هكذا الدعوة الى الله
بسم الله الرحمن الرحيم
الدعوة الى الله من الامور الواجبة على كل مسلم من باب الامر بالمعروف والنهي عن المنكر ولكن هناك من يوفق الى الاسلوب المناسب وهناك من يجتهد ويكون اجتهاده في غير محله 0
ومن الموفقين في الدعوة الى الله احد المشايخ المعروفين على مستوى البلد ولا اريد ذكر اسماء ولكن اريد ان ابين الاسلوب :
يقول كنت في ليلة من الليالي اسير انا واحد الاخوان باتجاه مخيم لنا في البر وفي الطريق لاحظنا مجموعة من الشباب متجمعين امام مخيمهم وصوت الطرب والعود والغناء يصم الاذان 0يقول قلت لخويي وايش رايك نمرهم ندعوهم الى الله قال تم 0 يقول اقتربنا منهم ونزلنا وسلمنا عليهم ولما شاهدونا استصابوا وكانوا يتوقعون اننا من الهيئة وتوقفوا عن الغناء وتغيرت اشكالهم 0يقول اقتربنا منهم وصافحناهم وقاموا لمصافحتنا 0 ولم يقل احد منهم كلمة تفضلوا او اجلسوا وكأنهم يبغوننا ننصرف 0قلت لهم ويش فيكم ما فيه اقلط او تفضل ؟ ناظروا في بعضهم قال واحد منهم تفظلوا اقلطوا ورموا ادوات الطرب خلف ظهورهم 0 وصبوا لنا شاهي وشربناه وقلت اكملوا سمرتكم حبينا نجلس معكم ونشارككم 0قال واحد منهم الله يهديك ياشيخ انت معروف انت الشيخ فلان وتطالبنا بالغناء 0 قلت ويش فيه 0 سمرة وسعة خاطر 0قال بس الغناء حرام 0 يقول انا خفت انهم يتفرقون وحن ما حققنا شيء قلت الغناء فيه معصية لله ومضيعة للوقت واذا تعدى الحد فيصبح حرام وانتم شباب وتعرفون ذلك جيد ولكن لي عندكم طلب قولوا ابشر كلكم 0 قالوا ابشر قال مثل ما اخذنا عندكم فنجال شاهي تجون عندنا تاخذوا فنجال حن جيرانكم قريب منكم وانتوا وعدتوني الا اذا فيه احراج فبلاش 0 يقول : ورطوا معي وقالوا طيب فنجال ونرجع 0قلت تم 0
يقول كان عددهم سته ركبوا سيارتهم وركبنا سيارتنا وتحركنا الى مخيمنا وكان فيه مجموعة من الشباب ولما قربنا نزلنا ورحبوا فينا الشباب وقلطنا وجات القهوه والشاهي اللي على الجمر تهول العقل وتقهووا الشباب واخذنا في السوالف والمزح الطيب وبدل ما كانوا يبغون يشربون فنجال ويمشون جلسوا ما يقارب ساعه ثم استاذنوا وخرجوا وانا معهم ومشيت معهم الى سيارتهم واعطيتهم رقم جوالي واخذت ارقامهم وودعتهم 0
يقول : وبعد يومين اتصل عليه واحد منهم وقال ابغى اقابلك يا شيخ قلت خلاص صل معي في المسجد الفلاني العصر مناسب ؟ قال نعم قال صليت العصر واذا بالشاب ومعه واحد منهم واقفين عند الباب توجهت لهم وسلمت عليهم وقلت البيت حاولوا يعتذرون الحيت عليهم 0دخلوا البيت واذاهم مندهشين من البيت رغم انه بيت عادي كنب وطاولات وثريات عاديه مابه شيء غريب 0 جلسوا واحضرت القهوه والشاي وتقهوينا وقلت العشاء فرفضوا بقوه 0
قلت امروا اي خدمه 0؟قال واحد منهم ياشيخ والله العظيم ان الفكره عندنا انكم ما تضحكون ولا تسولفون ولا تمزحون ولا تجلسون على الكنب ولا عندكم من وسائل الرفاهية اي شيء 0
قلت اعوذ بالله ليش حن من كوكب ثاني ؟ قال جاك العلم 0قلت وها لحين ايش رايكم ؟ قال اختلفت النظره 0قلت طيب وايش تريدون مني ؟ قالوا نريد ان نتوب ونستقيم 0قلت هذه سهله انصحكم بترك ما انتوا عليه من المعاصي وحافظوا على الصلاة مع المسلمين في المساجد 0 قالوا بس ؟ قلت نعم هذا كل ما في الامر 0
يقول وبعد اسبوع تقريبا اتصل عليه نفس الشخص وقال يا شيخ عندي فنجال قهوه وعندي الشباب يبغون يقابلونك 0 رحت واذا السته اللي كانوا في المخيم مجتمعين سلمت عليهم وجلسنا وتقهوينا وقالوا : ياشيخ جزاك الله عنا الف خير من اربعة ايام والله لم نعد نجتمع الا على قال الله وقال الرسول ووالله اننا في سعادة لم نجدها من سنين فاين انتوا عنا من زمان ؟ قلت الحمد لله الذي انار لكم الطريق وهداكم الى السراط المستقيم واسال الله ان يثبتكم 0
من هذه القصة نستنتج :
1- ان الدعوة ليست بالقوة ولا بالنهر ولا بالتوبيخ وانما بالحسنى كما قال ربنا 0
2- حسن التعامل ووطاة النفس والنزول الى العاصي تجعله يتقبل كل ما تقول 0
3- ان الشباب لديهم فكرة خاطيئة عن العلماء والمشايخ والدعاة اوصلها لهم اعداء الدعوة الى الله 0
4- عندما تنصح احد لا تستعجل على قبوله النصيحة والدعوة0 انصحه واترك امره الى الله 0
5- التزمت في الدين لايحقق الا الكراهية والتسامح واللين يحقق الشيء الكثير 0
احببت ان اضع هذه القصة بين ايديكم للفايده 0واسال الله ان ينفعنا جميعا بما نقول ونسمع وصلى الله على نبينا محمد واله وصحبه وسلم 0
|
الإهداءات
09-26-2009, 07:28 AM
المواضيع المتشابهه
العرض العادي
