( السنبلات البِيض ) !

،

مدخل ..



هم هاجروا ما كن لِ حروفهم.. دار!
وانا القياف اللي توازت بلا سرب !

عُمري جناح الريح يمضي ولا دار !
الا لدرب اللي مضى عنهم الدرب !

عمري حصاد الظن و للحق ميلاد
والسنبلات البيض يا راس عُمري !

هِمٍ غزا والشيب مايعرف اعياد
ما حشّم اللي تحسب الوقت بدري !

مما مضى مديت بالصبر الآياد
ولكل مزنة ( حيل ) اقول صبري !

عن كل نجمٍ نام اوقدت الاسهاد
احيي سراج الليل مِن بعض فكري

يوم ان هذا الشعر ينقص ولا زاد
من عمري لحظة ومض مازاد شعري !

بشيل عن عين الزمن حفنة رماد
ما بي تشب النار في لون شعري

و لكل ماض"ن" راح صعب التوجاد
عُذري لقيت اليوم ما كان عُذري !

شوف الغيوم احساس وبالارض اجهاد
اعيش وهذ الغم يُسقى بصدري !

اول سواليف العنى لوم وسهاد
و آخر سواليف العنى ( آآنام بدري ) .



__

شِكيتك للـرياح و لهفة "الـتقويم "
اذا ماراح يـطـوي من سُهادي يوم

وكل ماجيت ( نجم ) وانجلى التعتيم
تسلى ليل في قطْفگ سهر و نجوم !

واذا جابك "يناير" سالفة للديم
ذكرتك .. ما على جفو السحابه لوم !

على قُرب (القرار) ب نبرة الترنيم !
أحبك و (الجواب) ابعد من المعلوم !

9\1

سافرت عن كذب الفصول و لا رحل بعضي معاي
واقفيت ناقصني متاع وبعض شوق و نص ليل

اجر مِن صوتي مواويل الرحيل ويا عساي
اعرف طريقي قبل ما رجلي على رجلي تميل

كل المسافة لو حسبت ( الومض ) والوجهه وخُطاي
فكرة .. ولكن ردني عنها المدار المستطيل

عديت من بعد النوى قبل الوسن ينعس سماي
واكملت من بعد ابجد الفصحى الى الصمت الهزيل

في جرهدٍ عدَّاه من نبض الحسافة منتهاي
لين ابتداه من الشقى وحشه و صحّت كل ويل

آنست في قلبي شعور و اوقد الماضي حشاي
واستسعرت ذكراه تُصلى من قبس لهفه وحيل

من وين مايممت هب الوجد في نظرة مداي
مع نسمة الغربي ونقّض مِن حروفي الف " قيل" !

صح لسانك أبدعتِ
أبيات رائعه
شكراً لكِ

في الغالب كما تعودنا يكون الشِعر وميدان القصائد ( للذكور ) ..
وفيه يسرحون ويمرحون ويقولون ( أكيد ) مالا يفعلون ..
المهم أنهم سادة المقام والمقال ( عبر الزمن وتعاقب الأجيال ) ..
كل ذلك رغم وجود قصائد ( الأنثى ) ومشاركتها معهم ولكن بـ قِلة في الوهج ..
ذلك يعود لظروف متعددة وقد يكون أهمها نُدرة وجود الموهبة فيهن ..
لكن ( وهذا إستثناء هام ولازم ) عندما يحضرن يحضرن بإمّا هذا وإلاّ فلا وهذه حقيقة ..
ولنا أن نبحث عن قصائدهن عبر التاريخ وسنجد ذلك ..
هذه ميزة كبيرة وعطاء جميل وتميّز مثالي جداً ..
( تلاهيف ) إحداهن وبكل صدق وإنصاف ..
تلاهيف .. هذا كثير وفريد ومميّز وذو رونق ..
هذا إبداع ولافت جداً وأعلم بأن هذا طريق دائم ( ما شاء الله ) ..
كثير من الألقاب مُنحت لك كتعليق وتحفيز بأي نصوص سابقة وهي بصراحة مُستحقة ..
لن نعيد ونكرر فيها بقدر ما نقول ما أجمل الإبداع حينما يحضر ..
كسوتِ المنتدى بالسنبلات البيض فكانت كبياض حبات البرد الفريدة ..
أعجبتني الشاعرية الرائعة واللغة القوية والكلمات النادرة والتوظيف البارع ..

راق لي هذا في البداية :
هِمٍ غزا والشيب مايعرف اعياد
ما حشّم اللي تحسب الوقت بدري !

وهذا في النهاية :
اول سواليف العنى لوم وسهاد
و آخر سواليف العنى ( آآنام بدري ) .

باختصار . كل وكامل ما قرأت شئ مختلف فلله درك ومنه للأجمل ..
صح لسانك ولك تقديري ..