على طاقة حرير
يا مخوفني و قاطع رجاي و ممني
يا أمل يا خيبته يا متاهه يا مصير
خل قلبك لا تراخى الزمان يزمني
مابي الدنيا أبيك أنت لانك انت غير
جيت فحضانك طفل و أنت أبوي و سمني
شوف فوق وغن بسمي على اللحن القصير
و خصني في كل لمحة غرام وعمني
بشعل الدنيا عبير و بطفيها عبير
و لا بناشد من مدحني و لا من ذمني
جيت للدنيا كبير و بفارقها كبير
و من زعل ما همني و من رضى ما همني

قصيدة ذهاب بلا إياب

برى حالي لا أنتهى العصر و أعلن الانسحاب
خلت الشمس الصداره و مالت للغروب
و أذن المغرب و ساد الفضا مثل الضباب
و انتهى و الليل لبس الأماكن لبس ثوب
وردت همومي على قلبي الصلب خراب
وردت حيام الضوامي على عد جذوب
كلها هانت و لا هنت يا هم الغياب
من محبة صاحبك صرت يا هم محبوب
إخذ ليلك باوله و اكل و اشرب في رحاب
قلب من شدة طهارته تجفاه الذنوب
إيه و الدنيا مساكن و رحله و اغتراب
و الغلا في الوقت هذا مميز بالعيوب
أشمل جسمي و اعدي على روس الهضاب
كل ما ضيعت وجهي دريت إنه جنوب
ويش أسوي فيك يا عم تلعات الرقاب
و أنت واقع و التمعان في عيونك هروب
أنت "مجرم حب" لا ويش جاب لويش جاب
أنت عذبٍ عذب رجيلي بشوك الدروب
صرت أهاب من التزاحم و أنا ماكنت أهاب
و أمشي بكيفك لو إني على المشي امغصوب
صرت أجمع من جروحك و كلماتك عتاب
و قبل اقول اشفيك تجرحني ؟ استغفر و اتوب
صرت أحسب الناس ما كنت أحسب لها حساب
و صرت اكذب لاجل ترضى و أنا ماني كذوب
شوف مهما صار بي إنحنائي إنتصاب
إلعب بعمري و بعثره بايدك يا اللعوب
أدري ان الجاذبيه تسبب الانسكاب
و ادري اني منسكب و ادري ان ايديك كوب
سلت فأرضك و ارتوت بي و فاضتني عذاب
لين حبتني قلوب و تعاودت لي قلوب
فأعرف ان زولي غدير و حكاياهم سراب
و المقادير الايادي و شين الحظ طوب
يعني ليا رموني حقيرين الجناب
صار زولي عشرة ازوال و عيوني قروب
آتعدد لاجل اداريك عن طيش الشباب
و آتوجد لين يطغى على وجهي شحوب
ماني استاهل كذا منك يا وبل السحاب
لا تبللني و انا ودي انك ماءٍ شروب
إيتني و ادخل القلبي يا قلبي باب باب
و اخطر عروقي برجليك يا اسمر دوب دوب
جل من ولى عروقي بقنينة تراب
نوب تضحك من عذابي و تبكي منه نوب
لو لي دعوه وحيده ودعوه تستجاب
قلت:ياربي ليا مرخالفه الهبوب
زوى قلبي كل ما أزويت خصرك بانسياب
وقف العالم يرد البحر من كل صوب
يا خلاصة شهد و عذوق ما لذ و طاب
يا مغلبني و انا ما بعد صرت امغلوب
يا مسفرني لوجهك ذهاب بلا اياب
يا معزز بالغلا يا مقدر يا محسوب
إيتني و اذهب بي بعيد يا مال الذهاب
ضمني بايديك أبجمد على صدرك و اروب
انت لو ضميت تمثال من ضمتك ذاب
كيف لو ضميت صدر على ذكرك يذوب؟!

قصيدة تضيق نفسي

تضيق نفسي لين يشره على قلبي فمي
و أنا أترجّى في أمنيات الحلول المزمعه
لا يبن أبوي شلون محتر و أطغي و أحتمي
و الوقت لا منّه زما راس حضّي يقمعه
أن جيتها في الاصدقا أوف يا وفرة دمي
كم و احدٍ خلاّ جميلي على راس أشمعه
مانيب متحسّف جعل مال جافيني سمي
لان أدري المحراب ما هوب مثل الصومعه
تتغثبر الدنيا و لحظة صفوّ الأدمي
اليا سجد الله و سقّت دموعه مدمعه
وأنا أدمعت عيني وما اكميه عاده منكمي
بين أنتظام عروق قلبي مسوّي معممعه
ياوجد حالي و أنكساري و غيبي و عدمي
وجود من جمّع حلاله و ضاع اللي أجمعه
المشكله ما هيب نفسي وزلاّت قدمي
و ما هيب بحّة صوت أحبّه و لا عاد أسمعه
المشكله لا جات من بين دمّي و لحمي
مدري من أخلّي و لا أدري من اوقّف معه

المشاركة الأصلية كتبت بواسطة عــذبــة الـــروح

الرائع هو تشرفيك لي